¹ Mukatji kava Farisayi kwakalire mo murume walitimbi lidina lyendi NiKodemusi, mupititi wava Yuda. ² Ghuye kwayire kwaYesus ruvede rwamatiku aya mupure weno ashi, ''Murongi, atwe twa yiva ashi ove kwakutuma ntani kwatunda kwaKarunga, ntani kwato waku ruwana vitetu vyankondo vyaku tika pano nkwandi ndyeghu atuma Karunga.'' ³ Yesus alimburura Nikodemus weno ashi, ''Ghushili, vyaghushili, naku kutantera weno ashi kwato muntu waku ngena mughuntungi waKarunga, nkwandi kuna mushampuruka ruviri.'' ⁴ Nikodemusi apura Yesus weno ashi, ''Muntu weni omo vamu shampuruka ruviri nkene shi ghuye mukondi kare? Muntu naku vhura shi kuvyuka angene mulira lya vawina vamu shampuruke rwaghuviri, ngoli shili vyaweno kuvhura ndi?'' ⁵ Yesus amu limburura weno ashi, "Ghushili, vyaghushili, naku kutantera weno ashi nkwandi muntu kumu shampuruka ruviri, mumema namu mpepo ntani ngaka ngena mughuntungi waKarunga. ⁶ Muntu waku shampuruka panyama kukara wapa nyama, ntani waku shampuruka paMpepo kukara wapa mpepo. ⁷ Kapi shi ghutetuke kwadino nkango dande odo naku ghamba weno kukoye ashi, 'Vana hepa kukushampuruka ruviri.' ⁸ Mpepo nkene kuna kuyunga kuyenda kehe kuno yina shana; anwe kuyuvha omo yina kuyunga, ano ngoli anwe naku yiva shi oko yina kutunda ntani noku yina kuyenda. Kehe ghuno waku shampuruka muMpepo kuwana liparu lya lipe lyapa Mpepo.'' ⁹ Nikodemusi amu pura naku ghamba weno ashi, ''Ngoli shili vyaweno kuvhura kushoroka ndi?'' ¹⁰ Yesus amu limburura kumwe naku mutantera weno ashi, ''Ove mukurona wavarongi vavanene vamu shirongo shaIsrayeli, weni omo ghupira kuyiva naku kwata lighano vino vininke vyaweno? ¹¹ Ghushili, vyaghushili, naku kutantera weno ashi, atwe kughamba nkango daghushili odo twa yiva, ntani atwe kutapa ghumbangi waghushili kwavi twa kenga namantjo. Ano ngoli anwe kapi muna kutambura ghumbangi waghushili wankango detu. ¹² Nkene shi ame kuna kumutantera vininke vyapano pantunda yalivhu ano ngoli anwe kapi muna kuvipura, weni omo ngamu pura nkene shi ame nganu mutantera vininke vyamuliwiru? ¹³ Kwato muntu ogho arondo rumwe ayende muliwiru nkwandi - Mona Muntu ogho adumpuko muliwiru aye pano pantunda yalivhu. ¹⁴ Virugho vina kapito Moses kwadamunine liyoka palivhu mumburundu, naye Mona Muntu mo ngoli ngava mudamuna nga yeruke, ¹⁵ mpo shi vantu navantje ovo ngava puro mumwendi ngava wane monyo wanaruntje. ¹⁶ Hompa Karunga kwahora ghudyuni, mbyo atapire Monendi ahuru, ashi kehe ghuno nga puro mumwendi kapi shi nga yende mumpanguro yamu lidyonaghuko nane ngoli ngaka wane liparu lya naruntje. ¹⁷ Karunga kapi atumine Monendi mughudyuni nashitambo shakupangura naku dyonaghura ghudyuni, nane ngoli kupitira mumwendi ghudyuni naghuntje nga ghuyoghoke. ¹⁸ Kehe ghuno nga pura mumwendi kapi nga yenda mumpanguro yalidyonaghuko, ntani kehe ghuno waku pira kupura mumwendi ghuye kwapwa kare kukupangura mwene mukondashi ghuye kapi apura naku huguvara mulidina lya Mona Karunga ahuru. ¹⁹ Vinke vyayitango mpanguro yandyo kuvantu: Hompa Karunga kwatuma shite shendi shiye mughudyuni, ano ngoli vantu vamu ghudyuni kwahora kukara mumundema mposhi vahoreke ndyo davo mumundema ngadi pire kumoneka mushite mukondashi vavo kwahora viruwana vyavo vyaghurunde. ²⁰ Vantu vaku ruwana ghurunde kwanyenga ghukenu nashite, mposhi viruwana vyavo vikare mumundema, kapi shi ngavi shoroke paghukenu. ²¹ Ano ngoli, vantu vaku ruwana ghuhunga naghushili vavo kushoroka paghukenu vakare mushite viruwana vyavo vimoneke kwanavantje vayive ashi vavo kwalimburuka nakutikitamo nkango daKarunga.'' ²² Kuruku rwashirugho, Yesus navarongwa vendi kwashapuka vayende kushirongo shaYudeya. Ghuye aka kara nkoko navarongwa vendi ntani avaka kusha vantu vavayingi vawane liyoyero. ²³ Ntani mpopo tupu paruvede Yohanes Mukushi naye ka kushanga vantu vawane liyoyero mumema kumukunda waSalimu oko ghakalire mema ghamayingi. Vantu vavayingi kava yanga kwaYohanes avakushe vawane liyoyero lyamu mema, ²⁴ pashirugho shino Yohanesi shimpe kapi vana mukwata vamu ture mudorongo. ²⁵ Kutunda tupu mpopo di mutangu kwashapuka pakatji ka varongwa vaYohanes nava Yuda vyaku hamena kulikusho lyamu mema kuvantu vakare kuna kushuka kushipara shaKarunga. ²⁶ Vano vantu kwayenda kwaYohanes vamu tantere weno ashi, ''Murongi, oghunya murume wakalire naye musheli munya yamukuro waYorodani, oghunya watapilire ghumbangi, naye, weno kuna kukusha vantu, ntani mbunga yavantu vavayingi kuna kuyenda kukwendi.'' ²⁷ Yohanes avalimburura weno ashi, ''Muntu kwato kuruwana vyaweno pamwene nkwandi kwawana nkondo dakutunda kuliwiru. ²⁸ Anwe mwayuvire nkango dande daghumbangi opo ghambire weno ashi, 'Ame kapi shi Krisitus,' nane ngoli, 'Ame vatuma nganu pite kumeho yendi.' ²⁹ Ame muholi wendi tupu ntani shipito shankwara kwahamena kukwendi mukwali. Ame muholi wendi tupu ntani kwayimana mulivhango lyendi, ndye nataterera nga moneke ghuye ndye mukwali ntani ndye mwenya shipito shankwara ogho twa taterera natuvantje nga moneke name nganu mukenge namantjo naku yuvha liywi lyendi, makura ngatu kare naruhafo kumwe naye ntani naku dyobwana shipito shendi shankwara dendi. Opo ngavi shoroka vyaweno, ame, nganu kara naruhafo rwarunene rwaku tikiliramo. ³⁰ Makura ghuye nga kara namfumwa nalikuto lya linene nga yende naku yuvika nakuntje ngava muyive mughudyuni, ntani ame nganu kara nalikuto lya lisheshu lya lididi mushirongo. ³¹ Yesus kwatunda muliwiru mbyo akara kuwiru-wiru yavantu navantje. Atwe vantu vapano pantunda yalivhu atwe kughamba tupu vininke vyapano pantunda yalivhu. Kehe ghuno waku tunda muliwiru kwapitakana vantu navantje vapano pantunda yalivhu. ³² Muntu waweno nampili nga tape ghumbangi wendi wamu liwiru wakuhamena kuvininke navintje ovi amona namantjo ntani navi ayuvha namatwi, kapi ngamu pura nkango dendi naghumbangi wendi ashi waghushili. ³³ Ano ngoli kehe ghuno waku tambura naku huguvara nkango daghumbangi wendi ashi daghushili nkwandi ndyeghu ayivo naku kwata lighano naku pura weno ashi Karunga ndye muna ghushili. ³⁴ Hompa Karunga kwatuma vantu varonge naku yuvita nkango dendi. Ntani ghuye kwatapa Mpepo yaKupongoka yayi yingi yankondo ghunene. ³⁵ Vashe kwahora ghunene Monendi mbyo vatapa lipangero lya vininke navintje ngavi kare mumaghoko ghendi. ³⁶ Kehe ghuno waku pura mwaMona nga kawana liparu lya naruntje, ntani kehe ghuno waku pira kupura naku limburuka kwaMona kapi ngaka mona nakuwana liparu lya naruntje, ghuye ngaka gwanekera naku kawana lishandu lya Hompa Karunga.''