¹ Yesus kwayuvire mbudi yaku tunda kuVafalisayi ashi mbunga yavantu vavayingi kuna kuyenda kukwendi ntani ghuye kuna kukusha vantu vavayingi vawane liyoyero kupitakana shivaro shavantu ovo ka kushanga Yohanes ² (ano ngoli Yesus mwene kapi ka kushanga vantu, varongwa vendi mbo kava kushango vantu), ³ makura Yesus navarongwa vendi avatundu mo mushirongo shaYudeya vavyuke kushirongo shaGalileya. ⁴ Ntani kwakalire hepero ghunene ashi Yesus kuna hepa kupita mushirongo shaSamariya. ⁵ Opo aka tikire mushirongo shaSamariya, mudoropa yaShikara, yapepi nalifuva lya Yacopu olyo atapire kwamonendi Yosefu mwaka dina kapito. ⁶ Pandye yadoropa kwakalirepo litope lya Yakopu lya mema. Yesus kwarorokire ghunene muruyendo opo aya tikire palitope ashungiri apwiyumuke. Ghuye kwaya tikire palitope liyuva lina tenguka. ⁷ Makura mukamali ghumwe wamu Samariya kwayire aya vhete mema mulitope, Yesus aghamba weno kukwendi ashi, ''Mpeko mema ghakunwa.'' ⁸ Varongwa vendi kwamushuvire Yesus pentjendi vayende kudoropa vaka ghure ndya. ⁹ Mukamali wamu Samariya amu limburura weno shi, ''Ame kutetuka pakuyuvha, ove murume wamu Yuda, kuna kuromba kukwande, ame mukadi wamu Samariya, mema ghaku nwa?'' Mukondashi mpo yava Yuda nampo yaSamariya ntani vantu kwato kukuyendera. ¹⁰ Yesus amu limburura naku mutantera weno ashi, ''Ove ashi ndi kwayiva maghushwi ghaKarunga ghaku vantu, ntani ndi ghuna yiva ashi muntu munke ana kurombo naku shungida weno kukoye ashi, 'Mpeko mema ghaku nwa,' ove ndi kughuromba naku shungida kukwendi, akupe mema ghamonyo naliparu.'' ¹¹ Makura mukamali amu tantere weno ashi, ''Mukalikuto, ove kapi ghuna kara nalihemere lyaku vheta mema mukondashi olino litope lya dama ntani lire ghunene. Kuni nko oku ghuvhura kuwana mema ghamonyo naliparu? ¹² Ove naku vhura shi kupitakana panyakulyetu Yakopu, ogho atapiro lino litope kukwetu omo kanwa nga mwene mema, navana vendi ntani navimuna vyendi?'' ¹³ Yesus amu limburura naku mutantera weno ashi, ''Kehe ghuno waku nwa mema ghamuno mulitope shimpe nga yuvha nka linota, ¹⁴ ano ngoli kehe ghuno waku nwa mema ghaku tunda kukwande ghuye kapi nka nga yuvha linota narutje naku naruntje. Ntani, mema ghande ogho natapanga kuvantu kukara mukuro waku yura waku pupa mema mumwendi, waku tapa liparu namonyo wanaruntje naku naruntje.'' ¹⁵ Makura mukamali aghamba weno kukwendi ashi, ''Mukalikuto, mpeko ghano mema ghaweno mposhi nganu pire kuyuvha nka linota ntani nganu pire kukavyuka kuno kulitope lyaku vheta mema.'' ¹⁶ Yesus kwayivire ashi kapi akwatire lighano ghuye amu tantere weno ashi, ''Yenda, ghu kayite mukafumu ghoye, mukaye kumwe kuno kukwande.'' ¹⁷ Mukamali aghamba naku limburura weno ashi, ''Ame kwato mukafumu.'' Yesus amu tantere weno ashi, ''Mu ghushili ghuna kara kunkango doye paku ghamba weno ashi, 'Ame kwato mukafumu,' ¹⁸ ove kwakwara rukando rutano, ntani ghuno murume ghuna kara naye paweno kapi shi ghoye. Odino nkango doye ghuna ghamba ashi ame kwato murume daghushili ntani mughuhunga.'' ¹⁹ Makura mukamali amu tantere weno ashi, ''Mukalikuto, weno ame nayiva naku dimburura ashi ove muporofete. ²⁰ Vakurona vetu kava yanga kuno kundundu varaperere kwaKarunga, ano ngoli anwe vaYuda vantantani kughamba weno ashi livhango lyaku raperera kwaKarunga kwakara muYerusalemu.'' ²¹ Yesus amu tantere weno ashi, ''Mukamali, yuvha ntani tambura dino nkango naku ghamba weno kukoye ashi, shirugho kuna kuya ntani shina tikimo kare anwe kapi nka ngamu yenda kundundu ndi muYerusalemu ngamu ka raperere kwaKarunga Shetu. ²² Anwe vantu vamuhoko waSamariya kuraperera kuva karunga vapeke-peke ovo mwapira kuyiva. Atwe vaYuda kwarapereranga kwaHompa Karunga ogho twa yiva, ntani liyoghoko lya ndyo kwatunda kumuhoko wava Yuda. ²³ Ntani nka, shirugho kuna kuya, weno shina tikimo kare, vantu navantje vaku raperera kwaKarunga Shetu vana hepa kuraperera kukwendi paMpepo ntani namu Ghushili, mukondashi Karunga Shetu kuna shana vantu vaku raperera kukwendi weno. ²⁴ Hompa Karunga kwakara paMpepo, ntani vantu vana hepa kuraperera kukwendi paMpepo ntani namu Ghushili.'' ²⁵ Mukamali amu tantere weno ashi, ''Ame nayiva ashi Mesaya kuna kuya (wa lidina Kirisitus). Opo ngaya tika, ghuye ngaya ghamba naku turonga naku tutantera navintje.'' ²⁶ Yesus amu tantere weno ashi, ''Ame ghuno, naku ghambo nove weno, Ame.'' ²⁷ Kuruku rwashirugho shashifupi tupu varongwa vendi navo avayatiki. Vavo kwatetukire paku kenga Yesus kuna kughamba namukamali wamuhoko wapeke, ano ngoli kwato ogho amu puliro weno ashi, ''Vinke ghuna ghamba naye ghunya mukamali?'' ntani ashi ''Vinke ghuna shana kukwendi ghunya mukamali?'' ²⁸ Makura mukamali ashuvu mpopo lihemere lyendi lya mema, aduka avyuke kudoropa, aka tantera vantu weno ashi, ²⁹ ''Tuyendenu, muka kenge mukafumu ogho ana ntantero vininke navintje ovyo naruwana muliparu lyande. Ghuno murume kuvhura akare shi ndye Kirisitus, mo naku ghayara?'' ³⁰ Vantu vavayingi avatundu mudoropa vayende kukwendi vaka mukenge. ³¹ Pa shirugho ntjosho, varongwa vendi avamu shungida naku ghamba weno, ashi, ''Murongi, lyako ndya.'' ³² Ano ngoli Yesus avatantere weno ashi, ''Ame kuna kara nandya dakulya odo mwapira kuyiva anwe.'' ³³ Makura varongwa vendi avakupura vene navene weno ashi, ''Kwato muntu ogho ana yito ndya daku lya kukwendi, ndi mpovali walye?'' ³⁴ Yesus avatantere weno ashi, ''Ndya dande daku ruwana shitambo shaVavava ovo vantumo mposhi nganuya tikitiliremo viruwana vyendi. ³⁵ Pa ruvede runo anwe kughamba weno ashi, 'Shimpe makwedi mane ana hupoko ntani ngatu kawana muyangu wambuto mumafuva'? Ano ngoli ame kuna kumu tantera weno ashi, kankukenu mukenge kuwiru ntani kengenu mumafuva, muyangu ghuna wapa kare kukesha paweno! ³⁶ Kehe ghuno waku tambura naku pura munkango dendi ana hepa kutameka kukesha naku yangura naku pongeka muyangu wambuto weno makura ghuye kuna wana kare mfuto yendi yaku pongeka nyango yaliparu lya naruntje, makura muntu waku kuna mbuto ntani namuntu waku kesha waku pongeka mbuto mulifuva vavo ngava kahafa naku pemburura kumwe tupu. ³⁷ Odino nkango vaghamba weno daghushili ntani dina hepa kutikiliramo, kwatanta weno ashi, 'Muntu ghumwe waku kuna mbuto, ntani ghumwe waku kesha naku yangura mbuto,' odino nkango daghushili. ³⁸ Ame kuna kumutuma ngamu kayangure mbuto oyo mwapira kukuna anwe. Vantu vamwe kwaruwana kare vatjimpuka liyuywa vakuna mbuto, ntani anwe mbyo muna kuyenda muka yangure naku pongeka mbuto yavo oyo vakuna naku tjimpukira.'' ³⁹ Vantu vavayingi vamu Samariya vamu shitata shaShikara avatambura nkango dendi naku pura mwaYesus mukonda yambudi naghumabngi ogho aghambire ghuno mukamali kukwavo waweno ashi, ''Ghuye kuna ntantere vininke navintje ovyo naruwana muliparu lyande.'' ⁴⁰ Makura vantu vamu shitata avaya kwaYesus, avamu shungida akare navo mayuva ghangandi, makura akara navo ghure wamayuva maviri. ⁴¹ Ntani vantu vavayingi vamu shitata avapura mwaYesus mukonda yaMbudi yaRuhafo nankango dendi odo vayuvitire mushitata. ⁴² Vantu avatantere mukamali weno ashi, ''Atwe kuna pura mwaYesus kapi shi mukonda yambudi oyo ghuna ghamba kukwetu, nane ngoli mukonda yankango odo tuna yuvhu naghumwetu kukwendi mwene, weno tuna yiva ghushili ashi ghuno ndye Muyogholi waghushili wamu ghudyuni.'' ⁴³ Kuruku rwamayuva maviri, Yesus navarongwa vendi kwatundumo muSamariya vayende kushirongo shaGalireya. ⁴⁴ Yesus mwene kwaghambire weno ashi muporofete kapi akara namfumwa mushirongo shamvharera yendi. ⁴⁵ Opo aya tikire mushirongo shaGalileya, vantu navantje avamutambura maghoko maviri. Mukondashi vavo vamu yivire ashi muntu munke ntani kwamona viruwana navitetu vyavinene ovyo aruwanine muYerusalemu pashilika shaPaska, mukondashi navo kwayendire kushipito. ⁴⁶ Makura Yesus ayendi avyuke nka kumukunda waKana muGalileya, omo aruwanine vitetu vyaku tjindja mema akare vinyu ndi marovhu. Mushirongo kwakalire mo lirenga lya Hompa, ogho akaliro namonendi wakuvera ghunene mumukunda waKaperenimu. ⁴⁷ Lirenga lya Hompa kwayuvha mbudi ashi Yesus kuna tundu kuYudeya ayende kushirongo shaGalileya weno ana katika, makura ayendi kwaYesus aka mushungide ayende kumundi wendi aka verure monendi, ghuye kuna kuvera ghunene pepi nakufa. ⁴⁸ Yesus amu tantere weno ashi, ''Ove kuna shana nkwandi ghukenge vitetu naviyivito ntani nga ghupura mumwande, nkene kwato kapi nga ghupura.'' ⁴⁹ Lirenga lya Hompa kwaghamba weno ashi, ''Murongi, tuyende ko mpopano ghuye monande shimpe kapi ana fu.'' ⁵⁰ Yesus amu tantere weno ashi, ''Kayende. Monoye muyumi kwakara namonyo.'' Makura lirenga lya Hompa kwapura nkango odo aghambire Yesus, makura aka yenda kumundi wendi. ⁵¹ Mundyira yendi yaku yenda avyuke kumundi, agwa nekere navakareli vendi kuna kuya kukwendi, avamu tantere weno ashi monoye ana veruka wandyewa-ndyewa. ⁵² Ghuye avapura weno ashi shirugho munke ka veruka mwanuke. Vavo avamu limburura weno ashi, ''Yona kushitenguko paviha vyaviri yakutanga mpo kaveruka lishakima.'' ⁵³ Makura Vashe vamwanuke avadimburura ashi mpopo pashirugho ka ghamba Yesus dino nkango daweno ashi, ''Monoye kwaveruka nga kare namonyo.'' Mpopo tupu makura naye nalipata lyendi kwapura mwaYesus namu nkango dendi. ⁵⁴ Oshino kwakalire shitetu shaghuviri osho aruwanine Yesus aneyede vantu ashi muntu munke, ovino kwashorokire pandye yashirongo shaYudeya mundyira yaku yenda kuGalileya.