¹ Kuruku rwamayuva matatu, muKanana yamu Galileya kwakalire mo shipito shankwara, vawina vaYesus navo kwakalire pashipito. ² Mwenya shipito kwayita Yesus navarongwa vendi vayende kushipito shankwara. ³ Opo ghapwire marovhu, pashipito vawina vaYesus avamu tantere weno ashi, ''Marovhu ghana pu weno kwato.'' ⁴ Yesus kwatantera vawina weno ashi, ''Mugholikdi, vinke ghuna kughambera vyaweno kukwande? Shirugho shande shaku ruwana shimpe kapi shina tikimo.'' ⁵ Vawina avapiruka vatantere mupindi wamarovhu weno ashi, ''Kehe vino aku tantera, ove viruwane.'' ⁶ Pandye kwakalirepo matenga matano nalimwe ghakushonga namawe ghamuporongwa ogho vatulire mema vaYuda vaku kushe vakare vana kushuka kumeho yakudana shipito shampo yavo, litenga limwe tupu kwakara nalitera yakutika kulifere limwe. ⁷ Yesus kwatantera varuwawani vashipito weno ashi, ''Terenu mema mumatenga naghantje ayure mema.'' Vavo kwavheta mema vatere mumatenga naghantje dogoro kwayura. ⁸ Yesus atantere varuwani weno ashi, ''Vhetenu mo nkinda yaku yura mutware kwamupindi wamarovhu.'' Makura varuwani avaviruwana ngoli. ⁹ Mukurona wavapindi marovhu anumo amakere munkinda yamema yayo yina kutjindyi yina kara marovhu, ano ngoli ghuye kapi ayivire ashi kuni nko atundire marovhu ghaweno (ano ngoli mukareli oghu atwaliro nkinda yamema kwayivire navintje). Ghuye mpopo kwayita mukwali wankwara ¹⁰ amu tantere weno ashi, ''Pa vipito vyankwara navintje kehe pano vantu kuhova kutapera marovhu ghamawa ghaghutovali mposhi vantu vanwe vakorwe wangu kuruku ntani vana kutapa marovhu gharungungu vanwe vavo vana korwa kare. Ano ngoli anwe mbyo muna tuliki marovhu ghaghutovali ghamawa dogoro ruvede runo.'' ¹¹ Oshino kwakalire shitetu shakuhova osho aruwanine Yesus muKanana yamu Galileya, ghuye kwaneyeda naku shorora ghuyerere wendi waghushili, makura varongwa vendi avapura naku huguvara mumwendi. ¹² Kuruku rwavino Yesus, navawina, ntani navaghunyendi kumwe navarongwa vendi avayendi vaghurumuke kuKaperenimu makura avaka kara momo mayuva ghama sheshu tupu. ¹³ Ruvede runo shilika shakudana shipito shava Yuda ndi Mavhumbukiro - Paska kwakalire papepi, makura Yesus ayendi akanduke kuYerusalemu. ¹⁴ Ghuye aka wana vaghuliti ngombe nandywi ntani navankuti, vavo kuna shungiri muntembeli, kumwe navatjindyi vavimaliva navo kuna shungiri munda. ¹⁵ Makura Yesus aposho ngora yashipapa ashepura naku vatjida vantu navantje vatunde munda yantembeli varupuke pandye, kumwe nandywi ntani nangombe. Ghuye kwavhukuma vimaliva kumwe naku ganda vitafura vyava tjindyi vimaliva. ¹⁶ Ghuye kwatantera vantu vaku ghulita vankuti weno ashi, ''Damunenu vininke vyenu virupuke viyende pandye. Kapi shi muture ndyugho yaVavava yikare livango lyaku ghulitira ngeshefa.'' ¹⁷ Makura varongwa vendi avavhuruka nkango odo vatjanga kare mumatjangwa weno ashi, ''Ame kwahora ghunene ndyugho yoye mbyo nayi pakeranga shinka shashinene.'' ¹⁸ Vampititi vava Yuda avamupura weno ashi, ''Shiyivito munke ghuvhura kutuneyeda, tuyive ashi Karunga kwatapa nkondo kukoye daku ruwana vyaweno?'' ¹⁹ Yesus avalimburura weno ashi, ''Yungururenu mudyonaghure yino ntembeli, ame nganu yitunga ngayipwe ngayi karepo mumayuva matatu tupu.'' ²⁰ Vampititi vava Yuda avaghamba weno ashi, ''Yino ntembeli kwayi tunga ghure wamwaka dimurongo ne nantano namwaka ghumwe, ove kuna kughamba ashi ngaghu yitunga yipwe mumayuva matatu tupu?'' ²¹ Ano ngoli, Ghuye kwaghambire vyaku hamena kuntembeli yarutu rwendi. ²² Opo aka vhumbukire kughufe, varongwa vendi avavhuruka nkango dendi odo aghambire dakuhamena kuntembeli yendi, makura vavo avapura nkango damu matjangwa ntani nankango odo aghambire Yesus. ²³ Yesus opo akalire muYerusalemu paruvede rwashilika shaMavhumbukiro - Paska, vantu vavayingi kwapulire mulidina lyendi mukondashi vavo kwamonine vitetu naviyivito vyavinene ovi aruwanine. ²⁴ Ano ngoli Yesus kapi akalire nalihuguvaro mumwavo mukondashi ghuye kwayiva ghukaro wavantu navantje, ²⁵ ntani ghuye kapi ashanine kuyuvha ghumbangi wakutunda kuvantu, ayive ashi vantu kwakara naghurunde ntani naghu kukutu dimutjima.