¹ Pilatus makura atapa Yesus vakamu shepure nangora. ² Vakavita makura avadingi nkata yamigha. Vavo avayidwateke Yesus kumutwe ntani avamudwateke nka lirwakani lyaligeha. ³ Vavo avayendi pepi naye makura avaghamba ashi,'' Moro, Hompa wavaYuda!'' ntani avamutoghona rukushi. ⁴ Pilatus arupuka nka shimpe pandye avatantere ashi,'' Kengenu, ame kuna kumu rupwita pandye aye kukwenu, muyive ashi ame kapi namuwana ghundyoni.'' ⁵ Yesus arupuka, ghuye vana mudwateke nkata yamigha ntani nalirwakani lyaligeha. Pilatus avatantere ashi,'' Monenu, muntu ghuno!'' ⁶ Opo vamumonine Yesus vaPristeli vavanene navakareli, avayiyiri ashi,'' Mupamparenu kushilivindakano, mupamparenu kushilivindakano!'' Pilatus avatantere ashi,'' Mughupenu naghumwenu mumupampare kushilivindakano, ame kapi namuwana ghundyoni.'' ⁷ VaYuda avamulimburura ashi,'' Atwe twakara naveta, kutwara muveta yetu ana hepa kufa, mukondashi ghuye kuna kutwenye ashi ghuye mona Karunga.'' ⁸ Pilatus opo adi yuvhire dino nkango, akara naghoma waghunene, ⁹ Ghuye avyukamo nka mundyugho yakupangulira aka pure Yesus ashi,'' Kuni nko oku watunda?'' Ngoli Yesus kapi amulimburulire. ¹⁰ Pilatus amu tantere ashi,'' Kapi ghuna kughamba name? Kapi ghuna yiva ashi ame kwakara nankondo dakukumangurura ntani nankondo dakukupamparera kushilivindakano?'' ¹¹ Yesus amu limburura ashi,'' Ove kapi wakara nankondo kehe dino papande, nkwandi ndodo vakupa datundo muliwiru. Ano ngoli, ogho ana ntapo mumaghoko ghoye, ndye ana karo nandyo yayinene.'' ¹² Opo ayuvire dino nkango, Pilatus kwashanine kumu mangurura, Makura vaYuda avayiyiri, ashi,''Ntjene ghumumangurura ghuno mukafumu, ghuholi woye naHompa waRoma kughu shagha. Mbytovyoshi kehe ghuno wakukutwenya ashi ghuye Hompa ogho nkore yaHompa waRoma.'' ¹³ Pilatus opo ayuvire nkango dino, arupwita Yesus pandye makura aka shungira kushipundi shakupangulira oko vatwenyanga ashi'' Shinyanga shamawe,'' ano ngoli muruHebeli ashi,'' Gabata.'' ¹⁴ Lino kwakalire liyuva lyakuwapayika shilika shaPaska, kushitenguko. Pilatus atantere vaYuda ashi,'' Kengenu, Hompa wenu ghuno!'' ¹⁵ Vavo makura avayiyiri,'' Mughupepo,mughupepo; kamupamparere kushilivindakano!'' Pilatus avapura ashi,'' Nukapampare Hompa wenu kushilivindakano ndi?'' VaPristeli vavanene avalimburura ashi,'' Atwe kundereko Hompa, Hompa wetu twe waRoma.'' ¹⁶ Makura Pilatus atapa Yesus vakamupamparere kushilivindakano. ¹⁷ Vavo avamughupu Yesus, vamutware, ghuye ana damuna shilivindakano shamwene, vayende kulivango oko vatwenyanga ashi, livango lyavifupu-fupa (lyamakorongongo),'' olyo vatwenyanga muruHebeli ashi,'' Golgota.'' ¹⁸ Nko vakamupampalire Yesus, navakafumu vaviri, ghumwe kurulyo ghunyendi kurumontjo, ano Yesus ghuye mukatji kavo. ¹⁹ Pilatusi avatantere vatjange nkango vature pashilivindakano. Avatjanga po ashi: YESUS WA MUNASARETI, HOMPA WA VA YUDA. ²⁰ Dino nkango vaYuda vavayingi avadivarura mukondashi kulivhango lino vamu pamparelire Yesus kwakalire pepi naShitata. Dino nkango kwaditjangire muliraka lya Ruhebeli, naRulatini, naRuGereka. ²¹ VaPristeli vavanene vava Yuda avatantere Pilatusi ashi, ''Kapishi ghutjange ashi, 'Hompa wava Yuda, 'Tyanga ashi, 'Mwene aghambiro ashi, ''Ame Hompa wavaYuda.'''' ²² Pilatus alimburura ashi, ''Ovi natjanga navi tjanga makura.'' ²³ Opo vamanine kumu pamparera Yesus, kushilivindakano, makura aghupu lirwakani lyendi, valikushakanene ntani nashikoverero shakuntji. Shikoverero kapi shakara namuhondyo, kwashihondyerera tupu nalikeshe limwe tupu. ²⁴ Vavo mpo vaghambire ashi, ''Kapishi tushitaghure, tushiruwanenu fungu-fungu tushi kushakane ashi are ogho ashi ghupopo.'' Vino kwashorokire mposhi litjangwa litikimo olyo lya tanto ashi, ''Vavo kwakushakanine vatavaghure lirwakani lyande ntani nakuruwana fungu-fungu shikoverero shande.'' Vino mbyo varuwanine vakavita. ²⁵ Kushilivindakano shaYesus kwayimanineko vawina Mariya Magdalena, munya vawina, ntani Mariya mukamali waKiliyopasi ntani Mariya Magdalena. ²⁶ Makura Yesus akankuka amono vawina navarongwa vendi ovo aholire vavo vana yimana papepi, makura atantere vawina ashi, ''Mukamali, kenga, monoye ndyegho!'' ²⁷ Ntani atantere nka murongwa wendi ashi, ''Kenga, ovo vanyoko!'' Kutunda mpopo murongwa makura atwara vawina kumundi wendi. ²⁸ Kutunda pano, opo ayivire Yesus ashi navintje vina tikimo makura aghamba ashi, ''Linota nakuyuvha.'' Mposhi matjangwa atikemo. ²⁹ Pakalire kandimbe omo yakalire vinyu yaghururu, makura avaghupu litarasi ghona valiture muvinyu yaghururu avalighupu mo valiture kushitondo shashire makura avashidamuna vature kukanwa kendi. ³⁰ Opo amakilire Yesus vinyu yaghururu, makura aghamba ashi, ''Vina tikimo.'' Anyongeke mutwe wendi, makura aghu tundumo munku. ³¹ Liyuva lino kwakalire lya kukuwapayikira, makura kapi vaholire ashi vimpu vikare pashilivindikano muliyuva lya Sabata (Sabata yino kwakalire yayinene), makura vaYuda avapura lipulitiro kwaPilatus ashi vatjore maghuru makura vaghupepo vimpu. ³² Makura vakavita avayendi vatjore maghuru ghamurume wakuhova naghu waghuviri ogho vapampalire kumwe naYesus. ³³ Opo vayatikire paYesus, avayamuwana ghuye ana fu kare, makura kapi vatjolire vifupa vyamaghuru ghendi. ³⁴ Ano ngoli, mukavita ghumwe atu lighonga pampati dendi, makura amutundu honde namema. ³⁵ Ogho amonino vino ghuye atapa ghumbangi, ashi ghumbangi wendi vyaghushili kwashoroka. Ghuye kwayiva ashi vino ana kughamba vyaghushili mposhi nanwe mukare nalipuro. ³⁶ Vino kwashorokire mpo ashi atikemo matjangwa ogho atanto ashi, ''Kwato shifupa nampili shimwe ngashi tjoko mo.'' ³⁷ Litjangwa limwe kwatanta ashi, ''ndyegho ngamumona vana mutomona.'' ³⁸ Kutundapo, Yosef waku Aremateya, ogho akaliro murongwa ghumwe waYesus (akalire naghoma nava Yuda), ayendi aka pure Pilatus ashi kuvhura tupu aka ghupepo shimpu shaYesus. Pilatus amupa lipulitiro. Yosef makura aya ghupupo shimpu shendi. ³⁹ Nikodemus naye ayatiki, oghunya ahoviro kuya kwaYesus matiku. Ghuye ayita mungwa wakuvhonga namaghadi, navinukita vyalidumba vyakutika pashiviha yamukumo lifere limwe. ⁴⁰ Makura avaghupu shimpu shaYesus avashidingi pamakeshe opa vatulire vinukita vyalidumba lyaliwa, kutwara mumpo yava Yuda yakuhoreka shimpu. ⁴¹ Oku vakamupampalire kushilivindakano kwakalire ko shikunino; mushikunino kwakaliremo ntoko yayipe oyo vapira kuvhumbika muntu rumwe. ⁴² Lino kwakalire liyuva lya kukuwapayikira vaYuda ntani ntoko oyo kwakalire papepi, makura avavhumbikimo rutu rwaYesus.