¹ Muliyuva lya kuhova mushivike, Mariya Magdalena kwamenekire kwako shimpe mundema ayende kuntoko makura akamona ashi liwe vana lighupuko kuntoko. ² Makura aka duka aka vyuke kwaSimon Petrus ntani namurongwa ghunyendi ogho aholire Yesus avatantere ashi, ''Hompa vana mughupumo muntoko, kapi tuna yiva ashi kuni vana kamutura. ³ Petrus namurongwa ghunyendi avashapuka, vayende kuntoko. ⁴ Vavo avaduka kumwe vayendeko, murongwa ghunyendi aduka ghunene ashuvu Petrus kunyima aka hove kukatika kuntoko. ⁵ Makura ayimana, amono makeshe ogho vamudingilire, ngoli kapi angenine mo munda. ⁶ Simon Petrus naye ayatiki amukwama ghuye aya ngene munda yantoko. Aka wana mo tupu makeshe ⁷ nashikoverero osho vadingire kumutwe wendi. shasho kapi shayakalire kumwe namakeshe, shasho kwakuhonya-honyine tupu papentja sho. ⁸ Makura murongwa ghunyendi, ogho ahoviro kuyatika kuntoko, naye akwamako angene munda, avimono makura apura. ⁹ Vavo shimpe kapi vakwatire lighano kumatjangwa ogho atanto ashi, nga vhumbukaq kughufe. ¹⁰ Varongwa makura avavyuka kukwavo. ¹¹ Ano ngoli Mariya kwayimanine pandye yantoko kuna kulira. Ghuye shimpe kuna kulira, makura akankuka amone muntoko. ¹² Makura amono vaEngeli vaviri vana shingiri, ghumwe kumutwe ntani ghumwe kumaghuru opo sharalire shimpu shendi. ¹³ Vavo avamupiura ashi, ''Mukamali, vinke ghuna kulilira?'' Ghuye avalimburura ashi, ''Mukondashi vana twara Hompa wande, kapi nayiva ashi kuni nko oko vana kamutura.'' ¹⁴ Opo amanine kughamba vino, makura apiruka kunyima makura amono Yesus anayimana po ano ngoli kapi amudimburulire ashi ndye Yesus. ¹⁵ Yesus amupura ashi, ''Mukamali, vinke ghuna kulilira? Are oghu ghuna kushana?'' Ghuye kwamughayalire ashi mwenya shikunino, makura amutantere ashi, ''Mukafumu, nkene shi ove ghuna mughupomo, ghamba ashi kuni ghuna kamutura, nukamu shimbeko.'' ¹⁶ Yesus amutantere ashi, '' Mariya.'' Ghuye apiruka makura aghamba muRuhebeli ashi,'' Raboni'' (kutanta ashi ''Murongi). ¹⁷ Yesus amutantere ashi, ''Kapishi ghunkwate, shimpe kapi narondo kuvavava, yenda kwava vande ghukava tantere ashi ame nganu ronda kuva vavava nanwe shenu, kwaKarunga wande naKarunga wenu.'' ¹⁸ Mariya Magdalena ayendi akatantere varongwa vendi ashi, "Ame namumomo Hompa,'' ndye ana ntjantero dino nkango. ¹⁹ Ngurova liyuva kuliyuva ndyolyo, lyakuhova mushivike, mavero naghantje vana ghaghara omo vapongire varongwa vendi morwa kwatjilire vaYuda, Yesus aya ayimana mukatji kavo avatantere ashi,'' mpora yikare nanwe.'' ²⁰ Opo amanine kughamba vino, makura avanegheda vikandeko vyamunda yamaghoko ghendi. Varongwa avakara naruhafo pakumona Hompa. ²¹ Yesus avatantere shimpe ashi,'' Mpora yikare nanwe. Yira momu vantuma me Vavava, name mo ngoli nakumutuma.'' ²² Makura Yesus tupu ngoli amana kughamba vino, makura avasheterere munku avatantere ashi,'' Tamburenu mpepo yakupongoka. ²³ Ntjene ngamudongwenenapo vantu ndyo davo, ngadi dongonokapo, ano ntjene ngamudi shuvapo ndyo davantu papavo, ngadi kara papavo.'' ²⁴ Tomasi, ghumwe wavo vamurongo navavili, kava twenyanga ashi Didimasi, kapi akalire navo opo ayire Yesus. ²⁵ Varongwa vaunyendi kunyima avaghamba kukwendi, ''Tuna mumono Hompa.'' Aghamba kwavo, ''Nkwandi numone vito mumawoko ghendi vyamboha, nakuturamo nyara dande muvito vyamboha, ntani nuture mawoko ghande kuruha rwendi, ndi kapi nipura.'' ²⁶ Muruku rwamayuva matano namatatu varongwa kwakalire nka kumwe munda, ntani Tomasi kwakwalire kumwe navo. Yesus aya ngene shirogho sho ghagho mavero akaha kuharere, ayayimana mukatji kavo, nakughamba, ''Mpora kukwenu.'' ²⁷ makura aghamba kwaTomasi, ''Kwata nanyara doye ghukenge mawoko ghande. ghonyonona mawoko ghoye nakukwata muvito. Washa dira kupura, nani pura.'' ²⁸ Tomasi alimburura nakughamba kwendi, ''Hompa wande ntani Karunga wande.'' ²⁹ Yesus aghamba kwendi, ''Mukonda ghuna mono, mbyo ghunapura. Vatungikwa mbovo vadiro kuvimona, ngoli vapura.'' ³⁰ shirugho ntjosho Yesus aruwanine vitetu kumegho yavarongwa, vitetu ovyo vadira kutjanga mumbapira yino, ³¹ ngoli vino vatjanga mposhi mupure ashi Yesus ndye Kristus, Mona Karunga, ntani nka mupure, ngamuwane liparu mulidina lyendi.