¹ Opo amanine kughamba Yesus dino nkango, arupuka kumwe navarongwa vendi vayende musheli munya yamuramba waKidironi, mwamo kwakaliremo shipata omo aka kalire navarongwa vendi. ² Ano ngoli Yudas, ogho akamutuliro muliyome, naye ayiva lino livango, mukondashi rwarungi nko kaponganga navarongwa vendi. ³ Makura Yudas, apititiri mbunga yavakavita navaporosi vava kareli vavapristeli nava Falisayi, makura avayendi navitwedito, naramba ntani navikwata. ⁴ Yesus, ayivire kare navintje ovyo ngavi shoroko kukwendi, makura ayendi kukwavo avapura ashi,'' Are ogho muna kushana?'' ⁵ Vavo avamulimburura ashi,'' Yesus wamuNasareti.'' Yesus avatantere ashi,'' Ame ghuno.'' Yudas, ogho amutuliro muliyome, ghuye naye kwayimanine kumwe nava kavita. ⁶ Opo avatantelire ashi,'' Ame ghuno,'' vavo avavyuka muruku kumwe nakukugandera palivhu kagali. ⁷ Shimpe nka ghuye avapura ashi,'' Are ogho muna kushana?'' Vavo shimpe avalimburura ashi,'' Yesus wamu Nasareti,'' ⁸ Yesus alimburura ashi,'' Namutantere kare ashi ame ghuno. Ntjeneshi ame muna kushana, vashuvenu ovo vakayende.'' ⁹ Vino kwashorokire mpo ashi matjangwa atikemo ogho atanto ashi; '' Pavo watapa kukwande, kapi pakombana nampili ghumwe.'' ¹⁰ Simon Petrus, ogho akaliro narufuro, arupweyamo, akamuna nakutetako litwi lyakurulyo lyamukareli wavaPristeli vavanene. Lidina lyendi ndye Malikus. ¹¹ Yesus atantere Petrus ashi,'' Vyutiramo rufuro roye mushiraro. Ove kapi ghuna horo ninwe kunkinda oyo vana tapa Vavava kwande ndi?'' ¹² Mbunga yavakavita namupititeli wavo, nava porosi vavaYuda, makura avamukwata Yesus kumwe nakumu manga. ¹³ Pamuhovo avamutwara kwaAnasi, ghuye kwakalire tamweyi yaKayifasa, ogho akaliro muPristeli wamunene mumwaka ogho. ¹⁴ Kayifasa ndye ghunya atapiro maghano kuvaYuda ashi, hashako tupu ntjene muntu ghumwe afere vantu navantje. ¹⁵ Simon Petrus namurongwa ghunyendi, avakwama Yesus. oghunya murongwa vakuyivire namuPristeli wamunene, mbyo angenine kumwe naYesus mundyugho yamuPristeli wamunene; ¹⁶ Ano ngoli Petrus kwayimanine pandye yalivero. Ghuno murongwa ghunyendi, ogho akuyiviro namuPristeli wamunene, arupuka aka ghambe namukungi wapalivero angeneke Petrus aye munda. ¹⁷ Ghuno muruwani wamukadona, mukungi livero, apura Petrus ashi,'' Nane kapishi ove ghumwe wavarongwa vaghuno mukafumu?'' Petrus, alimburura ashi,'' Hawe,kapishi me.'' ¹⁸ Vakareli navaporosi navo mpo vakalire, makura ghava hwameke makara ghamundiro, morwa kufu, makura avayimanako vakukangumune. Petrus naye mpo akalire, kwayimanineko akukangumune. ¹⁹ Mupristeli wamunene makura apura Yesus vyakuhamena kuvarongwa vendi ntani namarongo ghendi. ²⁰ Yesus amulimburura ashi,'' Ame kani yuvitiranga Udyuni naghuntje. Ame kehe pano kani tapanga marongo muSinagoge namuNtembeli omo kava ponganga vaYuda navantje. Ame kapi kani ghambanga vyamukahore-hore. ²¹ Vinke unakumpulira me? Pura ovo vayuvho nkango odo kani yuvhitanga. Monashi, vano vantu vayiva ovyo kanu ghambanga.'' ²² Opo amanine kughamba Yesus vino,muporosi ghumwe ayimanino pepi akapura mwaYesus kumwe nakughamba ashi,'' mo ngoli valimbururanga muPristeli wamunene?'' ²³ Yesus amu limburura ashi,'' Ntjeneshi lipuko naghamba, kutwenya tupu olyo lipuko, ano ngoli ntjeneshi ghuhunga, vinke ghuna ntoghonene?'' ²⁴ Makura Anasi amutumu kwaKayifasi muPristeli wamunene, ghuye mumango. ²⁵ Simon Petrus ghuye shimpe nda ayimanena akukangumune. Makura vantu avamupura ashi,'' Vyaghushili, ove kapishi ghumwe wavarongwa vendi?'' Ghuye akanana kumwe nakughamba ashi,'' Hawe, kapishi me.'' ²⁶ Mukareli ghumwe wamuPristeli wamunene, likoro lyaghu akatetire Petrus litwi, aghamba ashi,'' Nane kapishi ove nakamona mushikunino naye?'' ²⁷ Petrus akanana nka shimpe; makura mpopo shikondomboro ashi yiyi. ²⁸ Makura vavo avaghupu Yesus atunde kwaKayifasi vamutware kunkurumbara yalipangero. Vino kwashorokire ngura-ngura yayinene, ano ngoli vavo kapi vangeninemo mumberewa dadinene dalipangero mukonda yashidira mposhi vawape kulya shilika shaPaska. ²⁹ Pilatus makura arupuka kukwavo avapura ashi,'' Ghundyoni munke muna kumupangulira ghuno mukafumu?'' ³⁰ Vavo avalimburura nakughamba ashi,'' Ghuno mukafumu ashi ndi kundereko ghundyoni, ndi kapi tuna muyita ko kukoye.'' ³¹ Pilatus aghamba ashi,'' Mughupenu naghumwenu, mukamupangure kutwara muveta denu.'' VaYuda avamulimburura ashi,'' Atwe kapi vatupa veta yakudipagha muntu.'' ³² Vavo kwaghambire vino mposhi nkango daYesus ditikemo aneghede ashi mfa daweni ngavhura kufa. ³³ Makura Pilatus avyukamo nka muHofa shimpe kumwe nakuyita Yesus amupura ashi,'' Ove Hompa wavaYuda ndi?'' ³⁴ Yesus alimburura ashi,'' Vyana ghumoye ghuna kughamba, ndi walye vantu vapeke vana ghambo kukoye vyakuhamena kukwande?'' ³⁵ Pilatus alimburura ashi,'' Ame kapishi numuYuda, ndi name? Muhoko ghoye wavaYuda navaPristeli vavanene mbo vana kuyito kukwande. Vinke waruwana?'' ³⁶ Yesus alimburura ashi,'' Ghu Hompa wande kapishi wamuno mughudjuni. Ashi ndi ghu Hompa wande wamuno mughudjuni, Vakareli vande ndi kuvarwa mposhi nupire kuyenda mumaghoko ghavaYuda. Ano weno ghu Hompa kapishi wamuno mughudjuni.'' ³⁷ Pilatus amupura ashi,'' Ove nane shili ghu Hompa?'' Yesus alimburura ashi,'' Ove ghuna kughambo ashi ame Hompa. Ntjo shitambo vantjampurukira, niye muno mughudjuni, mposhi nganuya tape ghumbangi wakuhamena ghushili. Kehe ghuno ahameno kughushili ngategherera kuliywi lyande.'' ³⁸ Pilatus amupura ashi,'' Ghushlili ne vinke?'' kwaghamba tupu vino, makura arupuka ayende kuvaYuda avatantere ashi,'' Kapi nawana mo Undyoni mwaghuno mukafumu. ³⁹ Anwe mwakara nampo oyo yakaro ashi kumangurura nkwate ghumwe tupu arupuke muliyuva lyaPaska. Anwe kuna shana numangurure Hompa wavaYuda arupuke ndi?'' ⁴⁰ Navantje avayoghomoka kumwe nakughamba ashi,'' Hawe kapishi ndyewo mukafumu, nane ngoli Barnabas.'' Ngoli Barnabas kwakalire murunde.