¹ Muliyoko Kristusi atutura tukare twayoghoka. Karenu munapama, mposhi, ntani nka kapishi vamuture munda yajoko yaghupika. ² Monenu, Ame, Paurusa, nakughamba kukwenu ashi nange mukutape ghumwenu vamuruwane vyavamba, Kristusi kapi ngamuwana mukehe ndjira. ³ Ame nakughamba nka kukwenu ashi kehe uno mukafumu ngava ruwana vyavamba ovyo ngavikara viruwana vyendi mukukwama Veta nayintje. ⁴ Anwe vamughupako kwaKristusi, anwe vamupangura kare kutwara muVeta; kapi nka ngamuwana ghuyerere. ⁵ Mumpepo, pa lipuliro, atwe tunakara naghudami mukutaterera lihuguvaro lya ghuhungami. ⁶ MwaKristusi Jesusi vikare ashi vyavamba ndi kapishi vyavamba kutanta vintu, ngoli alihuru lipuro pentjalyo lya kuvura kukona-kona shihoro. ⁷ Mwadukire mughuwa. Are amushwenikiro mukukwama ushiri? ⁸ Likorangedo lino kapi lya tunda kogho amuyito! ⁹ Vifulito vyavididi kurenkita mburumera yifure. ¹⁰ Ame nakara naghupampi mwaHompa ashi kapi mukara namashinganyeko peke. Ogho ana kumusheteko ngafuta mfuto yapaghumwene, akare ashi ndi re ndi re. ¹¹ Vaunyande, nangeshi Ame shimpe kunakuyuvita vyavamba, mukonda munke nikarera ashi shimpe mumahepeko? Mundjira yinya vikupunduro vyashilivindakano vavihupamo. ¹² Yira mbovo tupu vanakumupo masheteko, Ame nashana ashi ndi vakutuke vavene! ¹³ Anwe vamuyita kughumanguruki, vaunyande. Ngoli kapishi muruwanite ghumanguruki wenu ghukare ashi ghukaro wandjo; nani, mushihoro kuvatere vaterenu. ¹⁴ Veta nadintje vadi vyukilita muVeta yimwe tupu: '' Wakona kuhora mukamaparambo ghoye yira moomo wakuhora naghumoye.'' ¹⁵ Mara ntjene mukushume nakukudjonaura umwenu, kengerenu ashi kapishi mukumanepo naumwenu. ¹⁶ Ngoli natanta ashi, yendenu mumpepo ntani kapishi mushimbe lirwameno lya undjoni wapaghuntu. ¹⁷ Lirwameno lya undjoni wapaghuntu kukananita mpempo, ntani lirwameno lya mpepo kukananitapo undjoni wapaghuntu. Kovyo vyakara mulikurwanito pa vyene, mposhi kapishi ghuruwane vininke ovyo ghunahoro. ¹⁸ Ngoli nangeshi kukupititira mpepo, ove kapishi munda yaVeta nka. ¹⁹ Viruwana vyaundjoni wapashina-ghuntu vyakushororora: vininke vyarushonda, vyakunyata, kudira kuwana ruhafo, ²⁰ kukarera vintjwa-ntjwo, upure, ugaragara, kukananita, mfudu, kukunenepita mughugara, kukunenepita muviruwana, kukananita mukuruwanita vininke, makutavaghano, ²¹ kudovaghukira, unkorwiri, ruhofo rwamughunkorwi, ntani vimwe ngoli. Nakumurondora, yira moomo namurondorwire pamuhovo, ashi kehe uno ngaruwano vininke yira mbyovyo kapi ngakapinga ghuntungi waKarunga. ²² Ngoli nyango yampepo ne shihoro, ruhafo, mpora, lididimiko, kumwena, uwawa, lipuro, ²³ kufughura, ntani kukuvyukita ghumoye; kughupako ovyo kwato nka Veta. ²⁴ Kovo vahameno mwaKristusi Jesusi vavhumbika ukaro wandjo na shihoro ntani naghudami shima. ²⁵ Ntjeneshi atwe twaparuka pa mpepo, renkenu ngoli tuyende nka pa mpepo. ²⁶ Kapishi tukare vashinganyiki, mukusharaghura vaunyetu, kuyuvira mfudu vaunyetu.