¹ Ame kunakughamba ashi mukareli, nange tupu ashi ghuye ashi mwanuke, kapi pakara likushuvo namupika, nampiri ngoli ghuye ashi mwenya viweka navintje. ² Mara ghuye munda yamukengeli ntani lihuguvaro dogoro shirugho vaturapo vashe. ³ Ntani, apa twakalire tuvanuke, twakalire munda yamapangeli ghaUdjuni ghuno. ⁴ Mara apa shatikirepo shirugho shakugwanenenapo, Karunga a tumu Monendi, ashampurukire mukamali, kwamushampurukire munda yaVeta. ⁵ Kwaruwanine vino mukupopera kovo vakaliro munda yaVeta, mposhi tuwane lishampurukiro yira vana vavakafumu. ⁶ Mukondashi anwe vana vavakafumu, Karunga kwatuma mudimushima detu mpepo yaMonendi, oghu atuyito atwe, " Aba, Shetu.'' ⁷ Mpo ngoli ashi kapishi vapika nka nwe, nani vana vavakafumu, ntani ngangeshi vana vavakafumu, makura nanwe vahameni mwaKarunga. ⁸ Ngoli pashirugho shinya, mwadilire kuyiva Karunga, mwakalire vapika kwavo, kutwara mughukaro wavo pankondo, mara kapishi Karunga naruntje. ⁹ Mara shirugho shino munayiva Karunga, ndi po ashi Karunga anamuyiva, weni weni omu muvura kuvyuka kughupira nkondo ntani kudere mulyo ghamapangero ghano? Ndi muna shana mukare mughupika nka waro? ¹⁰ Mwamonine mayuva ntani kakwedi kakape ntani vivaka ntani na mwaka! ¹¹ Ame nakara naghoma kukwenu ashi pamweya virughana vyande nanwe kuvura vikare vyangosho tupu. ¹² Namukanderere, vaunyande, karenu yira ame, yira moomo nakara yira anwe. Kapi mwanduwana vyavidona. ¹³ Ngoli mwayiva ashi mukonda yaghu vera wapaghuntu mbyo nayuvitire mbudi yayiwa kuntamekero. ¹⁴ nampiri ngoli likuyuvo lyande lya paghuntu lya mutulire anwe mulisheteko, ngoli kapi mwantjentjire nakudira kuntambura me. Nani ngoli mwantambulire yira nimu Engeli waKarunga, yira Ame Kristusi Jesusi naumwendi. ¹⁵ Kuni linakara litungiko lyenu? Ame namutantilire, nangeshi kuvura vipulitire, ndi mwadokoliremo mentjo ghenu ntani kughatapa kukwande. ¹⁶ Ndi ashi, nakara munankore wenu mukonda yakumutantera ghushiri? ¹⁷ Mpovili vitambo vimwe vyakumukonapo anwe, ngoli kapishi vyamulyo. Vanahoro vamumwenikide mposhi mukarere vitambo vyavo. ¹⁸ Ngoli uwa naruntje mukukara mushitambo shamulyo, nani kapishi dogoro mulikaro po lyande nanwe. ¹⁹ Vanavande vavadidi, Ame nka shimpe mukukora kwalishampuruko lyamwanuke kukwenu dogoro Kristusi vamutunge mumwenu. ²⁰ Nakughayara ashi ndi kumwe nakara nanwe weno na kutjindja liywi lyande, mukonda ashi Ame kapi nakara namaghayadaro ghakughamena kukwenu. ²¹ Ntanterenu, nanwe munakara nalikuyuvo ashi munashana kukara munda yaVeta, kapi mwateghereranga ku Veta? ²² Vyatjangwa ashi Abraham kwakalire nava vavakafumu vavili, umwe kwamushampurukire mukamali wamupika ntani umwe kapishi wamupika. ²³ Umwe kwamushampurukire wamupika kutwara paghuntu, ngoli umwe kwamushampurukire kapishi wamupika kutwara mumatwenyidiro. ²⁴ Vininke vino kuvura kuvishingonona ashi vishorokwa, kuvakamali vano kwakalilirepo magwanikilito maviri. Umwe wavo kutunda kundundu yaSinai ntani ashampuruka mwanuke wamughupika. Oghu ndje Hagara. ²⁵ Weno Hagara kunakarerepo ndundu yaSinai mu Arabiya; ntani ghuye kuna karerepo Jerusalemu yayipe, mbyovyoshi ghuye mughupika namonendi. ²⁶ Ngoli Jerusalemu yakaro pawiru shashutuka, ntani ghuye ndje nyokwetu. ²⁷ Vyatjangwa, '' Hafenu, anwe vangandje mwadirango kuyita; lirenu unene na kuyiyira muruhafo, anwe munakudiro kupita mushiponga shatjutju yakushampuruka mwanuke; mukondashi vanuke ovo vakomberera vanyokwavo vayingi unene kushetakana novo vakamali vanakaro navavyavo.'' ²⁸ Ngoli anwe, vaunyande, yira Isaka, vanuke vamatwenyidiro. ²⁹ Pashirugho shinya ogho vashampuruka kutwara paghuntu kuhepeka ogho vashampuruka kutwara pa mpepo. Nampiri weno kuna kushoroka. ³⁰ Ngoli vinke lina kughamba litjangwa? '' Tumenu vakadona vamughupika ntani navamati. mposhi vana vavamati vakuyita vakadona vamughupika kapi ngava kugawinina mukupinga na vana vavakafumu ovo vashampuruka vakamali vadiro mughupika.'' ³¹ Nane ngoli, vaunyande atwe kapishi vanuke vamughupika wavakadona, ngoli vakamali vadiro kukara mughupika.