¹ Mpo ngoli ashi karenu vahoneni vaKarunga, yira vanuke vakuhora. ² Ntani karenu mushihoro, yira momu Kristus atuholire atwe ntani akutapire mwene mukonda yetu, yira shitapa sharupekwa ntani ndjambo kwaKarunga. ³ Ene ngoli kapi panakona kukara kehe lihamba mukatji kenu lyakukara panyama ndi kehe rudi rwalinyateko ndi makurulya, mbyo vyoshi vino kapi vyahungama kuvantu vakupongoka vaKarunga. ⁴ Papire kukara ghudona kehe ghuno, papire vimbokaghuka vyaghuvaya, ntani kwato dimuteghu dadidona nadintje odo dapiro kuwapa. Nani ngoli pakare ghutapi wampandu. ⁵ Anwe mwaviyiva ntani mwavikwata ashi kudereko likaro panyama, linyato, ndi murwana wamakurulya-ndi ashi, mukareli mafano-akaro nakehe ghupingwa mughuntungi waKristus ntani Karunga. ⁶ Mwashapulitira kehe ghuno amupukite anwe nankango damawoko-woko, mukonda yavininke vino ghugara waKarunga kuna kuya pavana vakupira kulimburukwa. ⁷ Mpo ngoli, mwasha kupakerera kumwe navo. ⁸ Anwe kwakalire nka mumundema, ene weno mukara ngoli shite mwaHompa. Yendenu yira vana vashite ⁹ (muviyimwa vyashite kwakaramo ghuwa naghuntje, ghuhungami, ntani ghushili), ¹⁰ ntani kukushonga ovyo vyahafitango Hompa. ¹¹ Nakukaraghurashi navo vapiro viyimwa muviruwana vyamundema, nani ngoli varupwitenu. ¹² Vyavyo ntjoni nampili mukuvitwenya vininke ovyo varughananga mulihoramo. ¹³ Ene ngoli nange vininke ngavavihorore nashite, vyavyo kukara paghukenu. ¹⁴ Kehe vino vyakarango paghukenu ne shite. Mpo ngoli vyaghambera, ''Rambukenu, rambukenu anwe vakurara, ntani rambukenu kumfa, ntani Kristus ngatemana penu.'' ¹⁵ Kenga nawa weni wayendanga-kapishi yira mupirindunge nani ngoli yira wandunge. ¹⁶ Yovora ruvede mukondashi mayuva madona. ¹⁷ Mpo ngoli, nakukarashi ghuvaya, anongoli yuvenuko ovyo amushanena Hompa. ¹⁸ Ntani nakukorwashi vinyu, mbyovyoshi vyavyo kutwaredera kughukarodona. Nani ngoli, yudenu nampepo mupongoki, ¹⁹ mukughamba kwanaghumwenu mumapisarome ntani muntjumo ntani nantjumo dapampepo, kuyimba nakurenkita liywi kwaHompa namushima naghuntje, ²⁰ kehe pano kutapa mpandu munavntje, mulidina lya Hompa wetu Yesus Kristus kwaKarunga SHE, ²¹ mukukupakerera kumwe mukufumadeka Kristus. ²² Vagholikadi, kutapenu kuvanturaghumbo venu, yira kwaHompa. ²³ Mbyovyo shi nturaghumbo mutwe wamukamali yira momu tupu ashi Kristus waro ndye mutwe waNkirishe, ghuye mwene muyogholi warutu. ²⁴ Ene ngoli yira momo Nkirishe vayipakerera kwaKristus, mo waro vagholikadi kuvanturaghumbo vavo munavintje. ²⁵ Vanturaghumbo, horenu vakamali venu, yira momo Kristus aholire nkirishe ntani akutapire mwene. ²⁶ mukonda yayo mpo ashi ghuye kuvura kuyipongora, mukukara mulikushuro lyendi, mulikushuro lya mema nankango, ²⁷ mpo ashi ghuye ngavure kunegheda nkirishe kwamwene yira ghuyerere, pahana kavadi ndi ntighe ndi kehe shininke, nana ngoli ghupongoki ntani pahana ghudona. ²⁸ Mundyira yakukufana vanturaghumbo mwahepa kuhora vagholikadi vavo yira marutu ghavavene. Ghuye ogho ahoro mukamali wendi kwakuhora mwene. ²⁹ Mbyovyoshi kundereko ogho anyengo rutu rwamwene, nani kuruwapeka ntani nakurupakera mbiri, yira momo Kristus awapekanga nakutekura nkirishe naghuhaya, ³⁰ mukonda atwe maruha gharutu rwendi. ³¹ ''Mukondashi yavino mukafumu nga shuva vashe navawina ntani ngakupakerera namukamali wendi, ntani mughuviri wavo ngavakara rutu rumwe.'' ³² Ghushiri walihoramo ghuno ghunene-anongoli Ame kuna kughamba vyakuhamena Kristus ntani nkirishe. ³³ Nampili ngoweno, kehe ghuno wenu waro anakona kuhora mukamali wendi yira mwene, ntani mukamali anahepa kufumadeka vyendi.