¹ Vanuke, limburukwenu vakurona venu mwaHompa, evino viwa. ² ''Fumadeka Vasho naVanyoko''(ogho wakaro muragho wakutanga nalitwenyediro), ³ ''mpo ashi vyavyo ngavikare nawa kumwe nanwe ntani anwe ngamuparuke kumwe palivhu.'' ⁴ Vasha, nakusharaghurashi vana venu kughugara. Nani ngoli, varerenu mughukaro waghuwa ntani mumanangwiro ghaHompa. ⁵ Vapika, limburukwenu kuvampititi kutwara nalifumadeko dami ntani naghukankami, mughushiri wamushima denu. Karenu valimburukwi kukwavo yira momo mwavuranga kukara ghulimburukwi kwaKristus. ⁶ Limburukwenu kapishi nange vampititi kuna kumukengera, mpo ashi muvahafite vavo. Nani ngoli, limburukwenu Karunga kudimushima denu. ⁷ Fumadekenu nadimushima denu nadintje, yira Hompa munakukarera kapishi vantu, ⁸ mukonda ashi atwe twaviyiva kwakehe viruwana vyaviwa aruwananga muntu pamundinda, ghuye ngawana mfuto kwaHompa, vikareshi mupika ndi mumanguruki. ⁹ Vampititi, tekurenu vapika venu mundyira yakukushetakana. Nakuvayoronganashi. Anwe mwaviyiva ashi ghuye ogho mughuviri wavo mpititi ntani wenu kwakara muliwiru, ntani panderepo makugaghunuko kumwe naye. ¹⁰ Pakumanita, nkondopenu mwaHompa ntani namughunankondo waghunankondo wendi. ¹¹ Turenuko virwita navintje vyaKarunga, mpo ashi ngamuvure kuyimana mukukandana maghano sheteko ghamudyonaghuli. ¹² Vikambadara vyetu kapishi kwarwanitanga nyama nahonde, nani ngoli kwarwanitanga vapangeli, kwarwanitanga vana veta, kwarwanitanga ghunankondo wapampepo waghudona mumavango ghamuliwiru. ¹³ Mpo ngoli turenuko virwita navintje vyaKarunga, mpo ashio ngamuvure kuyimana mumayuva ghamadona, ntani muruku anwe nange munamana navintje, ngamuyimane ndyikiti. ¹⁴ Yimanenu ngoli ndyikiti, naruvyarwaghushili vamangerera mumbunda denu, ntani nakukara mukuturako vikukandulito panturo vyaghuhungami, ¹⁵ ntani, nampadi denu vanamanga namakuwapayikiro ogho ghatundilirango kumbudi yayiwa yampora. ¹⁶ Muvishorokwa navintje ghupenu shikukandulito shalipuro, osho anwe ngamuvura kufunditako ngumba damaraka ghavadona vamwe. ¹⁷ Ntani ghupenu ligcoko lyaliyohoko ntani rufuro rwaMpepo, nkango daKarunga. ¹⁸ Nakehe ndapero ntani lishungido, rapererangenu kehe shirugho muMpepo. Dogoro kughuhura ghuno, kehe pano kengerangenu naghudidimiki naghntje nange kuna kutapa ndapero davantu vakupongoka vaKarunga. ¹⁹ Ntani ndapererenuko name, mpo ashi mbudi vayitape kukwande nange Ame anigharura kanwa kande. Rapererenu ashi Ame nganivure kurenkita ghuyivi nalikuturomo ghushiri walihoramo kuhamena mbudi yayiwa. ²⁰ Mukonda yambudi yayiwa mbyo Ame nayakarere mukarelipo ogho vatulika mumaghuketanga, mpo ashi nganivure kanangura nalikuturomo, yira momo Ame vyawapera kuvighamba. ²¹ Titikusi, ghunyetu wakuhora ntani mukareli walipuro lyakuyulilira mwaHompa, ngamutantera navintje, mpo ashi anwe ngamuyive ashi ame weni nina karere. ²² Ame nina mutumu kukwenu nakonda ndyoyo, mpo ashi ngamuyayive omo tunakarere atwe, natni mpo ashi ngayavure kukorangeda dimushima denu. ²³ Mpora yikare kuvaghunyetu vavakafumu, ntani shihoro nalipuro lyakwa Karunga she ntani Hompa Yesus Kristus. ²⁴ Ghufenkenda ghukare kuna vantje ovo vahoro Hompa Yesus Kristus nashihoro shakupira kudyonauka.