¹ Ame, mpo ngoli, yira nkwate yaHompa, kuna kumukorangeda anwe muyende nawa muliyito olyo vamukuwilire anwe. ² Ame kuna kumukorangeda anwe muparuke naghuntu waghunene ntani lifumadeko ntani ghudidimiki, mukukara kumwe mushihoro. ³ Rughanenu mpopo mwahulira mukutulika ghukumwe waMpepo mulikwatakano lya mpora. ⁴ Pakara rutu rumwe ntani mpepo yimwe, yira momo tupu nanwe vamuyitire waro mulihuguvaro limwe lyaliyito lyenu. ⁵ Ntani pakara Hompa ghumwe, lipuro limwe, liyoghoko limwe, ntani Karunga ghumwe ⁶ ntani ghumwe Karunga, shawanavantje, ogho akaro pawiru yanavantje ntani kupitira mwanavintje ntani mwanavintje. ⁷ Kwakehe ghumwe wetu ghufenkenda kwaghutapa kutwara kulishetakanito lyaghushwi waKristus. ⁸ Vyavyo yira momo tupu ghaghamba matjangwa: ''Opo arondire kuwiru, ghuye kwapititilire nkwate mumango, ntani ghuye kwatapire maghushwi kuvantu.'' ⁹ Vinke vyatantanga ''Ghuye kwarondire, '' kughupako ashi ghuye kwadumpukire waro mudimudingonoko mukunda dapalivhu lyaghudyuni? ¹⁰ Ghuye ogho adumpukiro ndye wakufana muntu ogho waro arondiro ghure kuntunda yamawiru naghantje, ashi ghuye ngavure kuyuda vininke navintje. ¹¹ Kristus kwatapire vamwe vakare vaApostoli, vamwe vaEvangeliste, ntani vamwe vaPastore ntani vaShongi. ¹² Ghuye kwatapire ghano mamberegho mukuwapeka vantu vakupongoka vaKarunga kuviruwana vyaghukareli, mukutungitako rutu rwaKristus. ¹³ Ghuye kutwikira kutunga rutu rwendi dogoro atwe natuvantje ngatukatike kughukumwe walipuro ntani nandunge daMona Karunga. Ntani ashi atwe ngatukare tunakuru ntani mwangoweno ngatukawane litikiliromo lya mwaKristus. ¹⁴ Kristus kwatunganga atwe mpo ashi atwe ngatupire waro kukara vana ovo vapukitira muruku ntani kughuto namankumpi, varerumuna nakehe mpepo yamashongo ntani namakitayiko ghavantu muvighayaradona vyavo. ¹⁵ Mpo ngoli, kughamba ghushili mushihoro, atwe twahepa kukura mwakehe ndyira mumwendi ogho akaro mutwe ogho ndye Kristus. ¹⁶ Kristus kutunga rutu naruntje, ntani rwaro kwarugwanikilita ntani kwarupameka kumwe, ovyo kurenkita rutu rukure mpo ashi rukutunge rwene mushihoro. ¹⁷ Mpo ngoli, ame kuna kughamba ntani pamutininiko pavino mwaHompa mpo ashi anwe ngamupirenka kuyenda yira momo vayendanga vahedana mughupili ndunge wavo. ¹⁸ Vavo kwavashovaganeka mughuyivi wavo, kwavagaghununako kuliparu lya Karunga mukonda yalincenuno olyo lyakaro mumwavo, mukonda yaghudito wadimushima davo. ¹⁹ Vavo vayakara kundereko ntjoni ntani vavo kukuyombilita kehe rudi rwakupira kukena namakurulya. ²⁰ Ene ngoli kapishi ngoweno mwakushongire kuhamena Kristus. ²¹ Ame kuna kurayera ashi anwe mwayuva kuhamena kwendi, ntani vamushongire mumwendi, yira momo wakara ghushiri mwaYesus. ²² Anwe mwamushonga kushuturako ovyo vyahaminino kuliparu lyenu lyapamuntango ndye adyonaghuko mukonda yamadovodona. ²³ Anwe kwamushongire muku muwapukurura mumpepo yandunge denu, ²⁴ ntani mukuturako murwana wamupe ogho vaghungira mushishwi shaKarunga-mughuhungami waghushiri ntani ghupongoki. ²⁵ Mpo ngoli, shuvenu vimpepma, ntani kehe ghumwe wenu aghambe ghushiri namushinda wendi, mukonda atwe maruha navaghunyetu. ²⁶ Garapenu ntani nakudyonashi. Nakukengererashi liyuva litoke anwe mughugara. ²⁷ Nakutapashi mpito kwamudyonaghuli. ²⁸ Ghumwe ogho kavakango akona kushayeka kuvaka. Nani ngoli, ghuye ana kona kutjimpuka, kuruwana namahoko ghendi kwavi vyaviwa, mpo ashi ghuye ngavure kukara navintu ovyo ngavura kukutapera novo vakaro mumpumbwe yaruhepo. ²⁹ Nakupulitirashi kehe nkangodona yirupuke mutunwa twenu. Rughanitenu tupu nkango dadiwa mukutungitako ovo vadishano, mpo ashi nkango denu ngadi tape ghufenkenda kuvateghereli. ³⁰ Ntani nakushentjashi mpepo mupongoki yaKarunga, mbyovyo mumwendi mo vamuyudilire muliyuva lya liyoghoro. ³¹ Tulirenu ntere nyengo, mfudu, ghugara, dimutangu, ntani mashwaghuro, kumwe nakeh ghudona. ³² Kuferaferenu nkenda, nadimushima dami, kukughupiraghupirapo, yira momo Karunga mwaKristus amughupirapo.