¹ Mukonda yavino Ame, Paulus, nkwate yaKristus Yesus yenu anwe vahedana. ² Ame kuna kughayarera ashi anwe mwayuva lihoroworo lya kuruwanena ghufenkenda waKarunga. ogho vatapire kukwande mukonda yenu. ³ Ame kuna kutjanga kutwara mulimoneko varenkitire liyivikwe kukwande. ⁴ lino lihorameno lya ghushiri kuhamena ovyo namukaminine pakumutjangera anwe. Nange anwe amuvarura kuhamena vino, anwe ngamuvura kuyuva vimoneka vyande mwaghuno ghushiri walihoramo kuhamena Kristus. ⁵ Mumaruvaro ghamwe ghamwe ghushiri ghuno kapi vaghurenkitire ghuyivikwe kuvana vavantu. Ene ngoli weno vaghushorora naMpepo kuva Apostoli vakupongoka ntani vaporofete. ⁶ Ghushiri wakuhorama ghuno vahedana vanakaro ngoli ghukwawo nava vakuhupako, ntani namaruha gharutu, ntani vavo kukugawainina litwenyediro mwaKristus Yesus kupitira mumbudi yayiwa. ⁷ Ame kwayakalire mukareli wayino mbudi yayiwa mughushwi waghufenkenda waKarunga vatapire kukwande kupitira muviruwana vyaghunankondo wendi. ⁸ Kukwande-nampili ngoli ame wamudidipo munavantje vantu vakupongoka vaKarunga-ghufenkenda ghuno vaghutapire, mukuyuvita kuvahedana maghungawo ghakupira kuwaneka ghaKristusi, ⁹ Ntani mukuyita kushite kwakehe ghuno liwapayiko-vitetukito vyahoramo mamwaka mwaKarunga, ogho ashitiro vininke navintje. ¹⁰ Liwapayiko lino kwalirenkitire liyivikwe kupitira munkirishe mpo ashi vapangeli ntani vanaveta vamumavango ghamu liwiru ngavavure kuya ngavayive vininke vyavingi paghuntjitwe waghukonentu ogho waKarunga. ¹¹ Vino kwashorokire kutwara kumawapayiko ghanaruntje ogho atikitiromo mwaKristus Yesus Hompa wetu. ¹² MwaKristus atwe twakara naghunankondo nampito nalikuturomo mukonda yalipuro lyenu mumwendi. ¹³ Mpo ngoli Ame kuna kumupura kapishi muvyuke muruku mukonda yamaghudito ghande mwarwenu, ogho ghanakaro ghuyerere wenu. ¹⁴ Mukonda yavino Ame kuna kutwa ngoro dande kwaSHE, ¹⁵ kogho kehe liro lya muliwiru ntani napalivu vatwenya. ¹⁶ Ame kuraperera ashi ghuye ngavura kumuyambeka anwe, kutwara kumaghugavaro ghaghuyerere wendi, ngava ghunkondopeke naghunankondo kupitira muMpepo yendi, ogho akaromunda yaghuntu wenu. ¹⁷ Ame kuraperera ashi Kristus avhure kutunga mudimushima denu kupitira mulipuro, nandandanidenu ntanbi litateko mushihoro shendi, ¹⁸ mpo ashi anwe ngamuvure kuyuvako, kumwe navantu vakupongoka vaKarunga, vininke ghure, muntere, mutika, ntani ghudami, ¹⁹ ntani mukuyiva shihoro shaKristus, osho shayendo kupitakana ndunge, mpo ashi anwe ngavamuyude naliyudiliro nalintje lya Karunga. ²⁰ Weno kukwendi ogho avhurango kuruwana ghure kuwiru yanavintje ovyo atwe twapurango ndi kughayara, kutwara kughunankondo wendi ogho waruwanango mumwetu, ²¹ kukwendi ghukareko ghuyerere munkirishe ntani mwaKristus Yesus kumaruvaro naghantje ntani naruntje. Amen.