¹ Ntani anwe ghuye amurenkitire muparuke, ovo vafiro mundyo ntani namumapuko, ² Omo mwayendire rumwe, kutwara muruvede rwamwaka daghudyuni ghuno. Anwe kwaparukire kutwara kuvapangeli vamaghumpititi vampepo, mpepo oyo yina kuruwano muvana vakupira kulimburukwa. ³ Rumwe natwe natuntje twa tungire mukatji kavantu vano, nakutikitamo vihorodona vyapa marutu ghetu, ntani nakushimba vihoro vyaparutu ntani nevi vyandunge. Atwe paghuntjitwe kwakalire vana vaghugara, yira varwana vakuhupako. ⁴ Ene ngoli Karunga agawopa munkenda mukonda yashihoro shendi shashinene osho ghuye atuholitire atwe. ⁵ Mukufa kwetu mundyo, ghuye aturenkitire atwe tuparuke kumwe mwaKristus-naghufenkenda vamuyovora. ⁶ Karunga aturambwitire atwe kumwe naKristus, ntani Karunga aturenkitire atwe tushungire kumwe mumavango ghamuliwiru mwaKristus Yesus, ⁷ mpo ashi muvirugha vyakughuto ngaviyo ghuye ngavura kutunegheda atwe maghungawo ghamanene ghakupira kuvara ghamunkenda yendi anegheda mughudidimiki mumutwe mwaKristus Yesus. ⁸ Munkenda yaKristus anwe kwamuyoghora kupitira mulipuro, ano vino kapi vyatundilira kukwenu, vyavyo ghushwi waKarunga, ⁹ kapishi kuviruwana, mpo ashi kudereko ogho ngakunenepeko. ¹⁰ Atwe vanturuwanito vaKarunga, vashitilire mwaKristus Yesus mukuruwana viruwana ovyo Karunga atulitirepo kare vyetu, mpo ashi atwe ngatuvure kuyenda mumwavo. ¹¹ Mpo ngoli vurukenu ashi anwe kwakalire vahedana panyama. Anwe vamuyita "vakupira kuruwana vyamukanda" novyo vatwenyanga ashi "vakuruwana vyamukanda" panyama varuwana namavoko ghavantu. ¹² Mushirugho ntjosho anwe kwagaunukireko kwas Kristus, vantunda virongo yira vatungimo muIsrael, vakorokoshi kuligwanekero lya litwenyediro, mwahana kukara nalihuguvaro ntjani mwahana Karunga mughudyuni. ¹³ Ene ngoli weno mwaKristus Yesus anwe ovo mwakaliro ghure naKarunga rumwe vamuyita ngoli pepi nahonde yaKristus. ¹⁴ Mukondashi ghuye ndye mpora yetu. Ghuye arenkitire vaviri akare ghumwe. Narutu rwendi adyo nawirepo likuma lyalidona olyo lyatugaghunino atwe. ¹⁵ Vyavyo, ghuye kwadyonawirepo veta yadimuragho ntani manangwiro mpo ashi ghuye avure kuyititapo murwana ghumwe wamupe mwamwene, ano mwangoli kuyititapo mpora. ¹⁶ Kristus kwagwanikita vantu navantje murutu rumwe kwaKarunga kupitira mushikurushe, pakutura kumfa maghudito. ¹⁷ Yesus kwayire ntani ayuvitire mbudi yayiwa yampora kukwenu mwakaliro ghure ntani mpora kovo vakaliro pepi. ¹⁸ kupitira mwaYesus atwe natuvantje twakara nampito muMpepo yimwe kwaShe. ¹⁹ Mpo ngoli, weno anwe vahedana kapi nka munakara vakorokoshi ntani vantunda virongo. Nani ngoli anwe vatungimo kumwe navantu vakupongoka vaKarunga ntani maruha ghandyughotateki yaKarunga. ²⁰ Anwe kwamudikilire palitateko lya vaApostoli ntani vaporofete, ano Kristus mwene ndye liwe lyene. ²¹ Mumwendi ndyugho nayintje kugwanekera kumwe ntani kukura yira Ntembeli yakupongoka mwaHompa. ²² Mumwendi anwe waro kwamudikira kumwe yira livango lyakukara lya Karunga muMpepo.