¹ Liyuva limwe vaPeturusi naYohanesi kwayendire kuNtembeli paruvede rwashitenguko paviri, yautatu. ² Pa livero kwakalirepo murume washirema shamundambo kutunda kuli shampuruko lyendi, kwamuyitire avamutura palivhango olyo kava twenyanga ashi paLivero lya Liwa. Kehe liyuva kava muyitanga vamuture ashungire palivero ghuye arombe vimaliva kuvantu vaku ngena muntembeli. ³ Opo amonine Peturusi naYohanas kuna kungena muntembeli, makura ghuye avarombo vamupeko vimaliva. ⁴ Peturusi naYohanesi avanwiki mantjo ghavo papendi, makura avaghamba ashi, ''Kenga kuno kukwetu.'' ⁵ Murume washirema akenge kukwawo, ataterere ndi vamu tambeke vimaliva. ⁶ Makura Peturusi aghamba shi, ''Siliveli naNgorodo ame kundereko, anongoli ovi nakara navyo, Ame kunu vitapa kukoye. Mulidina lya Yesus Kristus wamu Nasaret, shapuka ghuyenda.'' ⁷ Peturusi makura amu kwata nalighoko lyendi lya rulyo, amu shapwite, mpopo tupu makura maghuru ghendi nangongo dampadi dendi adi kara dina koro. ⁸ Amu kwata ashapuka, ghuno shirema makura ayimana atameke kuyenda nakudukaghana; makura ayendi kumwe naPeturusi ntani Yohanesi aka ngena navo munda yaNtembeli, ghuye kuna kuyendaura, naku vatauka naruhafo ntani ghuye atanga naku panda Karunga. ⁹ Vantu navantje ovo vamu monine kuna kuyenda navo avatanga naku panda Hompa Karunga. ¹⁰ Makura vantu avadimburura ashi ghuno murume ndyeghu kashungirango palivhango olyo kava twenyanga ashi paLivero lya Liwa lya kungena muntembeli, ndyeghunya karombagherango vimaliva; vavo avatetuka unene kwavino mukondashi vavo kapi vayivire ashi vinke vyashorokiro kukwendi. ¹¹ Ghuno murume averukiro aku gegerere akare kumwe naPeturusi ntani naYohanesi, vantu navantje avatetuka makura avaduka kumwe tupu vayende kukwavo mulivhango oli vatwenyanga ashi Mumbaraka yaSalomoni, avatetuka unene. ¹² Makura Peturusi opo amonine vino, makura atantere vantu ashi, ''Anwe vaIsraeli, vinke muna kutetuka kwavino? Mukonda munke muna kutu kengurura weno, anwe kuna kughayara ashi atwe kuna ruwana vino kunkondo detu ndi kughuhunga wetu mbyo ana kuyenda ghuno muntu ndi? ¹³ Karunga waAburahamu, naIsaka, ntani naYakopu, ghuye Karunga wava kurona vetu, ndye ana yererepeko mukareli wendi Yesus. Monendi Yesus ogho mwatapire kumbunga vamu shwene kumeho yaPilatus, opo atokolire ashi vamu shuture mumango. ¹⁴ Anwe kwashwenine kumangurura muntu waMupongoki naghu waMuhungami, makura anwe amu shungida naku tokora vamangurure muntu wamu runde namu rudipayi vantu vamu shuture vamu tape kukwenu. ¹⁵ Anwe kwadipayire mutapi monyo waliparu lya naruntje, makura Hompa Karunga aka muvhumbura kughu fe - atwe vambangi vendi kwavino. ¹⁶ Nkondo dino dalipuro lyaku tunda mulidina lya Yesus, mukonda yalidina lyendi, mbyo muna kumona vino yivenu shi kuna viruwana mulidina lyendi, mbyo ana kuyenda. Mulipuro lyendi olyo ana pura mwaYesus ndyo lina muveruro akare weno yira momu muna kumu kenga weno namuvantje. ¹⁷ Vakwetu weno, ame nayiva ashi anwe kwaruwanine vino mukonda yaku pira kukwata lighano, anwe kuna ruwana mbyovyo ka varuwananga vampititi venu vakare. ¹⁸ Odino nkango ndodo aghambire Karunga pakutanga kupitira mutunwa twava porofete, ashi Kristus ngakara murunyando nga hepa, odino nkango weno dina tikilirimo. ¹⁹ Kushighurenu, anwe, mupiruke muvyuke kwaKarunga mpo shi ndyo denu ngava didongononepo, makura anwe mushungide kwaHompa nga mupe nkondo; ²⁰ makura ghuye ngamu tumina Kristus, oghu atoghorora ngaye kukwenu ngamu kwafe, ghuno muntu ndye Yesus. ²¹ Yesus nga kara momo muliwiru dogoro opo ngashitika shirugho vininke navintje ngavi kare vyavipe, ovyo aghambire Karunga paruvede runa kapito kupitira mutumwa twava porofete vendi vakupongoka. ²² Moses kwatantilire vakurona vetu vakare ashi, 'Hompa Karunga ngatoghorora muporofete mumwenu waku tunda mukatji kenu ngakare yira ame. Anwe muna hepa kulimburukwa naku tikitamo navintje ovyo ngava mutantera. ²³ Kehe ghuno ngapiro kuterena naku limburuka kunkango dava porofete ngava vadyonaura ngava tundemo mukatji ka vantu vaKarunga. ²⁴ Nhii, vaporofete navantje kutamekera kwaSamwele ntani nava vakwamino ko kuruku rwendi, navo kwaghambire vapumbe kuhamena oghano mayuva. ²⁵ Matumbwidiro ghaKarunga ogho aghambire kupitira muva porofete vendi kwahamena kukwenu ntani ligwanekero oli atulirepo Karunga kumwe nava navakurona venu kwahamena kukwenu, opo atantilire Aburahamu ashi, 'Mumbuto yoye mo ngava tungikira vantu navantje vamu udyuni.' ²⁶ Karunga kwavhumbura mukareli wendi kughu fe, ngayite matungiko kukwenu muhovo, mposhi kehe ghuno ndi ngashayeke kuruwana ghurunde."