¹ Opo lya tikiremo liyuva lya Pentekoste, navantje avapongo mulivango limwe tupu. ² Vaharukako tupu mpepo kuna kutunda muliwiru kuna kupupira nankondo yira likundungu, makura ayi yura mundyugho nayintje oyi vashungilire. ³ Makura avamono yira maraka ghamundiro ana kuhanauko, makura agha tembere pakehe ghumwe ogho akaliromo. ⁴ Navantje makura avayura Mpepo yaKupongoka avatameke kughamba maraka peke-peke, yira momu yatapire Mpepo ashi vinke ovyo vaghamba. ⁵ Shirugho shino vaYuda kwatungire muYerusalemu, vavo vantu vavahungami, vakutunda kudimuhoko nadintje damu udyuni. ⁶ Opo yayuvikire yino mpepo yaku pupira, mbunga yavantu yayinene avaya avapongo kumwe; vavo avakara yira vana kombana pandunge mukondashi kehe ghuno kwayuvire omo vana kughamba muliraka lyendi. ⁷ Vavo avatetuka ntani aghu vatundu; avaghamba ashi, ''Vya ushili vino ndi, vano vantu navantje vana kughambo weno nani kapishi vamuGalileya ndi? ⁸ Weni omo vina kara ashi atwe kuna kuyuvha ovino vana kughamba, kehe ghuno kuna kuyuvha liraka lya mvharera yendi? ⁹ Vapareti navaMede navaErami ntani namaraka ghamu Mesopotamiya, namuYudeya naKapadosiya, naPontusi naAsiya, ¹⁰ Filigiya naPamufiliya, vamu Egipite ntani nagha ghamu Libiya vitware kuKirene, ntani nava dinguli vaku Roma, ¹¹ VaYuda navo vatamburo lipuro lyava Yuda, nava Kereti nava Arabiya, atwe kuna kuyuvha omo vana kughamba maraka ghetu, omo vana kughamba viruwana vyankondo navitetu vyavinene vyaHompa Karunga. ¹² Navantje avatetuka naku tororoka kapi vana kukwata lighano kovi vina kushoroko; vavo avakupura vene navene ashi; "Vinke vina kutanta vino?'' ¹³ Vamwe avavashepe avaghamba ashi, ''Vana korwa marovhu ghaugara.'' ¹⁴ Makura Peturusi ashapuka kumwe navaghunyendi murongo naumwe, aghamba naliywi lya kudameka, avatantere ashi, ''Anwe vantu vamuYudeya ntani nanwe vantu mwatungo muYerusalemu nayintje, tererenu kwadino nkango dande, ntani mukwate lighano kwavino naku mutantera. ¹⁵ Ovano vantu kapi vana korwa marovhu yira momu muna kuvighayara, runo ruvede rwangura-nguara yino viri yamuvyu kuliyuva. ¹⁶ Odino nkango ndodo apumbire muPorofete Yowera ashi: ¹⁷ Karunga kwatanta ashi, "Kumayuva ghaku hulilira nganu poghomwena Mpepo yande pavantu navantje. Vana venu vavamati nava vavakadona ngava pumba, vadinkantu venu ngava mona mamoneko ghavitetu, ntani vakurona venu ngava rota ndyodi. ¹⁸ Ame nganu poghomwena Mpepo yande pavakareli vande vavakafumu nava vavakamali mumayuva ngogho, makura ngava pumbe. ¹⁹ Ame nganu neyeda vitetu muliwiru naviyivito pano palivhu, ngapa moneka honde, namundiro ntani namuti waku kuvhonga namema. ²⁰ Liyuva ngali shovagana ntani ka kwedi ngaka geha yira honde ntani ngalitikamo liyuva lya Hompa lya linene olyo lyafumano. ²¹ Makura kehe ghuno ngakugho lidina lya Hompa ngaparuka ngayoghoka. ²² Anwe vaIsraeli, yuvhenu dino nkango dande ashi: Yesus wamu Nasareti murume waKarunga, kwamupa nkondo dakuruwana viruwana vyankondo vyavinene navitetu ntani naviyivito ovyo aruwana Karunga kupitara mumwendi, vino mwavi kenga namantjo ntani mwavi yiva. ²³ Ghuno murume kwamutapire mumaghoko ghenu kutwara muvi panga namu matokoro ghaKarunga kutwara mughukonentu wamwene kwavyo aturapo kare; anwe amu mutapa mumaghoko ghava runde vamudipaye kumwe naku mupamparera kushilivindakano. ²⁴ Ano ngoli Karunga amu vhumburamo mumfa, amu yoghora atundemo mukukora kwamfa, mukondashi nampili mfa dene nado vyalimbire vyaku mukwatera akare mo mumfa. ²⁵ Mukondashi David naye kwaghambire vyaku hamena kukwendi ashi, 'Ame kuvhuruka Hompa kehe pano mukondashi ghuye mpwali kushipa shande, ntani ghuye kehe pano mpwali kurulyo rwande mposhi ame kapishi nikare naghoma kuva nankore vande. ²⁶ Ame mbyo nakara naruhafo munda yamutjima wande makura mbyo naku shamberera mukanwa kande. Mukonda shi, rutu rwande naro ngaru kapwiyumuka nalihuguvaro. ²⁷ Ove kapi ngaukengerera monyo wande ngaukarerere mushirongo shava fe, ntani ove kapi ngaushuva Mupongoki Ghoye nga dyonauke rutu rwendi ngaru ghore. ²⁸ Ove waneyeda kukwande ndyira yamonyo; Ove ngaghu yuda ruhafo mumwande mukonda nganu kara kumwe nove naruntje nanaruntje. ²⁹ Vakwetu, ame kuna kumutantera muyive ushili vyakuhamena kwanyakulyetu Hompa David, ashi ghuye kwafa mbyo vamu vhumbika, anongoli liyendo lyendi shimpe mpolili nalino lya namuntji. ³⁰ Ghuye, muporofete akaliro ntani ayivire ashi Karunga kwaturapo mughano ashi muruvharo rwaDavid mo nga tunda Hompa Kristus ogho nga shungiro kushipundi shaUhompa. ³¹ David kwakengire ovyo ngavi shoroko kumeho yaKarunga makura agahamba vyaku hamena livhumbuko lya mfa yaKristus ashi, monyo wendi kapi ngava ghushava ngaghu karerere mushirongo shava fe, ntani rutu rwendi kapi ngava ruke ngerera ruku ghorere. ³² Ghuno Yesus kwafire - Karunga aka muvhumbura kughu fe akare namonyo, ovino natuvantje twavi mona twavi yiva ntani tuna kara vambangi. ³³ Mbyo, vamu yerura vamu ture kulipundi lya uhompa ashungire kurulyo rwaKarunga, mbyo aka awana Mpepo yaKupongoka yira momu vayi mutwenyedera Vashe, makura ghuye mbyo ana yipoghomwene papetu yayo ndyoyino muna kumona ntani ndyoyino muna kuyuvha weno. ³⁴ Mukondashi David mwene kapi aronda ayende mo muliwiru, anongoli ghuye kwatanta ashi, 'Hompa kwatantera Hompa wande ashi, ''Shungira kurulyo rwande ³⁵ dogoro mpopo nganu tura vana nkore voye ngava kare ghulyatero wampadi doye.'' ³⁶ Mpo ashi, muhoko waIsrael uyive ushili ashi oghuno Yesus ogho mwamwapampalire kushilivindakano, ghuye kwamutura ghuye akare Hompa ntani ndye Kristus." ³⁷ Vantu opo vayuvire dino nkango, adi vatu unene kumutjima, makura avapura Peturusi nava Apostoli vaghunyendi ashi, ''Vakwetu, vinke tuvhura kuruwana?'' ³⁸ Peturusi avatantere ashi, ''Kushighurenu dimutjima namuvantje vamukushe, mulidina lya Yesus Kristus muwane lidongononopo lya ndyo denu, makura anwe mutambure ushwi waMpepo yaKupongoka. ³⁹ Mukondashi oghano matwenyidiro ghaKarunga kukwenu navana venu navapuli navantje vagha tapa ntani naku vantu ovo atoghorora Hompa Karunga.'' ⁴⁰ Peturusi aghamba nka nkango dadiyingi daku varonga naku vashungida kumwe naku vakorangeda ashi, ''Tamburenu dino nkango muyoghoke mo muvantu vavarunde.'' ⁴¹ Vavo avatambura nkango dendi naruhafo avavakushu mpopo, muliyuvha ndyolyo tupu vantu vaku tika kumayovi matatu avakuwederere mumbunga yavo. ⁴² Makura vavo avakutapa kuva Apostoli avatambura marongo avakara kumwe mumbunga yava Kriste, avabomaura mboroto avali kumwe ntani avakara kumwe mundapero. ⁴³ VaApostoli kwaruwanine vitetu vyavinene naviyivito vyaviyingi, makura vantu vavayingi avakara naghoma avatanga Hompa Karunga. ⁴⁴ Vantu navantje ovo vapuliro avakupakerere vakare kumwe tupu ntani avayita limona lyavo valiture kumwe tupu, ⁴⁵ Vavo avaghulita limona lyavo namaghushwi ghavo avatapa vihepwa kuvantu, kehe ghuno kutwara muvihepwa vyendi. ⁴⁶ Vavo kava karanga namutjima ghumwe tupu kehe liyuva muntembeli. Vavo kava lyanga kumwe ndya damumandi ghavo, naruhafo nali kudidipito mumutjima, ⁴⁷ kumwe naku shamberera Karunga ntani vavo kuna kara nambili navantu navantje, makura Hompa ka wedereranga mumbunga yavo vantu ovo kava tamburango nkango dendi kehe liyuva.