¹ Peturusi naYohanesi vavo shimpe kuna kughamba nambunga, makura vapristeli vanene navampipiti vamuntembeli navaSadukayi avayatiki palivhango. ² Vavo kwayuvire kukora unene mumutjima mukondashi Peturusi naYohanesi kwatapire marongo kuvantu ashi vantu ngava vhumbuka kughu fe yira momu avhumbuka Yesus kughu fe. ³ Makura avava kwata vavature mudorongo dogoro liyuva lyaku kwamako kungura ngura, vavo kwava kwatire ruvede rwangurova. ⁴ Ano ngoli vantu vavayingi ovo vayuviro yino mbudi avapura mumwavo; shivaro shavantu ovo vapuliro yino mbudi kwatukire kumayovi matano. ⁵ Liyuva lyaku kwamako vapangeli vavaYuda, namatimbi ntani navarongi matjangwa avapongo kumwe muYerusalemu. ⁶ Anasi mukuro wava pristeli vavanene naye mpo akalire, naKayifasi, naYohanesi, ntani Alexander, ntani navo navantje vahameno kuva pristeli vavanene. ⁷ Vavo avayita vano vaApostoli vaviri Peturusi naYohanesi kumeho yavo, avavapura ashi, ''Nanke muna ruwana vino, ntani nankondo munke muna viruwana vyaweno, ntani mulidina lyare nankondo munke muna ruwana vyaweno?'' ⁸ Makura Peturusi, ayura Mpepo yaKupongoka, avatantere ashi, ''Anwe vapangeli, ntani nanwe matimbi, ⁹ nkene shi anwe kuna kutupangura namuntji mukonda yaviruwana vyaviwa ovi tuna ruwanene ghuno murume waku vera, mbyo muna kushana muyive ashi weni omo ana veruka ghuno murume, ¹⁰ karenu muna viyiva namuvantje vamuhoko wava Israeli ashi ghuno murume ana yimano weno kumeho yenu, kuna veruka mulidina lyaYesus Kristus wamuNasareti, oghu mwapampalilire kushilivindakano, makura Karunga aka muvhumbura kughu fe. ¹¹ Yesus Kristus ndye vatjanga mumatjangwa ashi, liwe olyo vashwena vatungi ndyo vatura likare liwe lyamu likovhu. ¹² Liyoghoko lya ndyo kuliwana tupu mumwendi ti, mukondashi kwato nka lidina lyapeke pantunda yalivhu muno mughudjuni mudima oku vatapa nkondo daKarunga daku yoghora vantu vatunde mundyo." ¹³ Vampititi opo vamonine Peturusi naYohanesi kuna kughamba naukonentu nandunge nankondo ntani naku pira utjirwe vavo avadimburura naku kupura ashi weni omo vaghamba weno, vavo kwato makurongo, avatetuka unene, makura avadimburura ashi vavo kwakalire ntani kava yendauranga kumwe naYesus. ¹⁴ Opo vamonine ghuno murume averukiro kuna yimana kumwe navo, avi valimbi vyaku ghamba navo vavape undyoni kwavyo varuwanine. ¹⁵ Makura vampititi avatantere vaApostoli varupuke tanko pandye yambererwa, vavo vaku kunde vene navene. ¹⁶ Makura avaghamba ashi, ''Weni omo tuva ruwana vano varume? Mukondashi shino shitetu vana ruwana shinene unene ntani kehe ghuno akaro muYerusalema ana shiyiva; atwe naku wapashi ntani kapi tuvhura kushikanana. ¹⁷ Muku renka ashi yino mbudi kapishi yirunduruke yiyende shimpe kughure kuvantu vavayingi, tutapenu marondoro kwavano vaApostoli ashi kapishi vayuvite nka mbudi mulidina lya Yesus." ¹⁸ Makura avavayita vavatantere kumwe naku varondora ashi kutunda pano kapishi vayuvite nka mbudi ndi vatape marongo kuvantu kuhamena mulidina lyaYesus. ¹⁹ Ano ngoli Peturusi naYohanesi avavalimburura vava tantere ashi, ''Anwe naghu mwenu mutokoro ashi, vyauhungapo ne tulimburukwe kwaKarunga ndi tulimburukwe kukwenu. ²⁰ Atwe kapi ngatu vhura kumwena nakushayeka yino mbudi kwavyo twa mona navyo twayuvha ntani navyo vaturonga.'' ²¹ Vampititi opo vamanine kuva rondora vaPeturusi naYohanesi, makura avavashuvu vaka yende. Mukonda kapi vavawanine undyoni waku vhura kuva tengeka, mukonda ashi vantu navantje avatanga Karunga kwavi varuwanine. ²² Ghuno Murume vaverulire oghu shashorokilire shino shitetu ghuye kwakalire namwaka daku pitakana padimurongo ne. ²³ Opo vava shutulire mumango vaka yende, vaPeturusi naYohanesi avayendi vaka wane mbunga yavo makura avakava tantera navintje ovyo vaghambire vapristeli vavanene nava mpititi vavaYuda kukwavo. ²⁴ Vavo opo vayuvire yino mbudi, avakara mutjima ghumwe tupu avatanga naku kanderera kwaKarunga kumwe naku ghamba ashi, ''Hompa Karunga, ove mushiti waliwiru nalivhu nalifuta, ntani nanavintje vyakaromo. ²⁵ Ove watanteliro mukareli ghoye, shetu Dafit kupitira muMpepo yaKupongoka ashi, 'Mukonda munke vaPagani vana karere mundyorongani, ntani dimuhoko vinke dina kuruwanena vininke vyahana mutompo?' ²⁶ Vavo avaghamba ashi, 'Vahompa vapano palivhu vamu udyuni vana pongo vana kuwapayikiri, ntani vampititi vana pongo kumwe vana divyuka Hompa, ntani naKristus wendi.' ²⁷ Ushiri, navantje Herodes naPontius Pilatus, kwapongire kumwe navaPagani ntani namuhoko wava Israeli mushitata shino, vaku pakerere vadi vyuke Mukareli ghoye waku pongoka Yesus, ogho watungika mbyo wamuwaveka. ²⁸ Vavo kwapongire kumwe vatikitemo navintje ovyo waturapo navi watokora pashakare kutwara munkango doye nadi muragho doye ashi mbyo ngavi vhuro kushoroka kumeho. ²⁹ Weno, Hompa, tegherera kuma rondoro ghavo ogho vana tapa kuvakareli voye, weno kwafa ngoli vakareli voye vayuvite nkango doye nankondo vahana utjirwe. ³⁰ Honyonona ngoli lighoko lyoye lya nkondo ghutape liveruko navitetu naviyivito vishoroke mulidina lya mukareli ghoye wakupongoka Yesus." ³¹ Tupu vamana kuraperera, pano palivango opo vapongire ali kankama livhu, makura navantje vakaliropo avayura Mpepo yaKupongoka avayuvita nkango daKarunga nankondo naghupampi vahana utjirwe. ³² Mbunga yashivaro shashinene shova puli avakuyendi namutjima namonyo ghumwe tupu. Kwato ghumwe waku ghamba ashi, olino limona lyande tupu, nane ngoli vavo avapakerere limona lyavo likare kumwe tupu. ³³ VaApostoli avayuvita Mbudi yaRuhafo nankondo vavo avatapa umbangi waku hamena livhumbuko kughu fe lya Hompa Yesus, makura ghufe nkenda waunene aghu kara papavo navantje. ³⁴ Mukatji kavo naghumwe shi kahepa ngo kehe shino, navantje ovo vakaliro namafuva ntani nandyugho avaghulita makura viwana mo navimaliva avatapa ³⁵ avaviyita kuva Apostoli, vavo avatapere kuva hepwe kutwara kuvihepwa vyavo. ³⁶ Pa kalire murume wamu Apostoli walidna Yosef, oghu kava twenyanga ashi Baranabas (ku tanta ashi Murume waMakorangedo), wamu lira lya Levi, ogho vashampurukira kuKiripurus, ³⁷ ghuye aghulita lifuva lyendi ayita vimaliva aya tapa kuva Apostoli.