¹ Vyakuhamena mbatero yavantu vaKarunga vamuYudeya, ame kapi nahepa kuvi mutjangera. ² Mbyovyoshi shihoro shenu shakuvatera nashiyiva, ame mbyo nakupandayikiranga nitantere vantu vamu Makedoniya. Ame kwava tantera ashi vaGereka vakuwapayikira kutapa kutameka mwaka ghuna kapito. Mbatero yenu ndyo yarenkito vavangi vatameke kutapa. ³ Ame kuna kutuma vaunyande kukwenu, mposhi muku wapayikire yira momu mwavi tanta, ngamu yavaneyede ashi atwe kwavyo twa ghambanga vyakuhamena kukwenu kapishi vyamavoko-voko. ⁴ Ndipo, ntjeneshi ngatuya kukwenu kumwe navakaMakedoniya vamwe ngatu yamuwane kapi muna kuwapayikiri, atwe ngatuya kuyuvha ntjoni ghunene-ntani kwato ovyo ngatuya vhura kuyaghamba nanwe-kwavyo twa mupandayikanga kuvantu. ⁵ Ame mbyo nakughayara ashi nahepa kutuma vaunyande ngava hove kuya vaya wapayike vitapa ovyo mwatutulikira. Mposhi ngavikare vitapa vyaviwa, kapishi vyamutjima koka. ⁶ Yivenu vino ashi, Kehe ghuno wakukuna mbuto yayisheshu kuyangura muyangu waghusheshu, ntani kehe ghuno wakukuna mbuto yayingi nashihoro naye kuyangura muyangu waghungi. ⁷ Kehe muntu atape mukukuyenda namutjima wendi, kapishi namutjima koka ndi yira vyamu mutininiko, mokondashi Karunga kwahora vakutapa nashihoro namutjima waghuwa. ⁸ Karunga kuvhura atape limona lyalingi ghunene kukwenu, mposhi, kehe pano, mukare nalimona olyo mwahepa, ntani nalimona lyalingi kwenu naumwenu. Mposhi ngamu kare nalimona lyalingi unene ngamu ruwane viruwana vyenu. ⁹ Yira momu tupu vavitjanga ashi: "Kehe ghuno wakudamuna limona lyendi atape kuvahepwe. Ghuhungami wendi ngaghukarererapo naruntje nanaruntje." ¹⁰ Karunga ogho atapango mbuto yakukuna kwamukuni nandya dakulya ngamupa mbuto yayingi oyo mwahepa nga mukune. Ntani nka uye ngamenitanga avhukite muyangu wambuto yenu yaghuhungami. ¹¹ Ghuye ngamupa limona lyaliyingi ghunene ngamukare vatapi vaghuhunga kwakehe vino. Makura vavangi ngava pandura Karunga wetu kupitira mumwenu. ¹² Mukondashi viruwana vino muna kuruwana kapishi kuna kuhepurura tupu vapongoki pentjavo, nani ngoli kuna kutapa mpandu kwaKarunga mumarupe ghaku kushuva-shuva. ¹³ Muneyede shiruwana shenu shakufumadeka Karunga mukonda yakulimburukwa kumbudi yaruhafo yaKirisitusi. Anwe ngamu fumadeka nka Karunga navitapa vyenu vyaviwa kukwavo nakwakehe uno. ¹⁴ Vavo kumu vhuruka nakumu tura mundapero kehe pano. Vavo kuruwana vino mukonda yaghufe nkenda waKarunga waghunene kukwenu. ¹⁵ Tupandurenu Karunga mukonda yaghushwi waghungi wakupira kuvhura kutanta!