¹ Ame, Paulusi, kuna kumu kukorageda, mulidina lya makudidipito nalikushingimiko lya Kirisitusi. Vantu kughamba ashi ame kukudidipita ntjene mukatji kenu nakara, ano ngoli ntjeneshi ghure nakara nanwe ame kudi muvyuka. ² Ame Kuna shungida, kapishi ngamu ntininike ngani yadimuvyuke ntjeneshi mponili mukatji kenu. Mukondashi ame nayiva nawa-nawa ashi kuvhura nganiya vyuke ovo vaghambango ashi atwe kwaruwanenanga shihoro shapa marutu. ³ Nampili momu twa kara mughudyuni, kapi twa rwanita nga virwita vyamughudjuni. Virwita vyetu ovyo twa rwanitanga kapi shi yira vyamuno mughudjuni. ⁴ Nani ngoli, virwita vyankondo daKarunga, dahanaghurangopo maghurunde ghavantu. Nakudyonaura po makanyi ghamadona ogho gharenkitango vantu vapire kuyiva Karunga. ⁵ Atwe kuhanaghurapo ndunge nadintje dakukutumba odo dakulimbo nandunge daKarunga. Atwe kukondyita turwanite maghano ghavantu tughatjindye ghavhure kulimburukwa kunkango daKirisitusi. ⁶ Pakutanga anwe kwakare valimburuki kwaKarunga, ntani ngamu vhura kukara nankondo dakutengeka kehe ghuno wakupira kulimburukwa. ⁷ Anwe karenu nalirwameno lyavi vyakumeho. Ano ngoli ntjene shi pwali umwe ogho akuhuguvaro mwene ashi ghuye kwahama kwaKirisitusi, mutanterenu naye aviyive ashi natwe kwahama kwaKirisitusi nawa-nawa yira momo ahamako ghuye. ⁸ Nampili nikufumadeke ghunene kunkondo odo atapa kukwande Hompa, ame naku kuyuvha shi ntjoni, mukondashi Hompa kwadi tumu pameke kapishi tumu dyonaure po. ⁹ Ame kapi nashana muvikenge ashi ame kuna kumutjilita nantjangwa tumwa dande. ¹⁰ Vamwe kughamba ashi, "Ntjangwa tumwa daPaulusi kutjilita ghunene ntani dado didito dakara nankondo ghunene, ano ngoli ghuye muntuko mwene kapi akara nankondo. Ntani nkango dendi navi mweshi datanta." ¹¹ Vantu ovo vaghambango vyaweno vayive tupu ashi kapi pakara likushuvo pankango detu odo twa tjanganga muntjangwa tumwa detu kumwe naviruwana vyetu ovyo twa ruwananga ntjeshi mpo tuna kara naghumwetu. ¹² Atwe kapi twa kara ndi kapi twa fana yira vantu ovo vakukupandayikira ngo ghunene wavo vavene. Ogho ghugova ogho vakara nagho wakukushetakanita vene-na-veve, kwato mutompo. ¹³ Ano ngoli, atwe, kapi twaku fumadekanga ashi dogoro tupitakanite. Nani ngoli, Atwe kukupandayika kutwara muviwana shetu yira momo ashitapa Karunga kukwetu, dogoro nakukwenu. ¹⁴ Atwe twa hoviro kuya kukwenu tuya muyuvitire mbudi yaruhafo yaKirisitusi. ¹⁵ Atwe kapi twa kufumadekeranga viruwana vyavantu vapeke. Nani ngoli, atwe twahuguvara ashi ntjene ngagha kura mapuliro ghenu, atwe ngatu vhura kuruwana viruwana vyavinene vyakupitakana pavino mukatji kenu. ¹⁶ Atwe kuna shana, ngatu tware mbudi yaruhafo muvirongo vyapeke vyamusheli munya. Atwe kapi tuna shana kukupandayikira viruwa vyavaghunyetu ovyo varuwana kare muvirongo vyapeke. ¹⁷ Yira momo tupu vatjanga ashi, "Kehe ghuno ana shano kukufumadeka, aku fumadekere mwavi vyaHompa." ¹⁸ Kuvhura ghukufumadekera viruwana vyana ghumoye ano ngoli kapi vakutovorora. Nani ngoli, ndyegho atovorora Hompa, ndye vafumadeka muviruwana vyendi.