¹ Ame kuna shana ashi ndi mukudidimike name kunkango dande daugova. Kudidimikirenu tupu name kadidi! Ame kuna kurwa lifupa kukwenu. ² Ame kuna kurwa lifupa lya mwene Karunga kukwenu, mukondashi ame kwamu vandekera murume ghumwetupu. Mbyo namutovorora anwe ngani mutape kwaKirisitusi yira mukadona apiro kukwara. ³ Ano ngoli ame nakara naghoma ashi, kuvhura limukonge liyoka yira momu lya mukongire Eva nama mundunge-ndunge ghalyo ghamadona, pamwe maghano ghenu nagho kuvhura vagha dyonaure mushuve ghuhungami naghukushuki waKirisitusi. ⁴ Mukondashi kuvhura ngaye muntu umwe ngaya muyuvitire Yesusi naye peke, kapi shi ndyeghu twa muyuvitira atwe. Ndi ngava mupe mutambure mpepo peke kapishi yira ndyoyi mwawana kukwetu. Ndi ngamu tambure mbudi peke yakupira kukufana nayi mwawana kukwetu. Makura ngamu vitambure nalididimiko! ⁵ Amene kwato viruwana vyaghu apostoli ovyo vyamvhuro po kuruwana nampili kuviruwana vyavaapostoli vavanene. ⁶ Nampili momo napira kuyiva kughamba nawa-nawa, ano ngoli ame nakara naghukonentu waghunene. Vino atwe twavi muneyeda munkedi nadintje namu vininke navintje. ⁷ Ame kwadyona kwavyo nakudidipita mposhi anwe munene pe ndi? Ame kwamu yuvitira mbudi yaruhafo yaKarunga kukwenu mavoko-voko. ⁸ Ame kwavaka ngoli mukughupa vitapa kumbungankirishe dimwe niya tape mbatero kukwenu ndi. ⁹ Opo nayire kukwenu naya hepire vihepwa vyangandi, ano ngoli kapi nashanine nimupe mudigho. Vihepwa vyande kwavi wanine kuva ghunyande vaovo vatundiro kuMakedoniya mbo vampiri mbatero. Ame kapi nashanine nimupe mudiwo, nampili ndi kumeho oko tuna tamba kapi navi shana. ¹⁰ Ushiri, waKirisitusi nakughana, ame kukunenepitira mushiruwana shande ashi maruha ghamushirongo shamuAkayiya ogho nga vhuro kughamba ashi kapishi nikunenepitire mumushiruwana shande. ¹¹ Mukonda munke nakughambera vino? Mukondashi kapi namuhora ndi? Karunga mwene ndye aviyivo. ¹² Ame ngani twikira kuruwana vino viruwana, mposhi ngavi valimbe ovo apositoli vamwe vakufumadeko ntani navo vaghambango ashi vavo kuruwana viruwana vyakufana yira mbyovyo twa ruwananga. ¹³ Mukondashi vantu vaweno vaapositoli vavipempa ntani vavo varuwani vakukukitaghukira. Vavo kwaku kitaghukira vakuture mughu apositoli waKirisitusi. ¹⁴ Vino kapishi vimu teture, nampili Satana mwene naye kukutjindja akare yira muEngeli wamu ukenu. ¹⁵ Vino kapi shi vimuteture ntjene shi vakareli vendi vakutjindye vakupake mughukareli waghuhungami. ano ngoli ghuhura wavo ngavaka kuyenda navi ruwana vyavo. ¹⁶ Ame kuna kughamba nka ashi: Ame kapi shi munkenge ashi ligova. Nampili nikare ligova, vitamburenu tupu ashi ame ne ligova mposhi name nikufumadekere po shirugho shashifupi. ¹⁷ Kwavino nakughamba vyaku kupandayika - kapishi kwaHompa vina tundu ashi nuvighambe - Ame kuna kughamba yira ligova. ¹⁸ Yira momu tupu vaku fumadekeranga vantu viruwana vyavo vyapa marutu, name kuna kuku fumadekera vyande. ¹⁹ Anwe vakukotoka munahepa kuku didimikira namagova. Mukondashi anwe mwakara naghukonentu? ²⁰ Anwe kudidi mikirenu kuvantu nampili vamuture mughupika, nampili vamushunune, nampili vamushekurure, nampili vamu dinininepo, ndi po vamutoghone muvipara. ²¹ Ame kukuyuvha ntjoni ntjene anighamba ashi atwe kwakalire naghoma wakuruwana vino. Ntjene shi vavo avakupandayiki - name kuvhura kuviruwana - Ano ngoli ame kuna kughamba ashi magova ngo ghaku ruwana vyaweno. ²² Ntjene shi vavo vaYuda? Name muYuda. Ntjeneshi vavo vaIsraeli? Name nimuIsraeli. Ntjeneshi vavo vatekuru vaAburahamu? Name mutekurwa Aburahamu. ²³ Ntjeneshi vavo vakareli vaKirisitusi? (Ame kuna kughamba yira muntu wakupira ndunge.) Ame nava pitikana navantje muviruwana vyaukareli. viruwana vyande vyaukareli vinene ghunene, nava pitakana muku ngena mudorongo rukando rwarungi, nava pitakana omo vantoghona ghunene nangora rukando rwarungi, ame kwagwanekera naviponga vyamfa rukando rwarungi. ²⁴ Kuva Yuda kwantjepulire rukando rutano "Ngoreka di murongo ntatu nantano-nane." ²⁵ Rukando rutatu kwantoghonine namburo, rukando rumwe kwantoghonine namawe. Rutatu kwatjokire muruyendo rwamushikepa. ²⁶ Rukando rumwe kwapupire - pupire mulifuta matiku namwi. Muruyendo rwande rwarungi, kwakara muviponga vyamumukuro, viponga vyavakawidi, viponga navaYuda, viponga vyavaPagani, liparu lyande kwakalire mushiponga mumbara dakukushuva-shuva, viponga vyamumburundu, viponga vyamulifuta, muviponga nava apositoli vavimpempa. ²⁷ Ame kwaruwana ghunene ntani kwakara muviponga vyavinene, kapi kanu rararanga matiku naghantje vikando vyavingi, kanu karanga nandjara nalinota vikando vyavingi, rukando rwarungi kwakara pandapero dakupira kulya ndya, vikando vyavingi kwakara mughutenda, ntani kwakara shintjentja rutu-rutu. ²⁸ Kughupa ko navintje vino, ame kwakara navinka vyavingi kehe liyuva kumbungankirishe nadintje. ²⁹ Ntjeneshi vaghunyande kapi vana kara nankondo, name kwato nkondo? Ntjene vaghunyande vana punduka vakugande, ame kugarapa ghunene name ghukugande, ngoli nakuwashi. ³⁰ Ame ntjeneshi nikufumadeka nkwandi, nikufumadekere kupira nkondo kwande. ³¹ Karunga Vashe vaHompa wetu Yesusi, ana yiva ashi kapi naku mukonga, ghuye vamupande naruntje nanaruntje. ³² Opo nakalire muDamasikusi, lirenga lya Hompa Aretasi kwatantilire vakungi mbara vanomene mavero naghantje ghambara vakwate Paulusi. ³³ Makura avampititiri palikende nisheghumukire kuli kuma, niva shenduke nirupuke mo mumbara.