¹ Ame kuvhura nikupandayike, ano ngoli kwato ovyo nganiwa mo. Ano ngoli ame kukupandayikira mamoneko nalishororo olyo lya tundo kwaHompa. ² Ame kwayiva murume ghumwe wamukirisite - ogho vatwalire muliwiru lya utatu weno mwaka murongo na-ne dina kapito po - ame kapi niyiva ashi ghuye kwayendire mo narutu rwendi ndi, monyo wendi tupu wayendiro mo, Karunga ndye tupu ana viyivo. ³ Ame namuyiva uno murume - vikare shi kwayendire mo narutu rwendi, ndi mpepo yendi tupu yayendiro mo, ame nakuviyiva shi, Karunga ndye waku viyiva - ⁴ ghuye kwamutwalire muParadisa mbyo aka yuvire nkango dakupira kuvhura kutanta, muntu kapi vamupa livhango lya kuvhura kudighamba. ⁵ Murume ghuno ndye nakukufumadekera. Ame kapi nikufumadeka naghumwande, nkwandi mukupira nkondo kwande. ⁶ Ntjeneshi anikufumadekere vino, ame kapishi mukonda yaugova, ame kuna kughamba vyaghushilri. Ano ngoli kapi nashana kukupandayika, mposhi kapishi ngava ghambe vyavingi vapitakanite povi vamona navi vayuvha vyakuhamena kukwande. ⁷ Ame kuna kughamba kwavyo namona kapishi kuna kukunenepita kumamoneko ghamanene ogho namona, mbyo vavhukukuma ntonga murutu rwande, muengeli waSatana mbyo atoghona - mposhi kapishi nikutumbe. ⁸ Ame kwaraperera rukando rutatu kwaHompa kwavino, ashi angupe yino tjutju. ⁹ Ano ngoli Karunga alimburura ashi, "nkenda yande ndyo ghuna hepa po ghunene, mbyovo shi nkondo dande kunene paghunene mukupira nkondo koye." Makura ame kuku pandayikira mukupira nkondo kwande, mposhi nkondo daKirisitusi divhuke mumwande. ¹⁰ Ame mbyo nahafera mukupira nkondo kwande, namatuka, namaudito, namahepeko, namatjida-tjido, ntani namuma upyakadi ghamwa Kirisitusi. Mbyoyvoshi ntjene mwato nkondo mumwande, ntani nikara nankondo dadinene. ¹¹ Ame kwakutumba naghumwande mbyo nakara ligova! Anwe mwantininiko niruwane vino, ndi anwe mwawapero kupandayika viruwana vyande. Nampili yira momo tupu nakara muntu wamavoko-voko, kwato opo nakushuvira nava apositoli venu vavanene. ¹² Viyivito vyaghu apositoli waghushilri kwaviruwananga nalididimiko lyalinene, naviyivito, navitetu, ntani namu viruwana vyankondo. ¹³ Anwe matungiko ghamasheshu tupu ogho mwapira kuwana kukwande, ogho natapa mbungankirishe nadintje, kapi nahepire mbatero yavitapa kukwenu? Ngupirenu po kwaghuno ghundyoni wande! ¹⁴ Kengenu! Ame kuna kuya kukwenu rukando rwautatu. Nampili weno kapi nashana kuya mupa mudigho, ame kapi nahepa vimaliva vyenu. Ame kuna hepako anwe naghumwenu. Mukondashi vanuke kapishi mbo varerango vakurona. Vakurona mbo varerango vanuke. ¹⁵ Kukwande ko ame ngani tapa navintje ovyo naweka naruhafo ntani nana ghumwande ngani kutapa kukwenu mukonda yamonyo denu. Nampili momo namuhora anwe ghunene, anwe karenu tupu nashihoro shashididi kukwande. ¹⁶ Vishuvenu vikare ngoli, ame kapi namuyitira ghudito. Ano ngoli ame kwakara naghukonentu waghunene, mbyo namukwata muvineya vyenu vyavinene. ¹⁷ Mpwali ghumwe ogho natuma aye kukwenu ogho aya mushakano limona lyenu ndi? ¹⁸ Ame kwatumine Titusi, kumwe naghunyendi ghumwe vaye kukwenu. Opo ayire Titusi aya mushakanine limona lyenu ndi? Ghukaro ogho aya kalitire Titusi kapi wakufana nawande ndi? Namena Titusi kapi twa kara mumpepo naghukaro ghumwe tupu ndi? ¹⁹ Nkene atughamba weno anwe kughayara ashi atwe kuna kukupopera kushipara shenu? Atwe kuna kughambera kushipara shaKarunga, kumbunga yaKirisitusi ashi navintje ovino tuna kughamba atwe vyakumunkondopeka. ²⁰ Ame nakara naghoma ashi pamwe kapi nganiya muwana yira momo naya mushuvire. Ndipo anwe ngamuya mona yira momo mwapira kuvishanena. Ame nakara naghoma ashi kuvhura ngani yamuwane munakara nadimutangu, namfudu, nandyorongani yaugara, namakutondororo, nakukurundira, naghushoti, nandino, ntani namapiyagano. ²¹ Ame nakara naghoma ashi nganiya kufa ntjoni opo nganiya kukwenu, kuna kuromba kwaKarunga wande nganiya kudidipite kushipara shenu. Ame kuna kara naghoma mukonda vantu vavangi kapi vashuva viruwana vyavo vyavidona ovyo kavaruwananga kapi vakushighura vatunde kuviruwana vyanyata narushonda naviruwana vyantjoni ovyo kavaruwananga pamuhovo.