¹ Ame kuna kuya kukwenu rukando rwaghutatu. Matjangwa kwatanta ashi, "Kehe dino nkango damu mpanguro daghuhunga kwara navambangi vaviri ndi vatatu." ² Opo nayire niya mudingure rukando rwaghuviri ame kwaya tapire marondoro kwavo varuwanango vyanyata, ntani ame nganiya tengeka kehe ghuno aruwango nyata, ntjene kapi ana kushayeka atunde kughudona, ame kuna kumurondora rukando rwaghutatu: Opo nganiya kapi nganiya mughupira po. ³ Mukondashi anwe kuna kushana muwane ghumbangi ashi Kirisitusi ndye aghambango kupitira mumwande. Ghuye kapishi mupira nkondo mukatjikenu. Nani ngoli ghuye kwakara nankondo dadinene mukatjikenu. ⁴ Nampili momo vamupampalilire kushikurushe mughupira nkondo wendi, ano ngoli ntantani weno ghuye kuna kara namonyo mukonda yankondo daKaunga. Natwe kapi tuna kara nankondo weno yira momo akalire Kirisitusi, natwe kumu tumona tuna kara namonyo kuna kuparuka kunkondo daKarunga yira momo akalire Kirisitusi. ⁵ Kukona-konenu naghumwenu, mukukenge ashi shimpe muna kara namapuliro lya ghushiri ndi. Kukona-konenu naghumwenu. Anwe kapi muna vidimburura naghumwenu ashi, shimpe Yesusi Kirisitusi mpwali mumwenu ndi? - Ntjeneshi, kapi mwayiva kuku kona-kona naumwenu, nkwandi kapi mwayiva kufunda masheteko. ⁶ Ame nahuguvara ashi anwe ngamu dimburura ashi atwe kapi ghatufunda masheteko. ⁷ Atwe kuna kuraperera kwaKarunga ashi kapi shi muruwane ghudona. Ame kapi naku raperera ashi tumoneke tupu yira twafunda masheteko. Nani ngoli, ame kuna kuraperera ashi ngamu ruwanene ghushiri, nampili tumoneke yira mbova ghadina masheteko. ⁸ Mukondashi atwe nakuvhurashi kurwanita ghushiri waKarunga, atwe kukondyera ghushiri waKarunga kehe pano. ⁹ Atwe kukara naruhafo rwarunene mukupira nkondo kwetu mposhi anwe mukare nankondo. Atwe mbyo tuna kuraperera nka ashi ndi mukare nankondo dakutikiliramo. ¹⁰ Ame mbyo naku mutjangera vino mpopano nakara ghure nanwe mposhi opo nganiya kapishi nganiya dameke muku ruwanita nkondo dande kukwenu - odo atapa Hompa kukwande ashi ditunge marutu ghenu akare nankondo, kapishi dakumu dyonaghura. ¹¹ Pukuhulilira, vaghunyande, karenu naruhafo! Kondyerenu litikiliromo, karenu nankondo, kuyendenu dimutjima kumwe, ntani karenu mumpora. Mposhi Karunga wambili and mpora ngakara kumwe nanwe. ¹² Kumororenupo nashihoro shaghupongoki. ¹³ Hompa Yesusi Kristusi amufere nkenda, shihoro shaKarunga, naMpepo muPongoki yikare kumwe nanwe namuvantje.