¹ Vaghunyetu, atwe kuna shana tumu tantere ko ovyo yaruwana nkenda yaKarunga munkirishe damu Makedoniya. ² Vavo kwakalire namahepeko ghamangi, mukonda yamaudito ghamanene naruhepo rwarunene, ano ngoli vavo kwatapire mbatero yayinene ghunene, mbyo vatapire limona lyavo lyalinene, nadimutjima dadiwa. ³ Ame mbangi yavo vavo kwatapire vyavingi ghunene dogoro mpopo vakahulira, hawe vaka pitakanitirepo nka ghunene, ntani vavo kwatapire mushihoro shavavene ⁴ vavo kwakudyambilire ghunene vatambure muligwanekero lyavo vatamburango vantu vaKarunga. ⁵ Vavo kwaruwanine kupitakana pavyo twatatilire ashi ndi mbyo varuwana, vavo pamuhovo kwakutapire kwaHompa ntani kukwetu yira momo avi shaninine Karunga. ⁶ Atwe mbyo tuna kukukorangeda ove Titus, ashi ngaghu tikitiliremo shiruwana osho shankenda mukatji kenu, yira momo ashitamikire pamuhovo. ⁷ Anwe muva ngagho kwanavintje ovyo mwakara navyo - mumapuliro, nakuyuvita, naghukonentu, nalikudidimiko, ntani nashihoro shenu kukwetu. Anwe karenu ngoli vatapi vamushiruwana shino shankenda. ⁸ Yino kapishi veta nakutapa kukwenu nani ngoli, ame kuna kushana tupu kusheteka shihoro shenu shakutapa vitapa mukushishetakanita nashi shavantu peke. ⁹ Anwe mwayiva nkenda yaHompa wetu Yesusi Kirisitusi. Nampili momo akalire ghuye mungagho, kwayire aya kare mukaruhepo mukonda yashihoro shendi kukwenu, mposhi ghuye akare muhutu anwe mukare muvangagho. ¹⁰ Mughukaro waku fana weno ame kuna kumupako tupu maghano ogho avhuro kumuvatera. Mwaka ghumwe ghuna kapitopo, anwe vakuhova ovo mwahoviro kutapa vitapa, mukondashi kwashanine mutape. ¹¹ Tikitenumo navintje ovyo mwatameka. Anwe mwakalire nashihoro shakuviruwana, kehe ghuno atape kutwara movyo aweka, mposhi muneyede ashi anwe kuvhura kuruwana ovyo mwatamikire. ¹² Ano ngoli ntjene shi shihoro shakutapa mposhili, Karunga nga tambura ghushwi wenu momo mwaghuwekera. Kehe ghuno akona kutapa mbyovyo aweka, kapishi ovyo apira kuweka. ¹³ Kwashino shiruwana ame kapi nashana shikare ureru kuvamwe ntani viditope kukwenu. Hawe, navintje vishetakane mughuhunga. Pantantani anwe muna kara nalimona lyalingi ghuwa ghunene ntjene muvatere vahepwe. ¹⁴ Mposhi ntjeneshi ngamu kara muruhepo ngava muvatera navyo vaweka, makura ngamu shetakane. ¹⁵ Yira momo tupu vatjanga ashi, "Ogho aku pongayikiro vyavingi kwato ovyo vyahupiropo, ntani kwagho aweko vyavi sheshu kwato ovyo avhulire kuhepa." ¹⁶ Atwe kupandura Karunga, mukondashi ana ragopeke Titusi aya muvatere yira momo twamu vateranga atwe. ¹⁷ Ghuye kapi ana kuya kukwenu ashi mbyovyo mwamushungida, ano ngoli nampili mwamwene naye kare avi tokomena. Naye kare ashana kuya kukwenu mushihoro shendi mwene. ¹⁸ Atwe kuna kumutuma kumwe naghunyendi ogho afumano ghunene mumbungankirishe nadintje mukonda yakuyuvita kwendi mbudi yaruhafo. ¹⁹ Ano ngoli kapishi mbyovino tupu, ghuye kwamu tovorora mumbungankirishe ayende kumwe natwe mushiruwana shankenda. Vino kwavi ruwananga tufumadeke Hompa, mukutapa ghumbangi washihoro shetu shakutapa kuva ghunyetu. ²⁰ Atwe kuyendita nawa viruwana vyakutambura vitapa mposhi kapishi vatupe ghuntjoni wakupongayika vitapa vino vyaviyingi ghunene. ²¹ Atwe kushana kuruwana ghuhunga, kapishi kushipara shaHompa tupu, nani nampili kumeho yavantu. ²² Atwe kuna kutuma ghunyetu ghumwe kumwe navano vaviri. Ghuye twamu kona-kona rwarungi mbyo twa muwana ashi ghuye kuvhura kumu huguvara muviruwana vyakuku shuva-shuva. Ghuye nampili weno kuna shana avatere ghunene mukondashi akara nalihuguvaro lyalinene mumwenu. ²³ Ogho Titusi, muruwani ghunyetu ntani ghumwe ogho atupango mbatero. Ovo vaunyendi, vantumwa vamu mbungankirishe. Vavo kwafumadeka Kirisitusi. ²⁴ Vatamburenu namavoko maviri nashihoro, neyedenu mbungankirishe nadintje dimone shihoro shenu osho twa kufumadekeranga atwe kukwenu ashi muvahunga.