¹ Vaghuyetu vakuhora, matumbwidiro ghano naghantje kwetu ghahamena, renkenu ngoli tuku kushuke kwakehe vino vyatunyateko parutu namudimutjima detu. Tukondyerenu ghupongoki nakutjira Karunga. ² Tutambure ko mudi mutjima denu! Atwe kwato ogho twa ruwana ghudona. Atwe kwato ogho twa remeka ndi kwato ogho twa shakana kehe vino. ³ Ame kapi nakughamba vino ashi kuna kumu pangura. Ame kare naghamba vino ashi atwe kwamuhora unene mudi mutjima detu ashi, ndi tukare kumwe kehe pano muliparu ndi mumfa ngatu kara kumwe. ⁴ Ame kwamuhuguvara unene, ntani ame kukuyuvha mfumwa unene mukonda yenu. Ame kuna kukuyuvha nkondo ghunene. Ame kuna kara naruhafo rwarunene muma udito ghetu naghantje. ⁵ Nampili opo twa yire kuMakedoniya, kapi twaya wanine lipwiyumuko. Ntani, twa gwanikilire namaudito ghavitjokongana navantu pamarutu ghetu avi tuyitili ruguvo naghutjirwe mudi mutjima detu. ⁶ Ano ngoli Karunga, ogho apamekango di mutjima davantu varuguvo, ghuye kwatupire nkondo opo aya tikire Titusi kukwetu. ⁷ Kapishi momo tupu ayire Titusi kukwetu mpo atu pire Karunga nkondo, nani ngoli naghupampi wenu ogho awanine Titusi kukwenu. Titusi aya tutantilire maudito ghenu, narunyando rwenu, ntani nashinka shenu shashinene kukwande. Ame ani kara naruhafo rwarunene. ⁸ Ame nampili momo yamu guvitire ntjangwa tumwa yande, ame kapi nakukuvera. Ame ani yakuvere tupu opo nayamonine ashi ntjangwa tumwa yande yina muguvita mudi mutjima, mushirugho shashifupi. ⁹ Ame weno nakara naruhafo, kapishi mbyovo muna kara naruguvo, nani ngoli ruguvo rwenu kuna mutwara muka kushighure dimutjima. Atwe kapi twa muyitilire maudito, ano ngoli anwe kwakalire naruguvo muhafere Karunga yira momo avishanena. ¹⁰ ruguvo lya shihoro shaKarunga kuyita likushighuro mutjima lya kuyita liparu, ruguvo lino muntu nakuvhurashi kukuvera. Ano ngoli ruguvo rwamughudyuni kuyita mfa. ¹¹ Kengenu ashi vinke lina yita ruguvo lya kutunda kwaKarunga mudi mutjima denu. Anwe kwashanine muneyede ashi kapishi muvandyoni kwavino. Anwe mwakara naghugara, anwe mwakara naghoma, anwe kuna kurura, anwe mwakara naghukonentu, ntani anwe kuna shana muruwane ghuhungami! Mwanavintje anwe kuna shana muneyede ashi muvandyoni kwanavintje. ¹² Nampili momo namutjangilire, kapi natambire ovo varuwanango ghudona, ndi ovo varuwana ghudona, nani ngoli kwashanine kumuneyeda ghuwa wenu ngamu kaghuku monene naghumwenu kushipara shaKarunga. ¹³ Ovino vina tupa ghupampi waghunene. vino vina tuhafita ghunene, tuna kara naruhafo rwarunene mukonda yaTitusi, mpepo yendi mwayitendeka ghunene anwe namuvandye. ¹⁴ Ano ngoli ntjeneshi ame namufumadeka kushipara shendi, ame kapi vyandyitira ntjoni. Yira momo tupu vyakara ovyo twa mutantere ashi ghushili, navi twa mufumadeka awe mwaTitusi navyo nka ghushilri. ¹⁵ Anwe kwamuyenda ghunene kumutjima, ntjene avhuruka kulimburukwa kwenu kwakunene namuvantje, omo mwaya mutambulire naghoma kumwe nautjirwe. ¹⁶ Ame kumpa ruhafo rwarunene mukondashi anwe kuvhura kumu huguvara mwanavintje.