¹ Atwe varuwani kumwe naKarunga, atwe kuna kumukorangedashi nkenda yaKarunga oyi mwatambura kapishi muyihepeke mavoko-voko. ² Karunga kwatantashi, "Pashirugho shashiwa nakuyuvire, ntani pashirugho shiliparu namupopilire." Kengenu, shirugho shashiwa shinatiki. Kengenu, shirugho shaliyovoro lyenu ntjoshino. ³ Atwe kapi tunakutura liwe mundyira yamuntu ashi ngapundukemo, kapi tunashana ashi viruwana vyetu ngavi shwaghuke. ⁴ Anongoli, muvininke navintje ovino twa ruwananga, atwe kuneyeda ashi vakareli vaKarunga. Atwe vakareli vendi mwanavintje mulididimiko, namumpatakani, namuvihuna, namu maghudito, namaghupyakadi, ⁵ nakutoghona, namudorongo, namundyorongani, namuviruwana vyarukisho, nakupira kurara matiku naghantje, namundjara; ⁶ namughukushuki, naghukonentu, namukukukorerera, namughunongo, namuMpepo yakuPongoka, namushihoro shakutikiliramo. ⁷ Atwe vakareli vendi munkango daghushili, dankondo daKarunga. Atwe kwakara navirwita vyaghuhungami kulivoko lyarulyo nalilya kurumontjo. ⁸ Atwe kuruwana kehe pano vatufumadeka ndi vatushwaghure, vatughambe mwamudona ndi mwamughuwa. Atwe kutu rundira kehepano ashi twapuka naningoli atwe vantu vaghushili. ⁹ Atwe kuturuwana vyavidona yira kapi vatuyiva naningoli tuvandambo kukwavo. Atwe kuruwana yira twafa nani - tuvayumi - kuna kumona! Atwe kuruwana yira vakadorongo anongoli kapi twafa. ¹⁰ Atwe kuruwana naruguvo anongoli atwe kukara muruhafo kehe pano. Atwe kuruwana yira tuvahepwe, mposhi vantu vavangi vakare nalimona. Atwe kuruwana yira kwato ovyo twaweka anongoli atwe twaweka navintje. ¹¹ Atwe kwadukulira ghushili naghuntje, anwe vakaKorinte, ntani atwe mbyo twa muhora nadimutjima detu nadintje. ¹² Atwe kapi tunamulimbika, naningoli naghumwenu munakukulimbo nadimutjima denu. ¹³ Muku vyuta ruvoko - Ame kuna kughamba nanwe yira muvana vande ashi - nanwe tuhorenu ghunene, tutamburenu. ¹⁴ Walye mwakambadaranga kuruwanena kumwe navantu vakupira mapuliro. Ghukwavo munke wakaro pavahungami navakorokotji? Ntani ghukwavo munke wakaro paghukenu and mundema? ¹⁵ Ndi likuyuvho munke lya karo pakatji ka Kirisitusi navantu vakavipempa? Ndi panke vakuyukira mundiro vapuli navo vakupira mapuliro? ¹⁶ Likuyuvho munke lya karo pakatji ka ntembeli yaKarunga and ntembeli yaSatana? Atwe ntembeli yaKarunga wamonyo, yira momu atanta Karunga ashi: "Ame ngani tunga mumwavo ntani ngani yenda ghura mukatji kavo. Ntani ame nganikara Karunga wavo, vavo ngava kare vantu wande." ¹⁷ Karunga kuna kutanta ashi, "Tundenumo mukatji kavo, kukarerenu," Mposhi, "Kapishi mukwate kuvininke vyakunyata, ame ngani mutambure. ¹⁸ Makura ame ngani kare Shenu, anwe ngamu kare vana vande vavakafumu navavakamali,"