¹ Atwe twayivashi ghano marutu ghetune kwakara tupu ndyugho dapano palivhu ngagha kadyonaghuka po, anongoli atwe ngatu katunga mundyugho yanaruntje. Mumundi ogho vapira kutunga vantu namavoko, mumundi wanaruntje muliwiru mwaKarunga. ² Weno mbyo tunakukema, mukondashi tunashana vatughupe mo tudirukire mumundi wetu muliwiru. ³ Atwe kunashana vatudwateke rutu rwarupe mposhi kapishi ngatukare nka muhere-here. ⁴ Weno atwe shimpe kunakara namarutu ghapalivhu, mbyo tunakukema, mukonda yamaghudito. Atwe kapi tunashana vatu shuture runo rutu. naningoli, kuna shana vatu dwateke marutu ghakukarerera po ghamuliwiru, makura rutu rwamonyo wanaruntje ngarumine rutu rwakufa, rwapanyama. ⁵ Karunga mwene ndye atuwapayikiro shino shiruwana shashinene ghunene, mbyo atupa Mpepo yendi yikoreke shiruwana shakumeho ngashi tikiliremo. ⁶ Atwe kwakara nalihuguvaro lyalinene. Karenu muyiveshi shirugho shino tunakara mumarutu ghapalivhu, atwe ghure ghunene tunakara naKarunga. ⁷ Atwe kwaruwananga vyamumapuliro, kapishi kwavi twamonanga namantjo. ⁸ Atwe kwakara nalihuguvaro lyalinene. Mbyongoli tunashana po ashi ndi tutunde muno mumarutu ghetu tukakare kumwe naHompa. ⁹ Oshino ntjo shitambo shetu, tukareshi ghure tunakara naHompa, ndi kumwe naye, atwe tunahepa kumutanga akare naruhafo. ¹⁰ Mukondashi natuvantje ngatukamoneka kumeho yashipuna shampanguro yaKristusi, kehe ghuno ngakawane ovi aruwanine mughukaro warutu rwendi yira momo aviruwanine mwene, vikare vyaviwa ndi vyavidona. ¹¹ Mukondashi, atwe twayivashi kutjira Hompa vinke shina kutanta, atwe mbyo tunakukambadara kupukurura vantu. Atwe Karunga atuyiva nawa-nawa, ntani ame nahuguvara ashi nanwe mwatuyiva nawa-nawa mudimutjima denu. ¹² Atwe kapi tunashana tukufumadekere papenu, ashi atwe vantu vavawa. Naningoli, atwe kuna shana mukuyuvhe mfumwa mukonda yetu, mposhi muwane lilimbururo lyaghuhunga, kwavo vakukumonikitira limona lyamarutu lyahanashi lyakumutjima. ¹³ Ntjeneshi atwe tunapiyagana mundunge detu, ovyo vikare vyetu naKarunga; anongoli ntjeneshi tuvawalika pandunge, ovyo vikare maghuwa ghamumwenu. ¹⁴ Atwe kwatu pangeranga shihoro shaYesusi omo atuhora, mukonda atwe twayiva vino ashi: Muntu ghumwe tupu ndye afero navantje, makura vantu navantje mbyo vafa kumwenaye. ¹⁵ Kristusi kwafera navantje, mposhi ovo vakaro namonyo, kapishi vaparuke liparu lyavavene anongoli vakarere po ogho afiro mbyo akavhumbuka. ¹⁶ Nakonda yino, atwe kapi tunakumona nka kuviruwana vyavantu, nampili naKristusi naye mo twamumonine ngoli paghuntu. Ano ngoli ntantani kapishi mo tunakumumona weno nka. ¹⁷ Mpongolishi, keheghuno wakukara mwaKristusi, akona ntani kukara muntu wamupe. Muntu wamukuru-kuru akona kushaghapo. Kengenu, vavo vanakara ngoli vavape. ¹⁸ Vininke navintje vino kwatunda kwaKarunga ndye aviruwano. Karunga kwatu yita tuyagwanekere kumwe naye kupitira mwaKristusi mbyo atupa shiruwana ashi vantu vagwanekere naye kupitira mwaKristusi. ¹⁹ Vino kuna kutantashi, Karunga kwakalire mwaKristusi agwanikitire ghudyuni adongonone po ndyo davantu avayite kwamwene, ghuye kapi nka avarulire viruwana vyavo vyandyo. Mbyo atupa tuyuvite mbudi yendi yaligwanekero. ²⁰ Atwe kwakarerapo Kristusi, Karunga kunashana aghambe nanwe kupitira mumwetu. Atwe kuna kumushungida mulidina lyaKristusi ashi: "Tamburenu mbudi yaKarunga!" ²¹ Kristusi kapi akalire naghundyoni kehe ghuno. Karunga mbyo amutura akare ntjambo yandyo detu. Karunga kwaruwanine vino mposhi atwe vandyoni ngatukare tuvahungami kwaKarunga kupitira mumwendi.