¹ Mpo ngolishi, Karunga kwatupa shino shiruwana shendi, yira momo ghatupa nkenda yendi, mpo ngolishi kapishi tudombe dimuntjima. ² Atwe twashuva viruwana vyamukagholya- gholya navivyakuyita ntjoni. Atwe kapi nka twakara navipempa ntani ndi tupukite nkango daKarunga. Naningoli atwe kushorora ghushilri, tukupopere kushipara shaKarunga kwakehe muntu ogho anakuyuvho liywi lyamumutjima wendi. ³ Ano ngoli ntjeneshi mbudi yetu yakara mulihoramo, nkwandi kwahorama kwavo ngava kadyonaghuko. ⁴ Mukonda yino, mupangeli wamudona wamuno mughudjuni ghuye adyonaura ndunge davo vapiro kupura. Vino kwaviruwana, mposhi vapire kumona ukenu wambudi yaruhafo yashikoda shaKirisitusi, ogho akaro shishwi shaKarunga. ⁵ Atwe kapi twaku yuvitanga naghumwetu, atwe kuyuvita ashi Kirisitusi ndyeHompa, atwe naghumwetu vakareli venu morwa Yesusi. ⁶ Karunga ogho aghambiro ashi, "shite ngashitema kutunda mumundema." Ghuye ndye ghatuliromo shite shaghukenu wendi shiteme mudimutjima detu,mukutupa shite shaghukonentu shashikoda shaKarunga kumantjo ghaYesusi Kirisitusi. ⁷ Ghungavo wapa Mpepo atwe kwaghushimbira mumarutu ghalirova, mposhi vivhure kumoneka ashi nkondo dadinene po daKarunga kapishi detu. ⁸ Atwe kwakara muviponga kehe pano, ano ngoli kapi vatudininina po. Atwe kwakara muruhepo rwarunene, ano ngoli kapi ghatushuvilira. ⁹ Atwe kwakara mumahepeko ano ngoli Karunga kapi atushuva; kuturuwana vyavidona ano ngoli kapi vatudyonaura po; ¹⁰ kehe pano atwe kwashimba mfa daYesusi mumarutu ghetu, mposhi monyo waYesusi nagho ghumoneke mumarutu ghetu. ¹¹ Atwe mughukaro wetu naghuntje kwakara tupu mumfa mukonda yaYesusi, mposhi monyo waYesusi ghumoneke mumarutu ghetu ghano ghaku fa. ¹² Vino kutantashi mfa kuna kuruwana mumwetu, mposhi monyo kuna kuruwana mumwenu. ¹³ Matjangwa kwatanta ashi: "Ame kwapura, mbyo nakuvighamba." Mukonda yaMpepo yino yamapuliro natwe mbyo tunakuvi ghamba, mukondashi natwe twapura, ¹⁴ mukonda atwe twayiva ashi Karunga ogho avhumburo Hompa Yesusi kughufe natwe nka ngaka tuvhumbura kughufe kumwe naYesusi makura ngatu yende tukakare kumwe naye. ¹⁵ Vino navintje kushoroka mukonda yenu, yira momo tupu yina kuvhuka nkenda yaKarunga yikuhanene muvantu vavangi monka vantu vavangi ngava shamberera nakufumadeka Karunga. ¹⁶ Nakonda ndyoyino atwe nakufashi ghunye. Nampili ghadyonaghuke marutu ghetu ghapa nyama, monyo detu dinakara dadipe diwaperere. ¹⁷ Ghano maghudito, ghamareru kuna kutuwapayikira shikoda shanaruntje shashinene shakupira kuvhura kutanta. ¹⁸ Atwe kapi tunatamba vininke ovyo vina kumoneko weno, atwe kwatamba vininke vyakupira kumoneka. Mukondashi vininke vyakumoneka kapi ngavikarerera po, vyakupira kumoneka ngavikarerera po nanaruntje- nanaruntje.