¹ Atwe shimpe tutameke nka kukunenepitira viruwana vyetu naghumwetu ndi? Ndi atwe tunahepa kutjanga ntjangwatumwa ditunde kukwetu ndi ditunde kukwenu mposhi mutantere vaghunyenu vyakuhamena viruwana vyetu, vino mbyo munahepa ndi? ² Anweko naghumwenu anwe ntjangwa tumwa detu damughudyuni daviruwana vyetu, odo vatjanga mudimutjima detu, mbyovavi yiva navantje, ntani yayo kuyivarura navantje. ³ Mwayiva nawa-nawa ashi anwene ntjangwatumwa oyo yatundo kwaKirisitusi, oyo yapitiro mumwetu. Yayo kapi vayitjanga nashitjangito shainki naningoli naMpepo yaKarunga wamonyo. Ntani nka yayo kapi vayitjanga pashitafura shaliwe, naningoli kwayitjanga mudimutjima davantu. ⁴ Atwe vino kuvighamba nalihuguvaro lyalinene mukondashi atwe twahuguvara Karunga morwa Kirisitusi. ⁵ Atwe kapi twakara naghukonentu wakuruwana vino viruwana vitunde mumwetu ashi vitompoke. Naningoli, ghukonentu wetu wavino viruwana kwatunda kwaKarunga. ⁶ Karunga ndye ghatuturo mushiruwana tukare vakareli vendi mulikukwatakano lyendi lyalipe. Lino likukwatakano lyalipe kapi lyatunda kuveta oyo vatjanga naningoli kwatunda muMpepo. Mukondashi veta oyo vatjanga yayo kudipagha, anongoli Mpepo kutapa monyo waliparu. ⁷ Veta kwayita mfa - yayo kwayitjanga pavitafura vyaliwe - mposhi yitape shikoda shaKarunga kwaMoses akare mushikoda mposhi vaIsraeli kapishi vawape kukenga kushipara shendi. Mukonda shikoda osho shakaliro kushipara shendi, kapishi shikoda shakukarerera po, shakutundapo. ⁸ Likukwatakano olyo yayitapo Mpepo ngali runduruka lipitakane po pavino? ⁹ Ntjeneshi viruwana vyaveta oyo yapangurango vantu kwakara nashikoda shaweno, kutantashi shikoda shaviruwana vyaMpepo oyo yatapango shiruwana shaghuhungami kuvantu vakare vanahungama kwaKarunga wakurundurura wapitakana ghunene? ¹⁰ Mpo ngolishi, shikoda osho shahoviro kukarako ntjeneshi kushishetakanita nashino shantantani nakukuyendashi, shikoda shantantani shapitakana ntani ghunene- ghunene. ¹¹ Ntjeneshi ovyo vyashaghopo kwakalire nashikoda, vino vyakukarerera po vyavyo kwakara nashikoda shaghunene- ghunene! ¹² Mukondashi atwe tunakara nalihuguvaro lyalinene, mbyo tunakughambera naghupampi waghunene. ¹³ Atwe kapi twafana yira Mosesi, ogho ghafikiro shipara shendi mposhi vaIsraeli kapishi vamone shikoda omo shina kudongonoka po. ¹⁴ Maghayaro ghavantu ghakumanga. Dogoro mpopano, ntjene avavarura veta damu Tesitamente yayikurukuru, shimpe ndavakarera nakawiwiri pamantjo. ¹⁵ Mantjo ghavo kapi apahukire, dogoro opo ayire Kirisitusi ndye ayapahuliro mantjo ghavo vatameke kumona. Nampili weno namuntji, ntjene kuna kuvarura veta daMosesi, dimutjima davo kukara yira kunadifikilili. ¹⁶ Ano ngoli ntjeneshi muntu ghakushighura ghavyuke kwaHompa, ntani ghanakumanguruka ghavhure kupahuka ghamone. ¹⁷ Weno Hompa Mpepo. Kehe kuno yina kara Mpepo yaHompa, nko kuna karo limanguruko. ¹⁸ Weno natuvantje, tunapahuka kuna kumona, shikoda shaHompa. Atwe weno tunakutjindyi tunafana shishwi shaHompa shakutunda shikoda yenda shikoda,Hompa ogho ghakaroshi Mpepo.