¹ Weno kuna tokora naghumwande ashi ruyendo rwande rwaghuviri kapi nashana kuya ngani yamupe udito. ² Ntjene ngani muyitira ruguvo, are ghumwe ogho ngaya vhuro kuya ntambura naruhafo, ntjeneshi kapishi mbovo vantu nayitiri ruguvo. ³ Ame mbyo naku tjangera yino ntjangwatumwa ashi ame kapi nashana kuya nganiya kare muruguvo nani ngatuya kare kumwe muruhafo. Ame nakara nalihuguvaro ashi ntjeneshi ani kara naruhafo nanwe ngamu kara naruhafo kumwe name. ⁴ Ame kwatjangilire kukwenu ame kuna kara mumaudito ghamanene, nampatakani yamumutjima kumwe namaruntjodi mumantjo ghande. Mpongoli ashi kapi nashanine kumuyitira maghudito. Naningoli, ame kwashanine kumuneyeda ashi ame kwakara nashihoro shashinene ghunene kukwenu. ⁵ Ntjeneshi ghumwe amuyuvita kukora, kapishi ame tupu anakuyitira kukora, hawe namuvantje - ndi nitante ashi vamwepo tupu - nipire kuyamupakerera. ⁶ Kwamuntu waweno ntjeneshi vantu vavangi vanayiva ghundyoni wendi mpanguro namatengekero ghendi ghanagwana po. ⁷ Weno ntantani mulivhango lyakurenka ashi mumupe matengekero, munahepa kumughupirapo ntani nka munahepa kumushengawida. Munahepa kuruwana vino mposhi kapishi mukare naruguvo rwarunene. ⁸ Ame kuna kumukorangeda nakumupampilikida ashi munahepa kumuhora ghunene. ⁹ Yino ndyokonda natjangere yino ntjangwa tumwa, nisheteke mapuliro ghenu ashi kuvhura mulimburukwe mutikitemo navintje ndi. ¹⁰ Kehe ghuno ngamughupirapo anwe, name nganimughupirapo. Ntjene ngapakara keheshino nganidongonona po - ame kushidongonona po - mukonda yenu kushipara shaKirisitusi. ¹¹ Vino kuviruwana mposhi Satana kapishi awanenkondo atufunde. Mukondashi twayiva maghano ghendi. ¹² Opo nayire mumbara yaTorowa ashi niyayuvite mbudi yaruhafo yaKirisitusi, Hompa kwagharulire livero niruwane shiruwana shendi. Anongoli mumutjima wande kapi mwakalire mbili mukondashi kapinaya muwanine mo ghunyande Titusi mumbara. ¹³ Makura mpo nayavashuvire mo vavo anipitakana kuMakedoniya. ¹⁴ Anongoli ame kupandura kehe pano kwaKarunga, ogho atupititirango mwaKirisitusi kehe pano tukare vafundi. Ntani Karunga kuvatera kuhanita mbudi yaKirisitusi kuvantu navantje yira momo lyayendanga lidumba lyakunuka rupekwa. ¹⁵ Atwe vitutumukita vyalidumba lyaliwa vyaKirisitusi vyakufumadeka Karunga, lyalyo kunukira navantje ovo ngavakaparuko navongava kadyonauko. ¹⁶ Kuvantu ovo ngava kadyonauko, lino lidumba ngali vatwara kumfa dadidito. Kwava ngava kaparuko lino lidumba ngali vatwara kuliparu lyaliwa. Are oghu vyawapera vyaweno? ¹⁷ Vantu vavangi kukambadara kehe pano ashi vawane limona lyalingi mukuyuvita nkango daKarunga. Naningoli, atwe atuma Karunga, atwe kuyuvita mbudi yaruhafo yaKirisitusi, yira momo yatunda kwaKarunga, naKarunga ndyembangi yetu.