¹ Mukonda shi, Kirisitus kwayuvire kukora parutu muno mughudyuni, nanwe kuwapayikirenu muku gwanekera narunyando yira momu ayuvire naye. Muntu waku kara murunyando kuneyeda ashi ghuye kwashayeka kuruwana vyandyo ntani naghurunde. ² Vino kwatanta ashi, muntu waweno, liparu lyendi naghukaro wendi naghuntje wapalivhu, kwato kukara nalidovo nalimona lyamu ghudyuni, nane ngoli ghuye kukara tupu muntu waku limburuka naku tikitamo shiruwana shaHompa Karunga. ³ Ame kuna kumu tantera ashi virugho vyakare vina kapito anwe kamu ruwananga viruwana vyaghuPwagani naghurunde vya: rushonda naruntjo, nalidovo, naghunkorwi wamarovhu, mankwata namakurulya, ntani naku karera vaKarunga vavimpempa vaku pira mutompo. ⁴ Pa ruvede runo rwantantani vaholi venu kuna tetuka ashi mukonda munke muna piri kuku pakerera kumwe navo muruwane ghurunde naghupiki-piki ogho kamu ruwananga pakare, ntantani weno vavo kuna kumu ghamba mwamudona kumwe naku mushwaghura. ⁵ Ano ngoli shirugho shampanguro davo kuna kuya ntani papepi shina kara, vavo ngava ka tapa ghumbangi kuviruwana vyavo vyaweno kushipara shaHompa Karunga waku pangura vayumi nava fe. ⁶ Mukonda ndyoyino Yesus Kirisitus kwayendire aka yuvite Mbudi yaRuhafo kuva fe mushirongo shava fe, mpo ashi, navo ngava kava pangura kutwara muviruwana vyaghukaro wavo opo vakalire namonyo pano pantunda yalivhu, mpo shi navo ngava kawane monyo wanaruntje waku tunda kuMpepo YaKuponga yaKarunga. ⁷ Ghuhura waghuno ghudyuni papepi ghuna kara. Mpo ngoli ashi karenu muna kotoka, ntani karenu muna vangara ntani muna hepa kuraperera kehe pano. ⁸ Ntani nka shashinenepo kwanavintje, karenu nashihoro ghunene kwakehe ghuno wamumbunga yenu, mukondashi shihoro kughupapo ndyo dadiyingi ghunene. ⁹ Anwe muna hepa kutambura vagenda, naku tapa mararo mumandi ghenu, naku vatekura nawa, ntani naku tapa ndya kukwavo anwe mwahana kuvhunguta. ¹⁰ Kehe ghuno kwawana ghushwi kwaHompa Karunga, mwahepa kuruwanita ghushwi wenu, kehe ghuno kutwara mulipuro lyendi, muku tapa mbatero yayiwa kumbunga, kutwara munkenda yaHompa Karunga yayinene. ¹¹ Kehe ghuno waku ghamba kumbunga yavapongoki, ana hepa kughamba kutwara munkondo yankango daHompa Karunga. Kehe ghuno akaro naghushwi waku tapa mbatero, ana hepa kuruwana weno kutwara munkondo yankango daHompa Karunga. Anwe muna hepa kuruwana navintje vyaweno vikare mughuhunga, ntani mutape mfumwa kwaHompa Karunga kupitira muviruwana vyamuyogholi wetu Yesus Kristus. Mfumwa nankondo dadinene navintje kwahamena kwaYesus Kirisitus. Amen. ¹² Vaghunyande vakuhora, kapi shi mutetuke ashi mukonda munke muna kupitira mumundiro namumaghudito ghaweno makura mupire kukara nankondo, lipuro lyenu mwaKirisitus lina hepa ntani kuyenda mumundiro, ntani likara lina koro. ¹³ Nanwe karenu ngoli, nkene muna kara mumaghudito ghaweno, anwe karenu naruhafo rwarunene mwaKirisitus, mukondashi nanwe ngamu ka kara naruhafo rwarunene ntani ngamu kapembura opo nga shoroka Yesus Kirisitus muyogholi wetu mughuyerere wendi. ¹⁴ Nkene ngava mushwaghura naku mutuka mukonda yalidina lya Yesus Kirisitus, anwe vantu valirago, mukondashi Ghuyerere naMpepo yaHompa Karunga mpoyili papenu. ¹⁵ Anwe karenu namaghudito, ngoli kapi shi mukonda yaku dipaya, naku vaka, naku ruwana ghurunde ndi mukonda yaku kutura munkango davantu. ¹⁶ Nane ngoli anwe karenu namaghudito mukonda yalipuro mwaKirisitus, ntani anwe kwato kukufa ntjoni; nane ngoli, anwe kufumadeka naku tapa mpandu kwaHompa Karunga virugho navintje mukonda yalidina lya Yesus Kirisitus. ¹⁷ Ruvede runo Hompa Karunga kuna kupangura vantu vamu mundi wendi, ntani ghuye kuna kutameka kuwapeka munda yamu mundi wendi ghukare ghuna wapa. Nkene shi mpanguro yaHompa Karunga yaku vantu vendi vavahungami mo yina fana weno, weni omo ngayi kafana mpanguro yavantu vavarunde ovo vapiro kutambura Mbudi yaRuhafo, vaku pira kulimburuka kwaHompa Karunga? ¹⁸ Matjangwa kwatanta ashi, "Nkene shi mpanguro yavahungami kuna ditopa weno muku wana liparu, mpanguro yavarunde navadini Karunga weni omo ngava kapitamo ngava ka shenduke vyaweno?" ¹⁹ Mpo ngoli shi kwavo vana kuhepo paweno mukonda yaviruwana navipanga vyaHompa Karunga, vatwikire ngoli naku didimika vahuguvare naku tapa monyo davo kwamushiti wavo wankondo makura vavo vakare ngoli mumwendi.