¹ Vakadi vavaKirisite vaku kwara muna hepa kufumadeka naku limburuka kuva ka fumu venu. Anwe mwahepa kuruwana vyaweno nampili vaka fumu venu kapi vapura mwaKirisitus, mposhi ngava mone lipuro lyenu naghu karo wenu waghuwa, navo ngava tambure nkango daHompa Karunga. ² Varume vavaHedana vaku kwara vakadi vavaKirisite kuyoghokera mulipuro lyava kadi vavo mukonda yankwara navo kuwana monyo waghupe mwaKirisitus. ³ Vakadi vavaKirisite muna hepa kuwapa naku moneka nawa parutu ntani namunda yamutjima muneyede ghukaro waghu hunga kumbunga, kapi shi kuhokwa tupu ghufughuli wapa rutu, nahuki, namandwara, namakwarara, naviranda ntani navidwata vyapa rutu. ⁴ Nane ngoli, karenu muna wapa munda yamutjima, shanenu muwane ghuwa waku karererapo naruntje ntani karenu nampepo yayiwa yambili namfumwa ntani naku kudidipita kushipara shaHompa Karunga. ⁵ Shirugho shina kapito vakamali vavaKirisite vamapata kava dayanga nkedi vaneyede ghukaro waghuwa naku tapa mfumwa nashikoda kunkwara davo kushipara shaHompa Karunga, ntani mukamali kutapa mfumwa kwanturaghumbo wendi wapa lipata. ⁶ Mukonda yaku daya nkedi naghukaro waghuwa Sara mugholikadi waAburahamu ka yitanga wendi Aburahamu wapa lipata ashi Hompa wendi. Weno anwe muna kara vana vaHompa Karunga vavakamali muna hepa kudaya nkedi naku fumadeka vakafumu venu vapa lipata mukondashi anwe mwapongoka. ⁷ Nanwe nka, vakafumu vapa mapata muna hepa kutunga mandi ghenu nashihoro naghukaro waghuwa wavanturaghumbo vapamapata, ntani muna hepa kutapa shihoro kuvagholikadi venu vapa mapata, ntani muna hepa kuyiva di mutjima naghu karo wavo ashi kapi vakora ntani kapi vakarako. Nturaghumbo walipata kwahepa kutapa shihoro namfumwa kwamugholikadi walipata, mukondashi naye kwawana ghupingwa wankenda yaHompa Karunga, ntani naye ngaka kawana monyo wanaruntje. Muna hepa kuruwana vyaweno mukare mpora mulipata, mposhi ndapero yoye mukafumu yi ka tike kwaHompa Karunga, ntani naka didishi ku limbika mutjima wamugholikadi walipata, kuvhura kuyimika ndapero yoye yipire kutika kwaHompa Karunga. ⁸ Mbudi yakuhulilira, naku tapa kwakehe ghuno wamu mbunga yenu, karenu kumwe tupu muku kwata kane, ntani karenu nankenda nambili yamu mutjima, ntani karenu nashihoro kwakehe ghuno wamu mbunga, ntani karenu naliruwaneno kumwetupu lya mumbunga yenu, ntani karenu naghu karo waku kudidipita kumbunga. ⁹ Kwato kuvyuta rughoko kuvantu vaku ruwana ghudona kukwenu, ntani kwato kutuka vantu vaku mutuka naku mushwaghura, ntani kwato kuku hokwa-hokwa kuruwana ghudona. Nkene vantu kuna ruwana ghudona kukwenu, anwe kuva shwera lirago ngava wane matungiko, oshino ntjo shitambo mwayera mumbunga yaHompa Karunga, mposhi nga mukawane ghupingwa namatungiko ghaku meho. ¹⁰ Karenu naghukonentu muyive nkango odo vatjanga mumbapira yaMapisarome ashi, "Nkene shi ove kwahora kuparuka liparu lya liwa namuruvede rwaruwa rwaku meho nkwandi ove wahepa kushayeka kuruwana ghudona, ntani naku shayeka kughamba vimpempa. ¹¹ Ghuna hepa kutjindja ghukaro ghoye: kushayeka kuruwana ghudona kuvantu ntani kutameka kuruwana ghuhunga. Ghuna hepa kuruwana mbili nampora kuvantu navantje yitikiliremo. ¹² Mukondashi Hompa Karunga kukenga navintje vyamunda yamutjima naghukaro ntani naviruwana vyavantu, ntani Ghuye kuyuvha nkango nandapero davapongoki kwavyo vana kushungida, ntani Hompa Karunga kutapa ovyo vana shungida vana vendi kukwendi. Ano ngoli Hompa Karunga kwato kulimburura ndapero davantu vaku ruwana ghurunde." ¹³ Are waku vhura kushayekita viruwana vyenu vyaghuhunga nkene shi anwe kuna tokora kuruwana muyende kumeho? ¹⁴ Nkene kuna gwanekere namahepeko mukonda yaku ruwana ghuhungami, anwe vantu valirago. Ntani anwe kwato kukara naghoma kwakehe vino vatjira navantje vyaku ruwana ghudona kuvantu. Anwe kwato kukara naghoma naghutjirwe. ¹⁵ Nane ngoli, anwe karenu nashihoro shavapongoki vaku fumadeka Yesus Kirisitus Muyogholi wenu akare munda yamutjima wenu. Karenu muna kuwapayikiri muku tapa lilimbururo lya ghuhunga kwakehe ghuno waku pura vyaku hamena lipuro nalihuguvaro lyenu mwaKirisitus. Kudidipitenu mutape lilimbururo lya ghuhunga mumbili namfumwa. ¹⁶ Karenu yira vantu vaku pongoka vaku ruwana ghuhunga, mposhi nkene ngava mutwenya ashi anwe vantu vavarunde mukonda yaviruwana vyenu vyaghuhunga mwaYesus Kirisitus, vavo ngava fa ntjoni vavene opo ngava mona ghukaro naviruwana vyenu vyaghuhunga mwaKirisitus. ¹⁷ Nawa ngoli, nkene shi Hompa Karunga ndye avi pango, ashi vantu vendi vayende mumahepeko mukonda yaku ruwana ghuhunga, kwapita kana omo muruwana ghurunde. ¹⁸ Karenu muyive ashi Yesus Kirisitus kwafera vantu vandyo navantje rukando rumwe tupu. Yesus Kirisitus kwahungama ntani kwato ndyo, Ghuye mbyo afera vantu vandyo, mposhi vantu vandyo vakare vana hungama, kushipara shaHompa Karunga. Ghuye kwafire mfa dapa rutu pasikurushe, kuruku rwamayuva matatu Mpepo yaKarunga ayi muvhumbura kughufe. ¹⁹ Mpepo yaKarunga kwatapire nkondo kwaYesus Kirisitus, aka yuvita Mbudi yaRuhafo kuvantu vamu dorongo vamanguruke vatunde mumango yaMpepo dadidona. ²⁰ Shirugho shina kapito vantu kapi valimburukire kunkango daHompa Karunga, Ghuye kwatumine Nowa ashonge wato waghunene, ntani Hompa Karunga kwakalire nalididimiko ashi vantu ndi vaku shighure vashayeke ghurunde, anongoli kapi valimburukire kunkanga dendi, Ghuye kwapopilire tupu monyo davantu vaku tika ku- vatano nava tatu - mbo tupu vaparukiro kuruhandyo rwamema. ²¹ Liyoyero lya mumema kuna kara shiyivito shakudongononapo ndyo davantu - kapi shi mema ghaku kusha rudiro rutunde parutu - nane ngoli shiyivito shaliywi lya mumutjima shaku neyeda ashi ndyo detu dina dongononapo dina tundupo - kupitira mumfa namulivhumbuko lya Yesus Kirisitus. ²² Kirisitus kwaronda muliwiru mbyo aka shungira kulipuna lyaghu-Hompa kuru lyo rwaVashe, kwaHompa Karunga. Nkondo daku pangera ghudyuni namapangero, nava Engeli navantje kwadi tapa kwaKirisitus.