¹ Weno shuvenu ngoli ghudona naghuntje, shuvenu vimpempa, shayekenu kuvi kupaka, shayekenu mfudu ntani shayekenu kurundira vantu. ² Anwe karenu ngoli yira vakeke, vaku yamwa mashini ghapa mpepo nkene ndjara, mpo shi ngamu kure nga mukuronge nkango daghushili ngamu kawane monyo wanaruntje, ³ ruwanenu vino mukondashi anwe mwawana kare monyo waghupe ntani mwamona nkenda yaHompa Karunga. ⁴ Yenu namuvantje kwaHompa ghuye ndye liwe lya monyo lyaku ntji yalitungo lya ndyugho olyo vashwena vatungi, anongoli Hompa Karunga mbyo ali toghorora likare namulyo waghunene kukwendi. ⁵ Anwe kwafana yira mawe vatunga ndyugho mbyo mwakara ntembeli yaMpepo yaKupongoka mbyo mwakara mbunga yavaPirisiteli vakupongoka kwaHompa vaku tapa ndjambo yaku pongoka yaku yenda Hompa Karunga kumonyo kupitira mwaYesus Kirisitus. ⁶ Matjangwa kwaghamba nkango daghushili ashi: "Kenga, Ame kuna kutura liwe mulikovhu muSiyoni, liwe lyamu lyo ghunene vatoghorora lya kwato ndyugho kuntji. Kehe ghuno waku pura mumwendi kapi nga kara nantjoni." ⁷ Hompa Karunga kutapa mfumwa kwavo vaku pura muliwe lya monyo, Yesus Kirisitus. Ano ngoli kwavo vapiro kupura nakutambura nkango dendi, ghuye kwaghamba ashi, "Liwe olyo vashwena vatungi vandyugho, weno lina kara liwe lya monyo lyamu lyo ghunene kumutwe wandyugho," ⁸ ntani kwaghamba nka shimpe ashi, "Lino liwe ngava pundukamo ngava remana ntani ngava were palivhu." Vavo ngava punduka ngava wera palivhu mukondashi kapi valimburuka kunkango dendi - Hompa Karunga mo ana kutanta weno. ⁹ Weno muna kara vantu vaHompa Karunga, mbunga yendi yavapirisiteli, muhoko waku pongoka, ngamu yuvite Mbudi yaRuhafo yavitetu, yaku tunda kukwendi ogho amuyito mutunde mumundema, muye mushite shaghu kenu wendi. ¹⁰ Pakare anwe kwakalire vantu vamaghoko-ghoko, ntantani weno muna kara muhoko waHompa Karunga. Pakare kapi mwawanine naku yiva nkenda yaHompa Karunga, ntantani weno muna wana nkenda yaHompa Karunga. ¹¹ Vaghunyande vaku hora, anwe kapi shi vantu vamuno mughudyuni anwe vantunda virongo, ame kuna kumu shungida mushuve madogho ogho apangerango ghuno ghudyuni, ghaku rwanita Mpepo yaHompa Karunga yamu rutu rwenu. ¹² Karenu naghukaro waghuwa waku hungama wamfumwa mukatji kava Hedana, mposhi vavo nkene ngava murundira ashi anwe vantu vavadona vandyo, makura vavo ngava mona naku dimburura kuviruwana vyenu vyaviwa vyaghuhunga vyaghushili makura navo ngava fumadeke naku tapa mfumwa kwaHompa Karunga kumayuva ghaku hulilira ghampanguro yanavantje. ¹³ Hompa Karunga kuna shana mulimburuke kulipangero lya vantu lya ghushili. Limburukenu kuvaHompa nakumapangero ghavantu, ¹⁴ ntani limburukenu kuva pangeli ovo vatumango vapolisa vaka kwate vantu vaku ruwana ghurunde vavafutite naku vatengeka, ntani vavo kuruwana ghuwa naku tapa mfuto kuvantu vaku ruwana ghuhunga vakare namfumwa. ¹⁵ Hompa Karunga kuna shana muruwane ghuwa naghu hunga kushipara shendi, mposhi ngamu mwenikide vantu vavagova vaku vaghamba nkango daghudona naghugova kukwenu. ¹⁶ Anwe mwamanguruka mbyo mwatunda munkondo damu dyonaghuli, weno karenu ngoli yira vantu vaku manguruka, kapishi muruwane ghurunde mukahore-hore mulyatepo, nane ngoli karenu yira vakareli vaHompa vaku ruwana ghushili naghuwa ntani naghuhunga. ¹⁷ Fumadekenu ntani karenu nashihoro kuvantu navantje. Karenu nashihoro shaghushili mumbunga yaKirisitus. Fumadekenu Hompa Karunga. Ntani fumadekenu vaHompa venu. ¹⁸ Anwe vakareli vaHompa Karunga, muna hepa kulimburuka kukwendi naku tikitamo veta yendi virugho navintje. Muna hepa kulimburuka kuvapangeli navantje vakare vavawa vankenda vambili ntani navo vaku muruwana ghudona nanyanya kukwenu. ¹⁹ Hompa Karunga kutapa matungiko nalirago kuvantu vaku kudidimikira kwavi vyaweno, mukondashi vavo kwakara nalipuro lya ghushili ntani vayiva Hompa Karunga wavo, vavo kutambura navintje ghuwa naghudona. ²⁰ Kwato mfumwa yaku wana muntu waku ruwana ghurunde makura vamu pangure afute ndyo yendi nalididimiko? Ano ngoli nkene kuna ruwana ghuhunga makura vaku pangure ghufute maghoko-ghoko mukonda yaweno, ove ghukare nalididimiko mukutikitamo mfuto yaweno, ove kutapa mfumwa kwaHompa Karunga ghoye ntani ghuye kutapa lirago kukoye. ²¹ Shino ntjo shitambo vamu yitira mumbunga yaHompa Karunga, mukondashi Yesus Kirisitus kwamu fera mfa dapa sikurushe darunyando. Ghuye kwaneyeda shihonena kukwenu ngamu kwame mumwendi ngamu tikitemo viruwana vyendi. ²² Matjangwa kwatanta ashi, "Yivenu ghukaro waYesus Kirisitus waghuwa, ghuye kapi akalire naghundyoni kehe ghuno, ntani kapi aghambire vimpempa aku popera mwene." ²³ Kwavo vamu tukiro naku mushwaghura ghuye kapi avyu tire rughoko kukwavo. Vaku mutoghona, kapi avyutire rughoko avatoghone ndi avatjilite, vavo kwamuhepekire amone runyando, anongoli ghuye kwakutapire tupu vamu hepeke amone runyando, ghuye kwatapire navintje mwaHompa Karunga waku pangura mughuhunga. ²⁴ Yesus Kirisitus kwashimba ndyo detu di tunde parutu rwetu diyende parutu rwendi mwene ghuye atware ndyo detu pasikurushe mposhi atwe vantu vandyo tu kare tuna hungama kushipara shaHompa Karunga. Mukonda yavironda vyapa rutu rwendi atwe mo twa wanena liveruko naliyoghoko lya ndyo. ²⁵ Atwe kwaka lire yira ndywi daku kombana daku renda-renda daku pira mushita, paweno tuna ka vyuka kwaYesus Kirisitus natwe tuna kara namushita waghushili wamuwa ntani namukungi wamonyo detu waghuhunga.