¹ Yino ntjanga tumwa kuna kutunda kwaPeturus, muApositoli waYesus Kirisitus, yi yende kuvantu, vaKarunga ovo atoghorora ovo vana karo kuvirongo vyaku kushuva-shuva mushirongo shaPontusi, naGaratiya, naKapodokiya, naAsiya, ntani naBetaniya. ² Anwe kwamutoghorora kutwara mughukonentu namayere ghaHompa Karunga Shetu, mukupongora viruwana vyendi mwene kupitira muMpepo yaKupongoka mpo ashi anwe mukare vapongoki vaku limburuka vaku tikiliramo mukondashi anwe mwapwa kukusha nahonde yaku pongoka yaYesus Kirisitus. Nkenda yaHompa Karunga yikare nanwe, ntani mbili yaHompa yi vhuke yiku wederere mumwenu. ³ Tu shambererenu Hompa Karunga Shetu naMuyogholi wetu Yesus Kirisitus tutape mfumwa! Mukonda yaghufe-nkenda wendi waghunene, mbyo twa wana monyo waghupe waku tunda mulipuro nalihuguvaro lya mfa nalivhumbuko lya Yesus Kirisitus. ⁴ Mukondashi atwe kwakara nalipuro ntani nalihuguvaro ashi ngatu kawana ghupingwa wamu liwiru ogho vawapayika mbyo vaghupungura, wagho waku karererapo, kwato kudyonaghuka, ntani kwato kushaya. Ghuno ghupingwa wapwa kuwapayika ntani wapwa kupungura kare nawa-nawa muliwiru. ⁵ Mukonda yalipuro nalihuguvaro lyenu muliyoghoro lya mfa daYesus Kiristus ghuye ngamu popera nankondo dendi odo awapayika odo nga shorora naku neyeda vana nkore yendi kumayuva ghaku hulilira. ⁶ Anwe karenu namfumwa ntani naruhafo kwavi vyaweno, nampili ngoli muna kara namaghudito namaghupyakadi namahepeko ghama yingi ghaku kushuva-shuva ogho muna kugwanekera nagho. ⁷ Mahepeko kuwapeka lipuro likare nankondo naghushili, ntani lipuro lyenu kwapitakana shikugho osho varuwana nangorodo yaku kushuka kumundiro waku twera ghunene, ngorodo yaweno kwato kukarererapo. Lipuro lyenu mwaYesus Kiristus lya pitakana ngorodo nayintje yamu ghudyuni kushipara shaHompa Karunga mposhi anwe mukare vantu vendi mutape mpandu, namfumwa dogoro nga moneke Yesus Kirisitus shikando shaghuviri. ⁸ Anwe shimpe kapi mwamumona Yesus, anongoli anwe kwamuhora ghunene. Pa weno anwe kapi muna kumu mona Yesus, anongoli anwe kwapura mumwendi mbyo muna kara naruhafo rwarunene rwakupira kuvhura kutwenya ntani anwe mbyo mwayura ghukenu nalihuguvaro lyamu mwendi. ⁹ Weno anwe mwayoghoka mwatunda mundyo mukonda yalipuro lyenu mwaYesus Kirisitus, mbyo mwawana monyo naliparu lya naruntje. ¹⁰ Kuhamena liyoghoko lya ndyo naliparu lya naruntje, vaporofete vakare kwapumbire vyaku hamena ghuno ghushwi wankenda yaHompa Karunga oghu nga tapa kukwetu, vavo kwaghu shanine nakughukona-kona nawa-nawa, ¹¹ vavo kwakondyire ashi vayive ovyo yaghambire Mpepo yaKupongoka kuhamena kwaKirisitus yitape ghumbangi waku meho kuhamena runyando namfa nalivhumbuko lyendi ntani no mo nga ka wana mfumwa nankondo naghuyere waghunene, vavo kwashanine kuyiva shirugho naghukonentu ashi weni omo ngavi shoroka. ¹² Yino Mbudi yaRuhafo kwayi tapire kuva porofete vakare yi shoroke yitunde kwaHompa Karunga yayo kapi yatunda kuvantu, mposhi navo vayuvite kuvantu paruvede runo, vaporofete vakare kwakwa yuvitire Mbudi yaRuhafo kupitira munkondo yaMpepo yaKupongoka oyo yatundo muliwiru kwaHompa Karunga - vaEngeli vamu liwiru navo kwakondyire ashi vayive vyaku hamena yino Mbudi yaRuhafo oyo vatapire kuva vaporofe ntani ndyo shimpe vana kuyuvita vaApositoli kukwenu paweno. ¹³ Karenu muna kotoka ntani karenu muna vangara. Wapekenu maghayaro ghenu namaghano ghenu ntani naghukaro wenu. Didimikenu anwe mukare nalihuguvaro dogoro kughuhura opo nga neyeda Hompa Karunga nkenda yendi kuhamena viruwana vyendi mwaYesus Kirisitus opo nga shoroka shirugho shaghuviri. ¹⁴ Weno anwe muna kara vana vaKarunga limburukenu ngoli kwaHompa Karunga wenu, shayekenu ngoli kuruwana vyamadogho naghurunde naghudona ogho kamu ruwananga pakare opo mwapilire kuyiva Hompa Karunga washili. ¹⁵ Oghu amu toghororo mukare vana vendi kwapongoka, nanwe karenu ngoli vapongoki, ntani karenu naghupongoki mughukaro wenu naviruwana vyenu navintje. ¹⁶ Matjangwa kwaghamba ashi, "Karenu muvapongoki, mukondashi ame kwapongoka." ¹⁷ Anwe kutwenya Karunga ashi "Vava" nkene kuna kuraperera anongoli ghuye kupangura mughuhunga mwakehe ghuno kutwara naku shetakanita muviruwana vyendi mwene, mpo ngoli shi tjirenu naku fumadeka Hompa Karunga shirugho shino muna kuparuka pantunda yalivhu, mundi wenu waghunene mpoghuli muliwiru. ¹⁸ Anwe yivenu ashi kapi vayoghora monyo denu nashiringa yangorodo ndi yasiliveli yaku pira kukarererapo, mposhi ngamu tunde kuviruwana vyanyata naghukaro waghudona waku pira mutompo ogho mwapinga kuvanyakulya venu. ¹⁹ Nane ngoli, anwe kwamuyoghora nahonde yaKirisitus yamu rutu rwendi yandiro, Ghuye ndywighona yaKarunga yakupira ghundyoni ntani kwato shipo. ²⁰ Hompa Karunga kwatoghorora Kirisitus akare ndye waku hova kumeho yaku shita ghudyuni ghu karepo, anongoli mbyo ataterera dogoro paweno kumayuva ghaku hulilira ntani ana kumu shorora amoneke kukwenu. ²¹ Mposhi kupitira muviruwana vyaKirisitus pasikurushe anwe ngamu pure naku huguvara mwaHompa Karunga, ogho amu vhumbuliro atunde mumfa akare namonyo makura atapa kukwendi mfumwa nankondo ntani naghuyerere, mposhi anwe mukare nalipuro ntani nalihuguvaro mwaHompa Karunga. ²² Anwe monyo denu kwakena ntani kwakushuka mukondashi anwe mwapura ntani mwalimburuka kunkango daHompa Karunga waghushili. Ghuye kwamu yita mumbunga yendi mposhi mukare nashihoro kwakehe ghuno; karenu nashihoro shaghushili shamu mutjima kwakehe ghuno mumbunga. ²³ Anwe kwamushampuruka ruviri mbyo mwawana monyo waghupe, nankango yaHompa Karunga yaghushili yaku karererapo; anwe kapi vamu yoghora nambuto yaku dyonaghukapo mushirugho shashi fupi, mpo shi karenu nalihuguvaro mwaHompa Karunga wenu. ²⁴ Muporofete Yesaya kwaghamba ashi, "Vantu navantje kwafana yira mushoni, nampili mfumwa yavo kwafana yira mucuko wamushoni. Mushoni kuku kuta ntani mucuko nagho kuku kuta ntani kufa, ²⁵ anongoli nkango daHompa Karunga kwakarapo naruntje nana runtje." Nkango daHompa Karunga ndyo yino Mbudi yaRuhafo vanakuyuvita kukwenu paweno.