¹ Weno ame kuna kughamba kukwenu vakurona navampititi vambunga Kirisite, name ghumwe nakaliro mukurona wambunga Kirisite ntani ame ghumwe namonino runyando rwaYesus Kirisitus, ntani name ghumwe nganu ka wano ghupingwa waghuyerere waKirisitus opo nga shoroka: ² Vakurona vambunga Kirisite kungenu ndywi daYesus Kirisitus odo atapa mumaghokoghenu, ntani di kungenu ndywi dendi nashihoro yira momu mwakunganga ndywi denu - di kungenu dino ndywi kapi shi mukonda yamu tininiko, nane ngoli mukonda yashihoro shenu mwaKirisitus - anwe kapi mwaruwanenga mfuto yakunyata. ³ Anwe kwato kupititira mbunga Kirisite namutininiko yira anwe vahona vavo. Nane ngoli, anwe muna hepa kuneyeda shihonena shashiwa kumbunga Kirisite. ⁴ Nkene ngamu ruwana vyaweno anwe ngamu kara nalirago opo nga moneka mushita wamunene, ngamu ka wana mfuto yenu ntani ngamu ka dwata nkata yaghuHompa yamfumwa yaghuyerere yaku karererapo. ⁵ Nanwe, vadinkantu vavamati, muna hepa kuterera naku limburuka kumarongo ghava nturaghumbo. Kukwenu namu vantje, muna hepa kukudidipita kwakehe ghuno naku tapa mbatero kwakehe ghuno wamu mbunga. Hompa Karunga kwashwena vantu vaku kunenepita ntani kwahora vantu vankenda vaku kudidipita. ⁶ Mpo ngoli ashi muna hepa kukudidipita kushipara shaHompa Karunga wankondo nadintje makura ghuye nga tape mfumwa kukwenu opo nga shitika mo shirugho. ⁷ Ghuye kwamu hora ghunene anwe tapenu vinka vyenu namaghudito ghenu kukwendi muwane mbili yaku tikiliramo. ⁸ Karenu muna kotoka, ntani karenu muna vangara. Mukondashi muna nkore wenu Satana mudyonaghuli ghuye kwato kurara ntani ghuye kuyendaghura kehe kuno yira nyime waku nunga, ghuye kushana-shana mo wendi aku papawire. ⁹ Karenu muna koro mulipuro. Korenu mundapero mutjide mudyonaghuli Satana atunde papenu. Vhurukenu ashi mbunga Kirisite yamu ghudyuni kumavhango ghaku kushuva-shuva navo kuna kupita mumaghudito ghaweno. ¹⁰ Shirogho shashi fupi tupu kuruku rwamahepeko ghenu, makura Hompa Karunga wankenda yayinene, ogho amu yito mughuyerere wendi naghuyerere waYesus Kirisitus, nga wapeka lipuro lyenu, nga tapa nkondo kukwenu, ntani nga tikitiliramo lipuro lyenu. ¹¹ Nkondo dendi dadinene daku pangera mughudyuni naruntje nanaruntje. Amen. ¹² Ame kwatjanga kare mbapira kukwenu yaku hamena lipuro lya ghunyande Silas, mbapira kwayi tjanga mughu fupi kuhamena viruwana nalipuro lyendi. Ame kwatjanga mbapira yaku tapa ghumbangi namakorangedo kuhamena nkenda yaHompa yaviruwana vyendi. Yitamburenu nalihuguvaro yino mbudi yaghushili. ¹³ Mugholikadi ghunyenu wamu shitata shaBabiloni, ghumwe vatoghorora kumwe nanwe, kuna mukundu. Ntani monande walidina, Marukus naye kuna mukundu. ¹⁴ Kundenu navantje ntani tapenu shihoro shaku ncumita mukanwa kumbunga Kirisite. Mpora yaKirisitus yikare papenu namuvantje.