¹ Kalpasan nga nalpas ni Hesus iti amin nga ibagbagana nga dingdinggen dagiti tattao, simrek isuna idiay Capernaum. ² Adda adipen ti maysa nga senturion, nga napateg kenkuana, agsaksakit ken dandanin matay. ³ Ngem idi nangngeganna ti maipapan ken ni Hesus, nangibaon ti senturion kadagiti panglakayen dagiti Judio tapno kiddawenda nga umay ket isalakanna ti adipenna manipud iti pannakatay. ⁴ Idi nakaasidegdan ken ni Hesus, nagpakpakaasida kenkuana iti kasta unay a kunada, "Maikari isuna nga aramidem daytoy para kenkuana, ⁵ agsipud ta ipatpategna unay daytoy nga nasiontayo ken nangipatakder ti sinagoga para kadatayo." ⁶ Intultuloy ni Hesus iti pannagnana ket kimmuyog kadakuada. Ngem idi saanen nga adayo isuna manipud iti balay, nangibaon ti senturion kadagiti gagayyemna nga mangibaga kenkuana, "Apo, diak kayat nga riribukenka, gapu ta saanak nga maikari kenka nga sumrek iti balayko . ⁷ Gapu iti daytoy, saanko pay nga inbilang toy bagik a maikari nga umasideg kenka, ngem iyebkas mo kadi ti sao ket maimbagan ti adipenko. ⁸ Ta uray siak met ket taoak nga naikabil iti babaen ti turay ken addaanak met kadagiti soldado nga adda iti turayko. Ibagak iti maysa, 'Mapanka,' ket mapan isuna, ken iti maysa pay, 'Umayka,' ket umay isuna, ken iti adipenko, 'Aramidem daytoy', ket aramidenna." ⁹ Idi nangngegan ni Hesus daytoy, nasdaaw unay kenkuana, ket simmango ngarud kadagiti tattao nga sumursurot kenkuana ket kinunana, "Ibagak kadakayo, awan pay nasarakak uray siasinoman ditoy Israel nga addaan ti dakkel a pammati." ¹⁰ Ket dagiti naibaon, nagsublida iti balay ket nasarakanda nga nasalun-aten ti adipen. ¹¹ Iti saan unay a nabayag kalpasan dayta, napasamak nga napan ni Hesus iti siudad nga maaw-awagan ti Nain, ken uray dagiti adalanna ken nakaad-adu a tattao ket simmurot kenkuana. ¹² Idi umas-asidegen iti ruangan ti siudad, pagammoan, adda natay a tao nga bagbagkatenda a paruar, nga maymaysa nga anak a lalaki ti balo nga inana, ken adda kaduana nga tattao manipod iti ili. ¹³ Idi makitana isuna ti Apo, ket kasta unay ti pannakatignay ti asina para kenkuana ket kinunana, "Saanka nga agsangit". ¹⁴ Ket nagpasango ni Hesus ket sinagidna iti kayo a nakaibabagkatan ti natay, ket nagtalinaed met nga sitatakder dagiti agbagbagkat. Kinunana, "Agtutubo, ibagak kenka, bumangonka". ¹⁵ Nagtugaw ti natay a lalaki ket nagrugi a nagsao. Ket inyawat ni Hesus iti inana. ¹⁶ Ket inabak ida amin iti buteng. Indaydayawda ngarud iti Dios, ibagbagada, "Natan-ok nga propeta iti timmaud kadatayo" ken "Iti Dios kimmita kadagiti tattaona." ¹⁷ Daytoy nga damag maipanggep ken ni Hesus ket nagwaras iti intero nga Judea ken kadagiti amin nga kabangibang nga rehion. ¹⁸ Dagiti adalan ni Juan imbagada kenkuana amin dagitoy nga banbanag. ¹⁹ Inayaban ngarud ni Juan ti dua kadagiti adalanna ket imbaonna ida iti Apo nga mangibaga, "Sika kadi diay Umayto, wenno agbirok kami pay iti sabali?" ²⁰ Idi nakaasidegdan ken ni Hesus, kinuna dagiti lallaki, "Ni Juan nga Mammunniag imbaonna kami nga mangibaga kenka "Sika kadi diay Umayto, wenno agbirok kami pay iti sabali?" ²¹ Iti dayta nga oras, pinaimbagna iti adu nga tattao manipud saksakit ken an-anayenda ken manipud kadagiti dakes nga espiritu, ken pinatganna dagiti bulsek a makakita. ²² Simmungbat ni Hesus ket kinunana kadakuada, "Inton pumanaw kayo, ipakaammoyo ken ni Juan no ania dagiti nakita ken nangngeganyo. Makakitan dagiti bulsek nga tattao, makapagnan dagiti pilay nga tattao, malinlinisanen dagiti addaan iti ketong, makangngegen dagiti tuleng nga tattao, mapagpagungaren dagiti natay nga tattao, ken makaskasabaanen iti naimbag a damag dagiti agkasapulan. ²³ Iti tao nga saan nga agsardeng nga mamati kaniak gapu kadagiti aramidko ket nabendisionan." ²⁴ Idi nakapanawen dagiti babaonen ni Juan, inrugi ni Hesus nga inbaga kadagiti tattao iti maipanggep ken ni Juan, "Ania ti napanyo kinita idiay let-ang? Runo kadi nga gungun-gunen ti angin? ²⁵ Ngem ania ti napanyo kinita? Maysa kadi nga tao nga nagkawes iti nalukneng a pagan-anay? Kitaenyo, dagiti tattao nga nakakawes iti napipintas nga pagan-anay ken agbibiag nga aglaplapusanan, agnanaedda kadagiti palasio ti ar- ari. ²⁶ Ngem ania ti napanyo kinita? Maysa kadi nga propeta? Wen, ibagak kadakayo, nangnangruna pay ngem maysa nga propeta. ²⁷ Isuna daytoy pakaiturungan iti naisurat, 'Kitaenyo, ibaonko iti mensaherok iti masanguananyo, nga mangisagana iti dalanmo sakbay kenka.' ²⁸ Ibagak kadakayo, nga kadagiti inyanak dagiti babbai, awan iti natantan-ok pay ngem ni Juan, ngem iti kababaan nga tao iti pagarian ti Dios ket natantan-ok pay ngem isuna." ²⁹ Idi nangngegan dagiti tattao daytoy, pakairamanan dagiti agsingsingir iti buis, impaduyakyakda nga nalinteg iti Dios. Karaman isuda kadagiti nabautisaran iti bautisar ni Juan. ³⁰ Ngem dagiti Pariseo ken nalalaing iti linteg ket linaksid da iti panggep ti Dios kadakuada, gapo ta saanda a nabautisaran kenni Juan.) ³¹ "Ania ngarud iti mabalin ko nga pangiyaspingan kadagiti tattao tatta nga kapututan? Ania kadi iti pakaiyaspinganda? ³² Kasla da la ubbing nga agga-ayam idiay pagtagilakuan nga agtutugaw ken ay-ayabanda iti tunggal maysa nga kunada, 'Pinatukarmi ti plauta para kadakayo, ket dikay met nagsala. Nagladingit kami, ket dikay met nagsangit.' ³³ Agsipud ta immay ni Juan nga Mammunniag a saan nga mangmangan ti tinapay ken saan nga nagin-inom iti arak, ket ibagbagayo, 'Adda demonyona.' ³⁴ Immay ti Anak ti Tao ket nakipangan ken nakiinom ket kunayo, 'Kitaenyo, narawet daytoy nga tao ken mammartek, gayyem dagiti agsingsingir ti buis ken dagiti managbasol.' ³⁵ Ngem iti sirib ket maipakita a nalinteg babaen kadagiti amin nga annakna." ³⁶ Itatta, adda maysa nga Pariseo nga nangimbita kenni Hesus nga makipangan kenkuana. Isu nga kalpasan a nakastreken ni Hesus iti balay ti Pariseo, intugawna idiay ayan iti lamisaan tapno mangan. ³⁷ Pagammoan, adda maysa nga babai iti dayta nga siudad, nga isuna ket managbasol. Idi naammoanna nga adda ni Hesus nga makitugtugaw idiay balay ti Pariseo, ket napan isuna ken nangitugot iti bangbanglo a naikabil iti alabastro nga fraskita. ³⁸ Nagtakder iti likudan ni Hesus nga asideg iti sakaananna, nagsangit, ket rinugiana a binasa iti luana dagiti saka ni Hesus, ket pinunasanna ida iti buokna ken inagepna dagiti sakana ken binukbukanna ida ti bangbanglo. ³⁹ Idi nakita daytoy iti Pariseo nga nangawis ken ni Hesus, pinanunotna iti bagina nga kunana, "No daytoy nga tao ket propeta, ammona koma no siasino ken no ania nga klase nga babai iti mangsagsagid kenkuana, nga isu ket managbasol." ⁴⁰ Simmungbat ni Hesus ket kinunana kenkuana, '''Simon, adda iti banag nga ibagak kenka." Kinunana, "Ibagam, Maestro!" ⁴¹ Kinuna ni Hesus, "Adda iti dua nga nakautang iti maysa nga agpapautang. Diay maysa ket nakautang iti limagasut nga dinario, diay met maysa ket limapulo nga dinario. ⁴² Gapu ta awan kuartada nga pagbayad, pinakawanna ida nga dua. Ngarud, siasino ti kadakuada iti ad-adda nga mangayat kenkuana? ⁴³ Simmungbat ni Simon kenkuana ket kinunana, "Panagkunak ket diay ad-adu iti napakawan nga utangna." Kinuna ni Hesus kenkuana, "Usto dayta a panangikeddengmo." ⁴⁴ Sinango ni Hesus ti babai ket kinuna ken Simon, "Makitam daytoy nga babai. Simrekak iti balay mo. Awan danum nga intedmo kaniak para kadagiti sakak, ngem isuna, babaen iti luana, binasana dagiti sakak ken pinunasanna ida iti buokna. ⁴⁵ Dinak impaayan iti agep, ngem isuna, manipud simmangpetak, saan nga nagsardeng nga nangag- agep kadagiti sakak. ⁴⁶ Saanmo nga binukbukan daytoy ulok iti lana, ngem binukbukanna dagiti sakak iti bangbanglo. ⁴⁷ Gapu iti daytoy ibagak kenka, dagiti basolna, nga isu ket nagad-ado, napakawanen- gapo iti dakkel nga panagayatna. Ngem iti tao nga napakawan iti basbassit, bassit met iti panagayatna." ⁴⁸ Ket imbagana iti babai, "Napakawanen dagiti basbasolmo." ⁴⁹ Dagiti amin nga agtugtugaw sadiay ket inrugida nga kinuna iti maysa ken maysa, "Siasino daytoy nga mamakawan kadagiti basbasol?" ⁵⁰ Ket kinuna ni Hesus iti babai, "Ti pammatim ket insalakannaka. Mapanka a sitatalna".