¹ Napasamak nga dagus kalpasanna nga nangrugi ni Jesus a nagdalyasat iti nadumaduma nga siudad ken barrio, nga nangikaskasaba ken nangiwarwaragawag iti naimbag a damag maipapan iti pagarian ti Dios. Adda kenkuana dagiti sangapulo ket dua, ² ken kasta met dagiti babbai a napaimbag manipud kadagiti dakes nga espiritu ken saksakit: Isuda da Maria nga napanaganan Magdalena, nga nawayawayaan manipud iti pito a demonio, ³ ni Juana nga asawa ni Cusa, a katalek ni Herodes, ni Susana, ken dagiti dadduma pay, nga nangipaay iti sansanikuada para iti kasapulanda. ⁴ Bayat nga adu a tattao ti naguurnong, ken dagiti tattao nga um-umay kenkuana manipud iti nadumaduma nga siudad, nagsarita isuna babaen iti pangngarig: ⁵ "Adda maysa a mannalon a rimmuar nga napan nagmula iti bukbukel. Kabayatan iti panagmulana, adda dagiti bukbukel nga natinnag iti igid ti dalan ket nabadbadekan iti tattao, ken dagiti billit iti tangatang ket kinnanda. ⁶ Dadduma met nga bukbukel ket natinnag iti bato, ket apaman nga dimmakel dagitoy a mulmula, nalaylayda, gapu ta awan ti pakabasaanda. ⁷ Addamet dagiti bukbukel nga natinnag kadagiti sisiitan, ket dimmakkel dagiti nasisiit nga mulmula a kadua dagiti bukbukel a nangpespes kadakuada. ⁸ Ngem dadduma kadagiti bukbukel ket natinnag iti nasayaat nga daga ket pinataudna ti mula nga sangagasut a daras pay ti kaaduna." Kalpasan nga naibaga ni Hesus dagitoy a banbanag, impukkawna, "Siasinoman iti addaan iti lapayag nga dumngeg, dumngeg koma." ⁹ Ket dagiti adalanna dinamagda no ania ngata iti kaipapanan daytoy a pangngarig. ¹⁰ Kinuna ni Hesus kadakuada, "Ti panakaammo maipapan iti palimed ti pagarian ti Dios ket naited kadakayo, ngem iti daduma ket agsaritaak iti pangarig, tapno 'uray makitada didanto met laeng a makita, ken mangngeganda ngem didanto met laeng maawatan.' ¹¹ Itatta daytoy ti kaipapanan iti pangngarig. Ti bukel ket isu iti sao ti Dios. ¹² Dagiti bukbukel nga natinnag iti igid ti dalan ket dagiti tattao nga nakangngeg iti sao, ngem umay ti diablo ket alaenna ti sao manipud iti pusoda, tapno saanda a mamati ken maisalakan. ¹³ Ket dagiti met natinnag iti bato ket dagiti tattao nga idi nangngegan da iti sao, inawatda a siraragsak, ngem awan ti uray maysa a ramutda; mamati da laeng iti apagbiit, ket no dumteng ti tiempo ti pannubok, umadayoda. ¹⁴ Dagiti bukbukel nga natinnag kadagiti sisiitan ket dagiti tattao nga dimngeg iti sao, ngem iti panagdalyasat da iti dalanda, mabekkelda kadagiti pakadanagan ken kinabaknang ken ragragsak iti daytoy a biag, ken isut' gapuna nga awan ti maibungada nga maluom. ¹⁵ Ngem dagiti bukbukel a natinnag iti nasayaat nga daga, dagitoy dagiti tattao nga, addaan iti napudno ken naimbag a panagpuspuso, kalpasan nga nangngeganda iti sao, salimetmetanda ken agbungada nga adda ti panagan-anus. ¹⁶ Awan ti siasinoman nga mangpasged iti pagsilawan ket kalubanna iti malukong wenno ikabilna iti sirok ti pagidaan. Ngem ketdi, ikabilna iti umiso nga paggiananna, tapno iti tumunggal maysa nga sumrek, makitada ti lawag. ¹⁷ Ta awan iti nailemmeng nga saan a maipakaammo, wenno aniaman a palimed nga saan a maammoan ken masilawan. ¹⁸ Isu nga dumngeg kayo a nasayaat, kadagiti addaan, maikkan pay iti ad-adu, ket ti siasinoman nga awanan, manipud kenkuana ket maikkat uray pay ti pagarupenna nga adda kenkuana." ¹⁹ Kalpasan ket ni nanang ken dagiti kakabsat ni Hesus ket immay kenkuana, ngem saanda nga makaasideg kenkuana gapu iti kaadu ti tattao. ²⁰ Ket naibaga kenkuana, "Ti inam ken dagiti kakabsatmo a lallaki ket addada nga agtatakder idiay ruar, kayatdaka a makita." ²¹ Ngem simmungbat ni Hesus ket kinunana kadakuada, "Ti inak ken kakabsatko ket dagiti dumngeg iti sao ti Dios ken tungpalenda." ²² Ket iti maysa nga aldaw naglugan ni Hesus ken dagiti adalanna iti bangka, ket kinunana kadakuada, "Mapan tayo idiay ballasiw iti dan-aw." ²³ Ket naglayagda. Ngem kabayatan nga aglaylayagda, nakaturog ni Hesus. Adda immay nga nakapigpigsa a bagyo ken angin idiay dan-aw, ket mangrugi a mapunno ti bangkada iti danum, ket addadan iti kasta unay a peggad. ²⁴ Ket dagiti adalan ni Hesus ket immayda kenkuana ket riniingda isuna, kunada, "Apo! Apo! Nganngani tayo nga matayen!" Nakariing isuna ket tinubngar na iti angin ken ti narungsot a danum, ket nagsardengda, ken adda iti talna. ²⁵ Ket kinunana kadakuada, "Ayan iti pammatiyo?" Ngem nagbutengda ken nasdaawda ket kinunada iti tumunggal maysa, "Siasino ngarud daytoy, ta mandaranna uray dagiti angin ken iti danum, ket agtulnogda kenkuana?" ²⁶ Nakadanunda iti rehion ti Gerasenes, nga kabangibang iti Galilea. ²⁷ Idi bimmaba ni Hesus iti dayta a lugar, adda iti maysa a lalaki nga naggapo iti siudad a simmabat kenkuana nga linuganan ti adu a demonio. Iti nabayag a panawen saan isuna nga agus-usar iti kawes, ken saan isuna nga aggigian iti balay no di ket kadagiti sementeryo. ²⁸ Idi nakitana ni Hesus, nagikkis isuna ken nagpakleb iti sangoananna ket nagsao iti napigsa, "Ania ti biangmo kanyak, Hesus, Anak iti Kangatoan a Dios? Agpakpakaasi-ak kenka, saannak nga parigaten." ²⁹ Ta manmandaran ni Hesus ti narugit nga espiritu nga rumuar manipud iti lalaki. Gapu ta masansan nga tenngelenna isuna, ken uray pay no galutanda iti kadkadena ken kawkawar ken bantayanda, pugsatenna latta iti galutna ken iturong ti demonio idiay let-ang. ³⁰ Ket nagsaludsod ni Hesus kenkuana, "Ania ti nagan mo?" Ket kinunana, "Lehion," ta adu nga demonio iti limmugan kenkuana. ³¹ Intultuloy dagiti demonio iti nagpakpakaasi ken ni Hesus nga saanna koma ida nga mandaran a mapan idiay yuyeng. ³² Ita adda iti dakkel a bunggoy ti baboy a mangmangan idiay turod. Dinawat dagiti demonio nga pumanawda ket lumuganda kadagiti babbaboy. Pinalubosanna ngarod isuda. ³³ Isu nga rimmuar dagiti demonio manipud iti dayta nga tao ken simrekda kadagiti babbaboy, ket ti arban ket nagap-apurada a bimmaba iti turod nga agturong iti dan-aw ket nalmesda. ³⁴ Idi nakita dagiti tattao nga agay-aywan kadagiti babbaboy ti napasamak, timmarayda ket impadamagda ti napasamak kadagiti siudad ken iti barbario. ³⁵ Isu nga rimmuar dagiti tattao tapno kitaenda iti napasamak, ket immayda ken ni Hesus ket nasarakanda ti lalaki nga rimuaran dagiti demonio. Makitugtugaw isuna iti sakaanan ni Hesus, nakabado ken adda isuna iti nasayaat nga panunot; ket nagbutengda. ³⁶ Ket dagiti nakakita iti daytoy a napasamak ket imbagada kadagiti dadduma no kasano nga naisalakan ti lalaki nga inadipen dagiti demonio. ³⁷ Amin dagiti tattao iti rehion ti Gerasenes ket kiniddawda ken ni Hesus nga panawanna ida, gapu ta tinengngel ida iti nalaus a panagbuteng. Isu nga naglugan isuna iti bangka ket nagsubli. ³⁸ Diay lalaki nga nagtalawan dagiti demonio ket nagpakpakaasi ken ni Hesus nga palubusanna isuna nga sumurot kenkuana, ngem pinagawid isuna ni Hesus, a kunana, ³⁹ "Agsubli ka iti balaymo ken ipakaammom amin nga naindaklan a banbanag nga inaramid ti Dios para kenka." Nagawid ngarud ti lalaki ket inwaragawagna iti entero nga siudad dagiti naindaklan a banbanag nga inaramid ni Hesus para kenkuana. ⁴⁰ Iti panagsubli ni Hesus, inawat isuna dagiti adu nga tattao, ta agur-urayda amin kenkuana. ⁴¹ Pagammoan, adda iti lalaki a managan Jairo, ket maysa isuna kadagiti mangidadaulo iti sinagoga, immay ket nagpakleb iti sakaanan ni Hesus, ken kiniddawna nga mapan koma isuna idiay balayna ⁴² maigapo iti kakaisuna nga anak a babai, nga agtawen iti sangapulo ket dua, a matmatayen. Ket iti ipapanna, adu nga tattao ti nangaribungbong kenkuana. ⁴³ Ita adda iti babai sadiay nga agpadpadara iti sangapulo ket duan a tawen ket nagastos nan amin nga kuartana kadagiti mangngagas, ngem saan a pinaimbag ti siasinoman. ⁴⁴ Napan isuna iti likudan ni Hesus ket sinagidna ti laylayan iti badona, ket dagdagus nga nagsardeng ti panagpadpadarana. ⁴⁵ Kinuna ni Hesus, "Siasino ti nangsagid kaniak?" Naglibak iti amin, kinuna ni Pedro, "Apo, nagado dagiti tattao iti aglawlawmo ken mangsagsagid kenka." ⁴⁶ Ngem kinuna ni Hesus, "Adda iti nangsagid kaniak, ta ammok nga adda iti pannakabalin nga rimuar manipud kaniak." ⁴⁷ Idi makita ti babai nga saannan nga mailemmeng iti inaramidna, immasideg ti babai nga agpigpigerger ket nagpaklbe iti sanguananna. Imbagana iti sangoanan dagiti tattao ti makagapu no apay nga sinagidna ni Hesus ken no kasano isuna nga naagasan a dagus. ⁴⁸ Ket kinunana kenkuana, "Anak a babai, ti pammatim isu ti nangpaimbag kenka. Mapanka a sitatalna." ⁴⁹ Idi madama isuna nga agsasao, adda iti immay nga naggapu iti balay ti mangidadaulo iti sinagoga, nga kunana, "Diay anak mo nga babai ket natayen. Saan mon nga riribuken ti manursuro." ⁵⁰ Ngem idi nangngeg ni Hesus daytoy, sinungbatanna ni Jairo, "Saanka nga agbuteng. Mamati ka laeng, ket maagasan isuna." ⁵¹ Ket idi nakasangpet iti balay, saan na nga pinalubusan ti siasinoman nga makiserrek kenkuana, malaksid kada Pedro ken Juan kenni Santiago, ken ti ama ti ubing a babai, ken ti inana. ⁵² Itatta, amin dagiti tattao sadiay ket agladladingit ken sangsangitanda isuna, ngem kinunana, "Saan kayo nga agsangit; Saan isuna nga natay ngem matmaturog laeng." ⁵³ Ngem inrugida nga kinatawaanda isuna, ta ammoda nga isuna ket natayen. ⁵⁴ Ngem innalana ti ima ti ubing ket inawaganna, kunana, "Ubing, bumangonka." ⁵⁵ Nagsubli ti espiritu na, ken dagos a bimmangon isuna. Inbilinna kadakuada nga mangtedda kenkuana iti kanenna. ⁵⁶ Nasdaaw dagiti nagannakna, ngem binilinna ida nga awan iti pangibagbagaanda iti napasamak.