¹ Itatta ti napasamak iti maysa nga Aldaw ti Panaginana, nga ni Hesus ket nagna iti kataltalunan ken dagiti adalanna, agal-alada kadagiti dawa ti trigo, ikiskisda dagitoy kadagiti dua nga imada sada kanen dagiti bukel. ² Ngem dadduma kadagiti Pariseo ti nagkuna, "Apay agar-aramidkayo iti banag nga saan nga nainkalintegan nga aramiden iti Aldaw ti Panaginana?" ³ Sinungbatan ni Hesus isuda ket kinunana, "Apay saanyo kadi a nabasa iti inaramid ni David idi nabisinan, isuna ken dagiti lallaki nga kaduana? ⁴ Napan ket simrek iti balay ti Dios, ken innalana iti nasantuan nga tinapay ket kinnanna ti dadduma kadagitoy, ken inikkanna met dagiti lallaki nga kakaduana iti kanenda, nga uray nainkalintegan laeng nga kanen dagiti papadi." ⁵ Ket imbagana kadakuada, "Ti Anak ti Tao ket Apo iti Aldaw ti Panaginana." ⁶ Napasamak met iti sabali nga Aldaw ti Panaginana nga napan isuna idiay sinagoga ken sinuroanna dagiti tattao sadiay. Adda idiay ti maysa a lalaki nga paralitiko ti makannawan nga imana. ⁷ Dagiti eskriba ken dagiti Pariseo ket nainget ti panangbuyada kenkuana tapno kitaenda no mangagas isuna ti siasinoman iti Aldaw ti Panaginana, ta bareng no makabirukda iti rason nga ipabasolda kenkuana. ⁸ Ngem ammona dagiti panpanunutenda ket kinunana iti lalaki nga paralitiko ti imana, "Bumangonka ken agtakder ka ditoy nagtetengngaan iti tunggal maysa." Isunga bimmangon ti lalaki ket nagtakder sadiay. ⁹ Kinuna ni Hesus kadakuada, "Damagek kadakayo, nainkalintegan kadi iti agaramid ti nasayaat wenno dakes Iti Aldaw ti Panaginana, ti isalakan ti maysa a biag wenno dadaelen daytoy?" ¹⁰ Kalpasanna kinitana amin ida ket kinunana iti lalaki, "Iyunnatmo dayta imam." Inaramidna ngarud, ket nagsubli ti pigsa dagiti imana. ¹¹ Ngem nakaungetda unay, ket nagtutungtunganda no ania ti mabalin nga aramidenda ken ni Hesus. ¹² Kadagidiay nga al-aldaw, napasamak nga rimmuar isuna ket napan idiay bantay nga agkararag. Intuloyna ti nagkararag iti Dios iti nagpatnag. ¹³ Idi bimmigaten, inayabanna dagiti adalanna ket nangpili iti sangapulo ket dua kadakuada, nga inawaganna met laeng iti "apostoles." ¹⁴ Ti nagan dagiti apostoles ket ni Simon (nga isu met laeng ni Pedro) ken ti kabsatna a lalaki, Andres, Santiago, Juan, Felipe, Bartolome, ¹⁵ Mateo, Tomas, Santiago nga anak ni Alfeo, Simon nga maawagan ti Patriota, ¹⁶ Hudas nga anak ni Santiago, ken ni Hudas Iscariote nga nagbalin a traydor. ¹⁷ Kalpasanna bimmaba ni Hesus manipud idiay bantay kaduana dagiti disipolona ket nagtakderda iti patad a lugar nga adda iti dakkel nga bunggoy ken kasta met nga nagado a tattao manipod idiay Judea ken Jerusalem, ken dagiti adda iti igid ti baybay ti Tiro ken Sidon. ¹⁸ Immayda nga agdenggegda kenkuana ken mapaimbagda kadagiti sakitda. Dagiti tattao nga burburiburen dagiti narugit nga espiritu ket naimbaganda. ¹⁹ Ikarkarigatan ti tunggal maysa nga adda iti bunggoy a sagiden isuna gapo iti panakabalin nga mangpaimbag ket rumrumuar manipud kenkuana, ket pinaimbagna ida amin. ²⁰ Kalpasan ket kimmita isuna kadagiti adalanna, ket kinunana, "Nabendisionankayo nga napanglaw, ta dakayo ti agtagikua iti Pagarian ti Dios. ²¹ Nabendisionankayo nga mabisbisinan ita, ta mapnek kayonto. Nabendisionankayo nga agladladingit ita, ta agkatawakayonto." ²² Nabendisionankayo no gurguraendakayo dagiti tattao ken isinsinadakayo kadagiti bunggoyda, ken pabpabainandakayo, ken uy-uyawenda dagiti naganyo ta dakes ti panagkunada, gapu iti Anak ti Tao. ²³ Agragsakkayo iti dayta nga aldaw ket aglagtokayo gapu ti rag-o, gapu ta awan duadua a maaddaankayo iti naindaklan a gunguna sadi langit, ta kasta met laeng iti inaramid dagiti kapuonanda kadagiti propeta. ²⁴ Ngem asikayo pay dakayo nga nabaknang, ta naawatyon iti liwliwayo. ²⁵ Asikayo a napnek ita, ta mabisinan kayonto. Asikayo nga agkatkatawa ita, ta agladingit ken agdung-awkayto. ²⁶ Asikayo, no amin nga tao ket agsaoda ti nasayaat maipanggep kadakayo, ta kasta met ti inaramid dagiti kapuonanda kadagiti sinan-propeta. ²⁷ Ngem ibagak kadakayo a dumdumngeg, ayatenyo dagiti kabusoryo ken nasayaat ti aramidenyo kadagiti gumurgura kadakayo. ²⁸ Bendisionanyo dagiti mangilunlunod kadakayo ken ikararaganyo dagiti mangidadanes kadakayo. ²⁹ Kenkuana a nangsipat ti maysa a pingpingmo, ipasipatmo pay iti bangir. No innala ti maysa a tao ti kagaymo, saanmo nga ipaidam ti pagan-anaymo. ³⁰ Ikkam ti tunggal maysa nga dumawat kenka. No adda ti mangala iti aniaman a kukuam, saanmo nga ibaga kenkuana nga isublina kenka. ³¹ No ania ti kayatmo nga aramiden ti tao kenka, masapul nga isu met ti aramidem kadakuada. ³² No dagiti laeng tattao nga agay-ayat kenka ti ayatem, ania ngay ti pakaidayawam iti dayta? Ta uray pay dagiti managbasol ket ay-ayatenda met dagiti agay-ayat kadakuada. ³³ No agaramidka laeng ti nasayaat kadagiti agar-aramid ti nasayaat kenka, ania ngay ti pakaidayawam iti dayta? Ta uray pay dagiti managbasol ket isu met laeng ti ar-aramidenda. ³⁴ No ti laeng pabuludam kadagiti banag ket dagiti laeng tattao nga namnamaem nga makaisubli kenka, ania ngay ti pakaidayawam iti dayta? Uray dagiti managbasol ket agpabulodda kadagiti managbasol, ken mangnamnamada nga umawatda iti isu met laeng nga gatad. ³⁵ Ngem ayatenyo dagiti kabusoryo ken nasayaat ti aramidenyo kadakuada. Pabuludanyo ida, nga saanyo a pakadanagan ti maipanggep iti maisubli kadakayo, ket naindaklanto ti gungunayo. Agbalinkayonto nga annak ti Kangatoan, ta isuna mismo ket naasi kadagiti saan nga managyaman ken kadagiti dakes nga tattao. ³⁶ Manangaasikayo koma, a kas iti Amayo a manangaasi. ³⁷ Saankayo nga mangukom, ket saankayto met a maukom. Saankayo nga mangpabasol, ket saandakayto met a pabasulen. Pakawanenyo dagiti dadduma, ket mapakawankayto met. ³⁸ Mangtedkayo kadagiti dadduma, ket maitedto met kadakayo. Sukat a naan- anay, nasedsed ken agluplupyas nga maibukbokdanto iti saklotmo. Ta no ania iti panangrukod nga usarem, isunto met iti pangrukod a maisubli kenka." ³⁹ Kalpasanna imbagana met kadakuada ti maysa a pangarig. " Mabalin kadi nga iturong ti bulsek ti maysa pay a bulsek? Ket no aramidenna, matinnagda nga agpada iti abot, saan kadi? ⁴⁰ Ti adalan ket saan nga nalalaing ngem iti manursurona, ngem no ti tunggal maysa ket masuruan a naimbag, agbalin isuna a kas iti manursurona. ⁴¹ Ken apay nga kitaem ti bassit a piraso ti garami nga adda iti mata ti kabsatmo ngem saan mo nga madlaw ti troso iti mismo a matam? ⁴² Kasano nga ibagam iti kabsatmo, 'Kabsat, bay-am nga ikkatek dayta bassit nga piraso ti garami dita matam,' ket dimto pay maikkat ti troso nga adda iti mismo a matam? Sika nga aginsisingpet! Ikkatem pay nga umuna ti troso dita matam, ket makitamto nga nalawag a maikkat mo ti piraso iti garami nga adda iti mata ti kabsatmo. ⁴³ Ta awan ti nasayaat nga kayo nga agbunga ti nalungsot, wenno awan ti nalungsot nga kayo nga agbunga iti nasayaat. Ta ti tunggal kayo ket maammoan babaen iti bungana. ⁴⁴ Ta saan nga agburas ti tao iti igos manipud iti sisiitan nga kayo, wenno agburas iti ubas manipud iti sisiitan nga kakaywan. ⁴⁵ Ti nasayaat nga tao paruarenna iti nasayaat a kinabaknang manipod iti pusona, ken ti dakes nga tao paruarenna ti kinadakes manipud iti pusona. Ta manipud iti linaon ti pusona, agsao ti ngiwatna. ⁴⁶ Apay nga awagandak ti, 'Apo, Apo,' ngem diyo met tungtungpalen dagiti banag nga ibagbagak? ⁴⁷ Tunggal tao nga umay kaniak ken dengdenggenna dagiti saok ken tungtungpalenna ida, ibagak kadakayo no ania ti kaiyariganna. ⁴⁸ Kaiyariganna ti tao nga nagpatakder ti balay, nagkali ti nauneg nga abot iti daga ket nagpatakder iti pundasyon ti balayna iti rabaw ti bato. Idi immay ti layos, dinungpar ti dadakkel nga alon dayta a balay, ngem pulos nga saanna a nagunggon gapu ta naipatakder nga sititibker. ⁴⁹ Ngem ti tao nga dumdumngeg kadagiti sasaok ken saanna nga tungtungpalen ida, kaiyariganna ti tao nga nagpatakder ti balayna iti rabaw ti daga nga awanan ti pundasyon. Ket idi dinungpar dagiti dadakkel nga alon dayta nga balay, narba nga sigud ken naminpinsan a nadadael.