¹ Itatta, ti napasamak, kabayatan nga ar-aribungbungan dagiti tattao ni Hesus ken dumdumngegda iti sao ti Dios, isuna ket agtaktakder iti igid ti dan-aw ti Genesaret. ² Nakitana ti dua nga bangka a nakabati iti igid ti dan-aw. Bimmaba dagiti agkalkalap nga ug-ugasanda dagiti iketda. ³ Limmugan ni Hesus iti maysa kadagiti bangka nga kukua ni Simon, ket imbagana kenkuana nga ipanna iti danom nga adayo bassit iti igid. Ket nagtugaw ken sinuroanna dagiti tattao manipud iti bangka. ⁴ Idi nalpas isuna nga nagsao, kinunana kenni Simon, "Ipanmo daytoy bangkam iti naun-uneg pay nga danom ket ibabam dagiti iketmo tapno makakalapka. " ⁵ Simmungbat ni Simon ket kinunana, "Maestro, nagpatpatnag kami a nagtrabtrabaho, ngem awan pay a pulos ti naalami, ngem gapu iti saom, ibabak ngarud dagiti iket." ⁶ Ket idi inaramidda daytoy, adu launay nga lames ti naalada, ken dandanin a mapisang dagiti iketda. ⁷ Ngarud, pinayapayanda dagiti kaduada nga adda iti dadduma nga bangka nga umayda ken tumulongda kadakuada. Immayda ket pinunnoda dagiti bangka, isu nga nangrugida a lumned. ⁸ Ngem ni Simon Pedro idi nakitana daytoy, nagparintumeng iti sangoanan ni Hesus a kunana, "Panawannak, ta maysaak nga managbasol a tao, Apo." ⁹ Agsipud ta nasdaaw isuna ken kasta met kadagiti kakaduana kadagiti lames a nakalapanda. ¹⁰ Nairaman ditoy ni Santiago ken ni Juan, annak ni Zebedeo, nga kakadua ni Simon. Kinuna ni Hesus ken ni Simon, "Saanka nga agbuteng, ta manipud ita, tattaon ti inka kalapen." ¹¹ Ket kalpasan nga impaiggidda dagiti bangkada, pinanawanda amin ket simmurotda kenkuana. ¹² Kalpasan daytoy, kabayatan nga adda isuna ti maysa kadagiti siudad, ket pagammoan, adda iti lalaki sadiay nga napnoan iti ketong. Idi nakitana ni Hesus, nagpakleb ken nagpakpakaasi kenkuana, kinunana, "Apo, no pagayatam, mabalinnak nga aramiden a nadalus." ¹³ Ket inggaw-at ni Hesus ti imana ket sinagidna isuna a kunana, "Mayatak. Agbalin ka nga nadalus." Ket dagus a pimmanaw iti ketong kenkuana. ¹⁴ Binilin ni Hesus isuna nga saanna nga ibagbaga iti siasinoman, ngem imbagana kenkuana, "Mapanka ket agparangka iti padi ket mangiyegka ti daton iti pannakadalusmo, sigun iti inbilin ni Moises, a kas pammaneknek kadakuada." ¹⁵ Ngem iti damag maipanggep kenkuana ket ad-adda pay nga naiwaragawag iti adayo ket adu nga tattao ti nag-uurnong nga agdengngeg iti panangisurona ken mapaimbag kadagiti saksakitda. ¹⁶ Ngem masansan nga umadayo isuna a mapan kadagiti awan matagtagitao a lugar ken nagkararag. ¹⁷ Kalpasan iti maysa kadagidiay nga al-aldaw a nangisursuro isuna, ket adda nga agtugtugaw dagiti Pariseo ken dagiti manursuro ti linteg a naggapo kadagiti nadumaduma nga barrio iti rehion ti Galilea ken Judea, ken kasta met iti siudad iti Jerusalem. Adda kenkuana ti pannakabalin ti Apo nga mangpaimbag. ¹⁸ Itatta, adda dagiti lalaki a simmangpet nga mangaw-awit iti lalaki a paralitiko nga nakaidda iti ikamen, ket nagsapulda iti wagas tapno maiserrekda ken maipaiddada iti sangoanan ni Hesus. ¹⁹ Saanda a makasapul iti wagas tapno maiserrekda isuna gapu iti kaaadu ti tattao. Isu nga immulida iti rabaw ti balay, ket inbabada ti lalaki nga adda iti ikamen manipud iti atep, iti nagtetengngaan dagiti tattao, iti mismo nga sangoanan ni Hesus. ²⁰ Idi nakita ni Hesus ti pammatida, kinunana, "Lalaki, dagiti basbasolmo ket napakawanen." ²¹ Inrugi dagiti eskriba ken Pariseo nga isaludsod daytoy a kunada, "Siasino daytoy nga agsasao iti tabbaaw? Siasino ti mabalin nga mangpakawan kadagiti basbasol, ngem ti Dios laeng?" ²² Ngem ni Hesus, agsipud ta ammona no ania iti panpanunotenda, simmungbat ket kinunana kadakuada, "Apay nga salsaludsodenyo daytoy kadagiti puspusoyo? ²³ Ania ti nalaklaka nga ibaga, 'Dagiti basbasolmo ket napakawanen' wenno ti ibaga nga 'Tumakderka ket magnaka?' ²⁴ Ngem tapno maamoanyo nga ti Anak ti Tao ket addaan turay ditoy daga nga mangpakawan kadagiti basbasol, ibagak kenka, 'Tumakderka, alaem ta kamenmo ket agawidkan idiay balaymo.'" ²⁵ Dagus isuna a bimmangon iti sangoananda ket innalana iti kamen nga nagiddaanna; ket nagsubli iti balayna, nga agdaydayaw iti Dios. ²⁶ Nagsiddaaw iti tunggal maysa ket dinaydayawda ti Dios. Napnoanda iti panagbuteng, ket kunada, "Naidumduma dagiti banbanag a nakitami ita nga aldaw." ²⁷ Kalpasan a napasamak dagitoy a banbanag, rimmuar ni Hesus manipud sadiay ket nakitana ti maysa nga agsingsingir iti buis a managan Levi nga agtugtugaw iti pagsingsingiranna iti buis. Kinunana kenkuana, "Surotennak." ²⁸ Ngarud, timmakder ni Levi, pinanawanna amin ket sinurotna ni isuna. ²⁹ Ket nangisagana ni Levi iti dakkel a padaya idiay balayna, ket adu dagiti agsingsingir iti buis sadiay, ken dadduma pay nga tattao nga nakasadag iti lamisaan a makipangpangan kadakuada. ³⁰ Ngem nagtantanabutob dagiti Pariseo ken eskriba kadagiti adalanna, a kunada, "Apay nga mangan ken uminomkayo a kakaduayo dagiti agsingsingir iti buis ken dadduma a managbasol nga tattao? ³¹ Simmungbat ni Hesus kadakuada, "Saan nga masapul dagiti nasalun-at nga tattao iti mangngagas, dagiti laeng masaksakit nga tattao iti agkasapulan. ³² Saanak nga immay tapno ayaban dagiti nalinteg nga tattao, ngem tapno ayaban dagiti managbasol iti panagbabawi." ³³ Kinunada kenkuana, "Masansan nga agayunar ken agkararag dagiti adalan ni Juan, ken kasta met dagiti adalan dagiti Pariseo. Ngem dagiti adalam, mangmangan ken uminomda." ³⁴ Kinuna ni Hesus kadakuada, "Mabalin kadi nga pagayunaren ti siasinoman kadagiti abay ti nobio no kaduada pay laeng ti nobio? ³⁵ Ngem umayto iti al-aldaw nga maipanaw ti nobio kadakuada, ket kadagita nga al-aldaw ket agayunarda." ³⁶ Ket nagsarita pay ni Hesus iti pangngarig kadakuada, "Awan iti tao a mangpigis ti lupot iti baro nga pagan-anay ket usarenna tapno tarimaanenna iti daan nga pagan-anay. No inaramidna dayta, pigisenna iti baro a pagan-anay, ket ti lupot nga naggapu iti baro a pagan-anay ket saanton nga umanay iti daan a pagan-anay. ³⁷ Kasta met, awan ti tao a mangikabil ti baro nga arak iti daan a pagkabilan nga lalat. No inaramidna dayta, bettaken ken dadaelen ti baro nga arak dagiti pagkabilan a lalat ket maibelleng ti arak. ³⁸ Masapul nga maikabil ti baro nga arak iti kaar-aramid nga pagkabilan a lalat. ³⁹ Awan ti tao, nga kalpasan nga imminom iti daan nga arak, agtarigagay iti baro nga arak, agsipud ta kunana, 'Naim-imas ti daan.'"