¹ Ket nagsao isuna kadakuada iti maysa a pangngarig no kasanoda a kanayon koma nga agkararag ken saan nga maupay, ² kinunana, "Iti maysa a siudad adda maysa nga ukom nga awan panagbutengna iti Dios ken awan respetona iti tattao. ³ Tatta adda ti maysa nga balo iti dayta a siudad, ket masansan iti ipapanna kenkuana, a kunkunana, 'Tulungannak a manggun-od iti hustisya maipapan ti kabusorko.' ⁴ Iti nabayag a tiempo ket saanna a kayat nga tulongan isuna, ngem kalpasanna dayta kinunana iti bagina, 'No man pay saanak nga agbuteng iti Dios wenno respetoen ti tao, ⁵ ngem gapu ta mangmangted kaniak iti riribok daytoy nga balo, tulungakon isuna a manggun-od iti hustisya, tapno saannak nga bannugen babaen iti kanayonna a panagsubli-subli." ⁶ Ket kinuna ti Apo, "Denggenyo no ania ti kuna iti saan a nalinteg nga ukom. ⁷ Ita saan aya nga iyegto met ti Dios iti hustisya kadagiti napilina a tattao nga umawag kenkuana iti aldaw ken rabii? Agbayag pay kadi isuna kadakuada? ⁸ Ibagak kadakayo nga itednanto a dagus ti hustisya kadakuada. Ngem inton umay iti Anak ti Tao, addanto pay ngata pammati a masarakanna ditoy daga?" ⁹ Ket sinaritana pay iti maysa a pangngarig kadagiti dadduma nga naallukoy iti bagida nga isuda ket nalinteg ken mangum-umsi kadagiti dadduma a tattao, ¹⁰ "Adda dua a lalaki a napan idiay templo nga agkararag— iti maysa ket Fariseo ken ti maysa met ket agsingsingir iti buis. ¹¹ Timmakder ti Fariseo ket inkararagna dagitoy a banbanag maipanggep iti bagina, 'Dios, agyamanak ta saanak a kas kadagiti sabali a tattao nga agtatakaw, saan nga nalinteg a tattao, mannakikamalala, wenno kas iti daytoy nga agsingsingir iti buis. ¹² Agayunarak iti dua a daras iti makalawas. Itedko ti apagkapulo iti amin a masapulak.' ¹³ Ngem ti agsingsingir iti buis, nga agtaktakder iti adayo, pulos a saanna pay nga maitangad ti mata sadi langit, ngem dandanogenna iti barukongna, kunkunana, 'O Dios, maasika kaniak, a managbasol.' ¹⁴ Ibagak kadakayo, nagsubli daytoy a tao iti pagtaenganna nga ad-adda a napalinteg ngem iti sabali, agsipud ta iti tunggal maysa a mangitan-ok iti bagina ket maipababanto, ngem iti tunggal maysa nga agpakumbaba iti bagina ket maitan-okto." ¹⁵ Dagiti tattao ket iyegda pay dagiti ub-ubing kenkuana tapno sagidenna ida, ngem idi nakita dagiti adalan daytoy, pinaritanda ida. ¹⁶ Ngem inayaban ida ni Hesus kenkuana, kunana, "Palubosanyo dagiti babassit nga ubbing nga umay kaniak, ken saanyo ida nga paritan. Gapu ta iti pagarian ti Dios ket maipaay iti kas kadakuada. ¹⁷ Pudno ibagak kadakayo, siasinoman a saan nga umawat iti pagarian ti Dios a kas iti ubing ket saanto pulos a makastrek iti daytoy." ¹⁸ Maysa a mangiturturay iti nagdamag kenkuana, kunana, "Naimbag a maestro, ania iti masapul nga aramidek tapno matawidko iti agnanayon nga biag?" ¹⁹ Kinuna ni Hesus kenkuana, "Apay nga awagannak a naimbag? Awan iti naimbag no di ket ti Dios laeng. ²⁰ Ammom dagiti bilbilin— saanka a makikamalala, saanka nga pumatay, saanka nga agtakaw, saanka nga agsaksi iti ulbod, raemem ti amam ken ti inam." ²¹ Kinuna ti mangiturturay, "Amin dagitoy a banbanag ket pinagtulnogak manipud pay idi kinaagtutubok." ²² Idi nangngegan ni Hesus dayta, kinunana kenkuana, "Adda pay maysa a banag nga pagkurangam. Masapul nga ilakom iti amin nga adda kenka ket iwarasmo kadagiti nakurapay, ket maaddaankanto iti gameng sadi langit— ket umayka, surotennak." ²³ Ngem idi nangngeganna dagitoy a banbanag, nakaro iti ladingitna agsipud ta isu ket nabaknang unay. ²⁴ Ket idi nakita ni Hesusa maladingitan isuna, kinunana, "Nagrigat ketdin aya kadagiti nabaknang iti sumrek ti pagarian ti Dios! ²⁵ Agsipud ta nalaklaka pay a sumrek ti kamelio iti mata ti dagum, ngem iti nabaknang a tao nga sumrek iti pagarian ti Dios." ²⁶ Kinuna dagiti nakangngeg iti daytoy, "Ket siasino ngarud iti mabalin a maisalakan?" ²⁷ Simmungbat ni Hesus, "Dagiti banbanag a saan nga mabalin iti tao ket mabalin iti Dios." ²⁸ Kinuna ni Pedro, "Adtoy, inbatimi amin a banag nga kukuami ket simmurot kami kenka." ²⁹ Kinuna ngarud ni Hesus kadakuada, "Pudno, ibagak kadakayo nga awan ti siasinoman a nangpanaw iti balayna, wenno iti asawana a babai, wenno iti kakabsatna a lalaki, wenno dagiti nagannakna, wenno dagiti annakna, para iti pagsayaatan iti pagarian ti Dios, ³⁰ a saanto nga umawat iti ad-adu pay iti daytoy a tiempo, ken iti umay pay a tiempo, biag nga agnanayon." ³¹ Kalpasan nga inummongna dagiti sangapulo ket dua kenkuana, kinunana kadakuada, "Kitaenyo, sumang-attayo idiay Jerusalem, ket amin a banbanag nga insurat dagiti propeta maipanggep iti Anak ti Tao ket matungpalto. ³² Agsipud ta maiyawatto isuna kadagiti Hentil, ken mairurumento, ken mapabainanto, ken matupraanto. ³³ Kalpasan a saplitenda isuna, papatayenda ken iti maikatallo nga aldaw, agungarto. ³⁴ Awan ti naawatanda kadagitoy a banbanag, ken dagitoy a sasao ket nailemmeng kadakuada, ken saanda a naawatan dagiti banbanag nga naisao. ³⁵ Napasamak a bayat nga umas-asideg ni Hesus iti Jerico, adda maysa a bulsek a nakatugaw iti igid ti kalsada nga agpalpalama, ³⁶ ket idi nangngegna nga lumablabas ti adu a tattao, sinaludsodna no ania iti mapaspasamak. ³⁷ Imbagada kenkuana a lumablabas ni Hesus a taga Nazaret. ³⁸ Nagpukkaw ngarud ti bulsek a kunana,"Hesus, anak ni David, maasi ka kaniak." ³⁹ Dagiti immuna a magmagna ket tinubngar da ti bulag, imbagada kenkuana nga agulimek. Ngem inyad-addana pay iti nagpukkaw, "Anak ni David, maasika kaniak." ⁴⁰ Simmardeng ni Hesus ket inbilinna nga iyegda ti lalaki kenkuana. Ket idi asidegen ti bulsek a lalaki, sinaludsod ni Hesus kenkuana, ⁴¹ "Ania ti kayatmo nga aramidek para kenka?" Insungbatna, "Apo, kayatko a makakita." ⁴² Kinuna ni Hesus kenkuana, "Awatem ti panagkitam. Pinaimbagnaka iti pammatim." ⁴³ Dagus nga naawatna iti panagkitana, ken simmurot kenkuana, nga agdaydayaw iti Dios. Idi nakita daytoy dagiti amin a tattao, indayawda iti Dios.