¹ Simrek ni Hesus ken lumablabas idiay Jerico. ² Sadiay, adda iti tao nga managan Zakeo. Isuna ket panguloen dagiti agsingsingir iti buis ken nabaknang. ³ Padpadasenna nga kitaen no siasino ni Hesus, ngem saanna a makita ta malingdan iti tattao, gapu ta bassit isuna. ⁴ Nagtaray ngarud nga inunaanna dagiti tattao ket kimmalay-at iti maysa a kayo ti sikamoro a mangkita kenkuana, gapu ta lumabas ni Hesus sadiay. ⁵ Idi immayen ni Hesus idiay nga lugar, timmangad ket kinunana kenkuana, "Zakeo, bumaba kadta nga dagus, ta ita nga aldaw, masapul nga aggianak idiay balaymo." ⁶ Isunga nagdardaras a bimmaba ket siraragsak a pinasangbayna isuna. ⁷ Idi nakita daytoy dagiti amin, nagreklamoda, kunada, "Simrek met isuna a mangbisita iti tao a managbasol." ⁸ Timmakder ni Zakeo ket kinunana iti Apo, "Kitaenyo, Apo, ti kagudua kadagiti sanikuak ket itedko kadagiti napanglaw, ken no bilang man ta adda iti kinusit ko iti aniaman a banag, isublik iti mamin-uppat nga daras iti mismo a bilangna." ⁹ Kinuna ni Hesus kenkuana, "Ita nga aldaw, immay iti pannakaisalakan iti daytoy nga pagtaengan, gapu ta isuna ket anak met ni Abraham. ¹⁰ Agsipud ta immay iti Anak ti Tao tapno inna biruken ken isalakan dagiti tattao a napukaw." ¹¹ Kabayatan a nangngeganda dagitoy a banbanag, intuloyna iti nagsao ket imbagana ti maysa a pangngarig, gapu ta asideg isunan idiay Jerusalem, ken pinanunotda nga iti pagarian ti Dios ket agparangen iti mabiit. ¹² Isunga kinunana, "Adda ti maysa nga mararaem a tao nga napan iti adayo a pagilian tapno inna awaten ti maysa a pagarian ket agsubli kalpasanna. ¹³ Inayabanna iti sangapulo kadagiti adipenna ket inikkanna ida iti sangapulo a mina, ken kinunana kadakuada, 'Agnegosyo kayo aginggana nga agsubliak.' ¹⁴ Ngem kagurgura isuna dagiti kailianna, isu nga nangibaonda kadagiti mangidaulo kadakuada a nangsaruno kenkuana, kunada, 'Saanmi nga itulok nga iturayan nakami daytoy nga tao.' ¹⁵ Ket napasamak nga idi nagsubli, ta naawatnan iti pagarian, pinaayabanna dagiti adipenna a nangtedanna iti kuarta tapno maammoanna no ania nga galansia ti naaramidanda iti panagnegosyoda. ¹⁶ Immay kenkuana ti immuna ket kinunana, 'Apo, ti minam ket nakaaramid iti sangapulo pay a mina.' ¹⁷ Ket kinuna ti mararaem a tao kenkuana, 'Nasayaat ti inaramid mo, naimbag nga adipen. Gapu ta managtungpal ka iti bassit a banag, iturayam iti sangapulo a siudad.' ¹⁸ Immay ti maikadua ket kinunana, 'Ti minam apo, ket nakaaramid iti lima nga mina.' ¹⁹ Kinuna ti mararaem a tao kenkuana, 'Iturayam iti lima a siudad.' ²⁰ Ket immay ti sabali pay a kinunana, 'Apo, adtoy ti minam, nga indulin ko a sitatalged iti lupot, ²¹ agsipud ta mabutengak kenka, nalabes ka ngamin a tao. Alaem dagiti saan mo nga inpundar ken apitem ti saan mo nga inmula.' ²² Kinuna ti mararaem a tao kenkuana, 'Babaen kadagiti sinaom ket ukomenka, sika a nadakes nga adipen. Ammom met gayam a nalabesak nga tao, ta alaek dagiti saan ko nga inpundar, ken apitek uray saan ko nga inmula. ²³ Ket apay ngarud ta saan mo nga indulin ti kuartak iti bangko tapno iti panagsublik ket alaek nga adda iti tubuna?' ²⁴ Kinuna ti mararaem nga tao kadagiti nakatakder, 'Alaenyo kenkuana ti mina, ket itedyo iti addaan sangapulo nga mina.' ²⁵ Kinunada kenkuana, 'Apo, adda ti sangapulonan a mina.' ²⁶ Ibagak kadakayo, ti tunggal maysa nga addaan ket maikkan pay, ngem kenkuana nga awanan, uray ti kakaisuna ket maala pay. ²⁷ Ngem dagitoy a kabusorko, dagiti saan nga mangkayat kaniak a mangituray kadakuada, iyegyo isuda ditoy ket patayenyo ida iti sangwanak." ²⁸ Idi naibaganan dagitoy a banbanag, immuna isuna, nga simmang-at idiay Jerusalem. ²⁹ Ket napasamak nga idi umasidegen isuna idiay Betfage ken Betania, idiay bantay nga maawagan iti Olibo, imbaonna ti dua kadagiti adalanna ³⁰ nga kinunana, "Mapan kayo iti sumaruno a bario. No nakastrek kayon, masarakanyo iti asno nga awan pay nangsaksakay. Warwaranyo ti galotna ket iyegyo kaniak. ³¹ No adda iti agsaludsod kadakayo, 'Apay ta warwarwarenyo ti galotna?' Ibagayo nga 'Kasapulan ngamin ti Apo." ³² Napan dagiti naibaon ket nasarakanda ti asno a kas iti imbaga ni Hesus kadakuada. ³³ Kabayatan a warwarwarenda ti galotna, kinuna dagiti akinkukua kadakuada, "Apay ngay ta warwarwarenyo ti galot ti asno?" ³⁴ Kinunada, "Kasapulan ngamin ti Apo." ³⁵ Inyegda daytoy ken ni Hesus, ket inyaplagda dagiti kagayda iti likud ti asno ket pinagsakayda ni Hesus. ³⁶ Bayat iti ipapanna, inyaplagda dagiti kagayda iti kalsada. ³⁷ Kabayatanna nga umasidegen isuna iti pasalog a paset ti Bantay Olibo, rinugian amin dagiti nakaad-adu nga adalan a nagrag-o ken nagdayawda iti Dios nga ipukpukkawda dagiti naimatanganda nga aramid a pakakitaan iti pannakabalin, ³⁸ a kunada, "Nabendisionan ti ari nga umay babaen iti nagan ti Apo! Kapia manipod idiay langit ken dayag iti kangatoan!" ³⁹ Dagiti dadduma a Fariseo nga adda kadagiti nakaad-adu a tao ket kinunada kenkuana, "Maestro, tubngarem man dagiti adalanmo." ⁴⁰ Simmungbat ni Jesus ket kinunana, "Ibagak kadakayo, no agtatalna dagitoy, dagiti batbato iti agpukkaw." ⁴¹ Idi asidegen ni Hesus iti siudad, sinangitanna daytoy, ⁴² kunana, "No koma ta naammoam iti daytoy nga aldaw, dagiti banbanag a makaited iti kapia kenka! Ngem ita, nailemmengen dagitoy kadagiti matam. ⁴³ Ta umayto dagiti aldaw kenka inton dagiti kabusormo ket mangipatakderda kadagiti pader iti aglawlawmo ken palawlawandaka ket darupendaka manipud iti amin a nagsinumbangir. ⁴⁴ Pang-urendaka aginggana a maidasayka iti daga, ken dagiti annakmo. Awanto ti ibatida nga bato iti sabali gapu ta saanmo nga nabigbig ti oras iti panagbisitam." ⁴⁵ Simrek ni Hesus iti templo ken rinugianna ti nangpatalaw kadagiti aglaklako, ⁴⁶ kinunana kadakadua, "Adda a naisurat, 'Ti balay ko ket balay to a pagkararagan,' ngem pinagbalinyo metten a rukib dagiti agtatakaw." ⁴⁷ Isu nga inaldaw a nangisuro ni Hesus idiay templo. Dagiti panguloen a papadi ken eskriba ket kayatda nga dadaelen isuna, uray pay dagiti mangidadaulo kadagiti tattao, ⁴⁸ ngem awan iti mabirukanda nga wagas tapno aramiden daytoy agsipud ta amin dagiti tattao napasnekda nga agdengdengngeg kenkuana.