¹ Kinuna ni Hesus kadagiti adalanna, "Pudno nga umay dagiti banbanag a pakaigapuan iti panagbasol, ngem asi pay isuna a pagapuan dagitoy a pakaalilawan! ² Nasaysayaat pay no makabilan ti tengngedna iti bato a paggilingan ken maitapuak isuna iti baybay ngem ti agbalin nga maysa a pakaigapuan ti pakaitublakan dagiti babassit. ³ Siputanyo dagiti bagbagiyo. No nakabasol ti kabsatyo, babalawenyo isuna, ken no agbabawi, pakawanenyo isuna. ⁴ No nakabasol isuna kenka iti naminpito a daras iti maysa nga aldaw, ken maminpito a daras nga agsubli kenka, a kunana, 'Agbabawiak,' masapul a pakawanenyo isuna!" ⁵ Kinuna dagiti apostol iti Apo, "Padakkelem ti pammatimi." ⁶ Kinuna ti Apo, "No adda pammatiyo a kas iti bukel ti mustasa, mabalinyo nga kunaen iti daytoy nga kayo iti sikamoro, 'Maparutka, ken maimulaka iti baybay,' ket adda nga agtulnog kenka. ⁷ Ngem siasino kadakayo, nga addaan iti adipen nga agar-arado wenno aggay-aywan iti karnero, ibagana kenkuana no sumangpet manipud iti taltalon, 'Umayka a dagus ket agtugawka tapno manganka.' ⁸ Saanna kadi nga ibaga kenkuana, 'Mangisaganaka iti aniaman a taraon nga kanek, ken agikabilka iti barikes dita kawesmo ken pagserbiannak agingga a malpasak a mangan ken uminom. Ket kalpasanna mabalinkan a mangan ken uminom.' ⁹ Saan isuna nga agyaman iti adipen gapu ta inaramidna dagiti banbanag a naibilin, saan kadi? ¹⁰ Uray met kadakayo, inton naaramidyo amin a naibilin kadakayo, masapul nga ibagayo, 'Dikami maikari nga ad-adipen. Inaramidmi laeng no ania ti rumbeng nga aramidenmi.'" ¹¹ Napasamak ket kabayatan nga addada iti dalan nga agturong idiay Jerusalem, agdaldalyasat isuna idiay nagbaetan iti Samaria ken Galilea. ¹² Idi sumrek isuna iti maysa nga barrio, sadiay sinabat isuna iti sangapulo a lallaki nga addaan ketong. Nakatakderda iti adayo manipud kenkuana ¹³ ken pinigsaanda dagiti timekda, a kunada, "Hesus, Maestro, kaasiannakami." ¹⁴ Idi nakitana isuda, kinunana kadakuada, "Mapankayo ken agparangkayo kadagiti papadi." Kabayatan iti ipapanda ket naagasanda. ¹⁵ Idi nakita ti maysa kadakuada nga immimbagen isuna, nagsubli, ket iti napigsa a timek indaydayawna iti Dios. ¹⁶ Nagdumog isuna iti sakaanan ni Hesus, ket nagyaman kenkuana. Ita isuna ket Samaritano. ¹⁷ Ket kinuna ni Hesus, "Saan aya nga sangapulo ti nadalusan? Ayandan dagiti siam? ¹⁸ Awan kadin ti dadduma a nagsubli nga mangted dayaw iti Dios, malaksid iti daytoy a gangannaet?" ¹⁹ Kinunana kenkuana, "Tumakderka, ken mapanka. Ti pammatim ti nangpaimbag kenka." ²⁰ Gapu ta sinaludsod dagiti Fariseo no kaano nga umay ti pagarian ti Dios, simmungbat ni Hesus kadakuada a kinunana, "Ti pagarian ti Dios ket saan a maysa nga banag a maimatangan. ²¹ Urayno ibagadanto, 'Kitaem, adtoyen! wenno, 'Adda idiay!' Ngem kitaem, ti pagarian iti Dios ket adda kadakayo." ²² Kinuna ni Jesus kadagiti adalan, "Umayto dagiti al-aldaw a tarigagayanyo a makita ti maysa kadagiti aldaw iti Anak ti Tao, ngem daytoy ket saanyonto a makita. ²³ Ket ibagada kadakayo, 'Kitaenyo, sadiay! Kitaenyo, ditoy!' Ngem saan kayo nga rumwar wenno suroten isuda, ²⁴ gapu ta no kasano ti panagparang ti kimat inton agsirap manipud iti maysa nga paset ti tangatang nga agturong iti maysa a paset ti tangatang, ngarud kasdiayto met ti Anak ti Tao inton aldawna. ²⁵ Ngem masapul nga agsagaba nga umuna iti adu a banbanag ken laksiden daytoy nga henerasyon. ²⁶ Kas iti napasamak idi al-aldaw ni Noe, kasdiayto met ti mapasamak kadagiti al-aldaw iti Anak ti Tao. ²⁷ Nanganda, nagbartekda, nangasawada, ken naitedda nga maasawa agingga iti aldaw nga simrek ni Noe iti daong - ket immay ti layus a nangdadael kadakuada amin. ²⁸ Kasta met laeng ti napasamak idi al-aldaw ni Lot— nangan ken nagbartekda, naggatang ken naglakuda, nagmula ken nagpatakderda. ²⁹ Ngem iti aldaw nga rimmuar ni Lot manipud iti Sodoma, nagtudo iti apuy ken asupre manipud langit ket dinadaelna amin ida. ³⁰ Kastanto met ti mapasamak inton aldaw nga maipakaamo iti Anak ti Tao. ³¹ Iti dayta nga aldaw, saanto a mapalubosan ti siasinoman nga adda iti tuktok ti balay nga bumaba tapno iruarna dagiti gamengna manipud iti balay ken saanto met a makasubli ti siasinoman nga adda iti kataltalunan. ³² Lagipenyo ti asawa ni Lot. ³³ Ti siasinoman nga mangbiruk tapno magun-odna iti biagna ket mapukawnanto daytoy, ngem ti siasinoman a makapukaw iti biagna ket maisalakannanto daytoy. ³⁴ Ibagak kadakayo, iti dayta nga rabii addanto dua nga lalaki iti maymaysa a pagiddaan. Maalanto ti maysa, ket mabatinto ti maysa. ³⁵ Addanto ti dua a babbai nga agkadua nga aggilgiling. Maalanto ti maysa ket mabatinto ti maysa." * Dagiti kasayaatan nga kopya ket awan iti bersikulo 36 ³⁶ Addanto dua iti taltalon, maalanto ti maysa ket mabatinto ti maysa. ³⁷ Sinaludsod da isuna, "Sadinno, Apo?" Ket simmungbat kadakuada, "Iti sadinoman nga ayan iti bangkay, sadiay met ti pag-uurnungan dagiti buitre."