लिउ २३
1
पावलकि बाङि मि छसा थाका ल्हानि सिक्यासुङ, "ए उज्यु नुक् तिवा, हारिङसाग् कन्ज्यककि दङ्ला रिग्पा टेमुला थार्नि वे ।
2
छ्याने गेर्पुकि चाला टाङि देतुप् तिवाला पावलकि च्याङाला ग्योप सिनि का बिन्सुङ ।
3
ति तिङ्ला पावकि तिला सिक्यासुङ्,"कन्ज्यककि ख्योरुङ पाग् युलुप् सामला साङ ग्यागुइ। ख्यरेकि ठिम थग्मने ङे ल्यामु मेलेवा बेतुप्ला देतुप् हिन, तेमे साङ ठिमकि खाला लानि ङाला दुङ्गुप् का तेर्क्यु?"
4
ति चाला टाङि देतुप् तिवि सिक्यासुङ,"काङ ख्योरुङ क्ष्याने गेर्पुला मेलेवा सिउ?"
5
पावलकि सिक्यासुङ,"उज्यु नुक तिवा, खोति क्ष्याने गेर्पु हिन सिनि ङेकि क्ष्या माङे । चिला सिसिन दुगसिनि टिनि वे, "ख्यरेकि ख्यरे मितिवि ओङ्ज्येन कितुप् तिवाला मेलेवा सिरुप् मेङुइ ।"
6
तजोला पावलकि छोग्पाकि क्ष्यज्यिग्ला सदुकि तिवाताङ राङ्सा क्ष्यला फरिसितिवा नक् सिनि थोङ्सुङ तजोला तिकि छोग्पि नाङ्ला वोरु बोबि सिक्यासुङ, "उज्यु नुक् तिवा, ङा फरिसिकि चिक् पुज्युङ हिन । श्येप तिविकि ग्युर्वाला टेङ्बु रेवा वतुप्कि किसाला ङाला ठिम किइ वे।"
7
तिकि दि ताम सिक्यासिमा सदुकिताङ फरिसिकि पार्ला छिग्श्या श्योर्सुङ, तेमे ति छोग्पा टाल्सुङ ।
8
चिले सिसिन सदुकि तिवि ग्यर्वा मेङ्गुए, देवाच्येनकि थुचेनताङ थु तिवा मेत सिनि सिउइ, हिन्सिनाङ फरिसितिविकिदि दिवा तेरिक् वे सिनि सिउइ।
9
तिकि किसाला त्ये च्यारेङ् च्यिरिङ वोरु क्यासुङ्, तेमे फरिसितिवा नाङ्ने लालि लालि छ्योला खाम वतुप तिवा खक लानि दुग सिइ ताम किरुप् ज्युसुङ, "दि मिला दि ङेराङ काङ ज्यिगाङ लाका मेलेवा मोथोङ्नग् ।" दोजो देवाच्येन थुकिराङ् तिला सिक्याबु हिन्सिन काङ् किरुजा?
10
तोजोला त्ये हारुङ थामु बोबो श्योर्सुङ, तिविकि पावलला द्प्किदे सिनि माग्मि छ्येबु ति जिवा क्यासुङ । तिकिकिसाला तिगि मालिमला गाल्नि च्छोक्पाकि पार्नेसुर पावलला माग्मि तिवा देतुप् दासाला टि श्यक् सिनि का बिन्सुङ्।
11
राङ्सा नुप्ला कन्ज्यक तिकि चाला लेमनि सिक्यासुङ,"जिवा माकि, च्युक क्यानि ख्यरेकि ङे कला किदुक् बिन्दुप् वे, तुक क्यानिराङ ख्यरेकि रोमला साङ किदुक् तेर्गोक्यु।"
12
तजोला नाम लासुङ लालि यहुदि तिवा खब्रे नाङ्लाराङ ताम क्यानि तिवा दाग्पुराङ दिग्पा वतुप् नक सिनि छ्या ङेसुङः तिविकि दुक् सिक्यासुङ, तिविकि पावलला मासेबा काङ मासाउइ, काङ मुथुङुइ सिक्यासुङ।
13
तुक् सिरुप् तिवा खाल ङ्यि सिना साङ ल्हाग्पा नक्।
14
तिवाति छ्यो खाम वतुप् ति ताङ गमा कितुप् तिवि चाला गाल्नि सिक्यासुङ, ङिरेकि पावलला मासेबा काङजिगाङ मासाउइ मुथुङु सिनि ना क्यालु वे ।
15
तुग् किसाला खोकि श्युवाला ति सिनाङ ल्यामु क्यानि ठिम किरुप्ला छोक्पाकि छ्येबुला पावलला मो टिनि हुङ्गुप्ला सिसित्। ङेराङ्दि ति दे हुङ्गुप् सिना गमाला राङ तिला सेतुप्ला टेगे देकिद।
16
तजोला तिविकि तिला सेतुप् सिनि गुनि वतुप् नक सिनि पावलकि छाप्युग् कि कोसुङ ।
तिकिकिसाला, ति माग्मि दासाला श्युनि पावलला ति ताम सिक्यासुङ् ।
17
पावलकि माग्मि नाङ्ने मिराचिग् माग्मिला काताङ्नि सिक्यासुङ,"दि ज्येदा ला माग्मि छ्येम्बु चाला टिनि ग्युक् चिला सिसिन दि तानि तिला सिरुप् चिन्दिङ ताम मेत्।"
18
तिकि किसाला तिगि ज्यादा ख्यक्पेजा माग्मि छ्ये चाला टि गाल्सुङ, तेमे तिकि सिक्यासुङ, "चोन्खाङ्नाङ्ला उम्नि वतुप् पावलकि ङाला काताङ्सुङ तेमे ति ख्यक्पेजा खोकि चाला टि ग्युक् सिक्या। तिताङ् क्यानि खोला सिरुप् ताम वे ।"
19
माग्मि छ्येम्बुकि ति ख्यक्पेजाला लाक्पाला जिम्नि मोथोङ्बु दासाला टिनि गाल्नि टिसुङ्,"ख्यरेकि ङाला काङ सिरुप् वे ?"
20
ति ज्येदा ख्यक्पेजा तिकि सिक्यासुङ,"तिविकि तिकि श्युवाला हारुङ ल्यामु क्यानि ट्येप् सिनि ति यहुदितिवि साला पावलला मालिम छोक्ला टि हुङ्गुप् सिनि ताम् डिग्गुप् वे ।
21
हिन्सिनाङ पावलला तिवि लाग्ला मातेर चिला सिसिन ति दासाला पावलला सेतुप् सिनि मेरा खाल्ङि सिना बाङि मि गुनि देनि वे। तिविकि पावलल मासेबु साक् काङजिगाङ साप् मुथुङु सिनि ना क्याल्नि वे।"
22
तिकि किसा माग्मि छ्येकि ति ज्यादा ख्यकपेजाला दिङ्ग्या का बिनि डो चिसुङ,"ख्यरेकि ङाला सिक्याबु ताम तिवा ज्येन सुलाङ मासिसा।"
23
तितिङ्ला तिकि मेरा ङि माग्मिला काताङ्नि सिक्यासुङ, "कैसरिया साक डबला मि ग्या ङि माग्मि खाल ङि ताङ च्यु ताङ ग्या ङि दुङ खुरुप् मि तिवाला टेगे जो । खिराङ नुप्कि च्याप्तङ्माला डो डोक्युइ ।"
24
तेमे तिकि पावलकि जेक थुबु पालाङ छाल्नि ओङ्ज्येन फेलिक्स चाला क्योल सिनि का बिन्सुङ।
25
ति तिङ्ला तिकि दिज्योङ टिग्लेन टिसुङ ।
26
क्लाउडियस लुसियसनेसुर, ताङ्देन किदिमु ङुलखाङ छ्येम्बु फेलिक्सला गासो श्यप् ।
27
दि मिति यहुदि तिवि जिम्नक, तिविकि दिला सेतुप् छाल्नक । ङेकि माग्मि तिवाताङ गाल्नि दि मिला टालिन, ति तिङ्ला दि रोमकि मि नक सिनि छ्या ङेसुङ् ।
28
ति मितिवि दि मिला चिला क्यान चुबु हिन सिनि श्येबुला ङेकि तिल तिवि छोक्पाला टि वबिन् ।
29
ङे छ्या ङेसुङ तिविकि तिवि राङि ठिम खाला दि मिला क्यान चुबु नक । हिन्सिनाङ सेतुप् सिनि चोन्खाङ्ला लुग्राङ गोबु मेलेवा लाका ङेकि माथोङ ।
30
तिला सेतुप् छालुप् ताम ति ङाला सिक्यासुङ तिकिकिसला ङे श्यारि दि मिला ख्यरे चाला ताङु हिन, दिला क्यान चुबु मितिवा दिकि कला काङकाङ वे दि तेरिग् खोकि दङ्लाराङ ज्यकुप। सिनि लेन बिनि वे ।
31
माग्मि तिवि तिवाला बिन्दुप् का दगेराङ पावलला टि गाल तेमे ति नुप्लाराङ तिला एन्टिपाट्रिसला टि लेसुङ।
32
राङसा ङिमाला माग्मि तिविकि पावलला ता ज्येकुप् तिवा ताङ ज्याङ्नि माग्मिखाङ्ला ग्युर्सुङ ।
33
तेमे ता ज्येकुप् तिवा कैसरिया ख्योल्सुङ तिविकि ओङ्ज्येनला टिग्लेन तानि पावलला च्याग् बिन्सुङ् ।
34
तेमे ओङ्ज्येनकि टिग्लेन रासुङ तिकि पावलल केन्सुर वबु हिन सिनि टिसुङ । ति किलिकिया नेसुर वबु ताम छ्या ङेसुङ
35
तिकि सिक्यासुङ ख्योरुङ्ला केन जुबु मितिवा वासिमा ङा ख्यरे तेरिग् ताम ङेन्ग्यु ।
तेमे तिकि पावलला हेरोदकि ग्याल्खाङ्ला ज्यगु सिनि का बिन्सुङ ।