¹ Karon si Pedro ug si Juan miadto sa templo sa oras sa pag-ampo, ang ikasiyam nga oras. ² Karon usa ka tawo nga bakol gikapa sa iyang pagkatawo gidala sa matag adlaw ug gibutang didto sa pultahan sa templo nga gitawag ug Matahom. Ila siyang ibutang didto kada adlaw aron makapangayo siyag gasa nga kwarta sa mga tawo nga mosulod sa templo ³ Sa dihang nakita niya si Pedro ug si Juan nga mosulod sa templo,siya nangayo ug gasa nga kwarta. ⁴ Si Pedro, mitutok kaniya,uban ni Juan ug miingon, "Tan-awa kami." ⁵ Ang bakol mitan-aw kanila, ug nagdahom nga makadawat siya ug mga butang nga gikan kanila. ⁶ Apan si Pedro miingon, "Plata ug bulawan walay akoa, apan kong unsa ang naa kanako, maoy ihatag ko kanimo. "Pinaagi sa ngalan ni Cristo Jesus nga taga Nazaret, lakaw." ⁷ Gikuha siya pinaagi sa tuong kamot,gipabarug siya ni Pedro, ug dihadiha ang iyang tiil ug mga lutahan nahimong lig-on. ⁸ Milukso, ug mitindog ang tawong bakol ug nagsugod siyag lakaw; misulod siya sa templo uban kang Pedro ug kang Juan, milakaw, naglukso-lukso, ug nagdayeg sa Dios. ⁹ Ang tanang mga katawhan nakakita kaniya nga naglakaw ug nagdayeg sa Dios. ¹⁰ Sila nakamatikod kadtong tawhana kinsa mangayu sa mga tawo alang sa sa gasa nga kwarta didto sa matahum nga purtahan sa templo ug sila napuno uban sa katingala ug kahibulong tungod sa unsa ang nahitabo ngadto kaniya. ¹¹ Samtang siya migunit kang Pedro ug kang Juan, ang mga tawo nanagan paduol kanila sa dapit nga ginatawag ug Portico ni Solomon, sa dakong kahibulong. ¹² Sa dihang si Pedro nakakita niini, siya mitubag sa mga tawo, "Kamo nga mga katawhan sa Israel, nganong natingala man kamo? Nganong nagtutok man kamo kanamo, nagatuo ba kamo nga kami ang nakahimo kaniya sa pagpalakaw pinaagi sa among gahom o pagkadiosnon? ¹³ Ang Dios ni Abraham, ug ni Isaac, ug ni Jacob, ang Dios sa atong mga amahan, nga nagpasidungog sa iyang sulugoon nga si Jesus. Nga mao ang inyong gitugyan ug gisalikway atubangan ni Pilato, sa dihang nakahukom siya nga siya iyang buhian. ¹⁴ Gisalikway ninyo ang Usa nga Balaan ug Matarong, ug inyong gipangayo nga maoy buhian ang mamumuno alang kaninyo. ¹⁵ Gipatay ninyo ang Magtutukod sa kinabuhi, nga gibanhaw sa Dios gikan sa mga patay—ug kami mga saksi niini. ¹⁶ Pinasikad sa pagtuo sa iyang ngalan, ang iyang ngalan nakahimo niining tawhana,kinsa inyong nakita ug nahibaloan nga lig-on na.ang pagtoo pinaagi kang Jesus nga maoy nahatag ug hingpit nga kahimsog diha sa atubangan ninyong tanan. ¹⁷ Karon, mga igsoon, ako nahibalo nga kamo mibuhat sa pagkawalay alamag, ingon usab sa inyong mga pangulo. ¹⁸ Apan ang mga butang nga gisulti sa Dios pinaagi sa baba sa mga propeta, nga ang iyang Kristo kinahanglan mag-antus, karon natuman na niya. ¹⁹ Busa, paghinulsol, ug balik, aron ang inyong mga sala pagapapason, ug aron moabot ang mga higayon sa nakapalagsik gikan sa presensya sa Ginoo; ²⁰ ug ipadala niya ang Cristo nga pinili alang kaninyo, nga si Jesus. ²¹ Siya ang usa sa langit kinahanglan madawat hangtod sa panahon nga mapasig-uli ang tanang mga butang,mahitongod sa dogay nang panahon pinaagi sa baba sa mga balaang propeta. ²² Si Moises gayud miingon, 'Ang Ginoong Dios motuboy sa usa ka propeta nga sama kanako gikan sa inyong mga kaigsoonan.kamo Magapatalinghog sa tanang mga butang nga igasulti niya nganha kaninyo.' ²³ Kini mahitabo nga ang matag-usa nga dili magapatalinghog sa maong propeta mapukan gayod diha sa mga katawhan. ²⁴ Oo, ang tanang mga propeta gikan kang Samuel ug kadtong kinsa miabut sunod kaniya, ilang gisulti ug nagpasabot niining adlawa. ²⁵ Kamo ang mga anak sa mga propeta ug sa kasabotan nga gihimo sa Dios tali sa inyong mga katigulangan, ingon sa gisulti niya kang Abraham, 'Pinaagi sa imong binhi ang tanang pamilya sa kalibotan pagapanalanginan.' ²⁶ Human gibanhaw sa Dios ang iyang Alagad, gipadala siya una nganha kaninyo, aron nga panalanginan kamo ug motalikod kamo diha sa inyong pagkadaotan.