¹ Despois disto Xesús andaba por Galilea; e non quería andar por Xudea, porque os xudeus procuraban matalo. ² E a festa dos xudeus, a dos Tabernáculos, estaba próxima. ³ Por iso dixéronlle os seus irmáns: -Deixa isto e vaite a Xudea para que os teus dicípulos vexan tamén as obras que ti fas. ⁴ Porque ninguén fai nada ás agachadas cando procura ser coñecido en público. Se fas estas cousas, móstrate ao mundo. ⁵ Porque nin os seus irmáns crían nel. ⁶ Entón Xesús díxolles:-O meu tempo aínda non chegou, pero o voso tempo sempre é oportuno. ⁷ O mundo non pode odiarvos, pero ódiame a min, porque Eu dou testemuño del, que as súas obras son malas. ⁸ Subide vós á festa; Eu non subo a esta festa porque o meu tempo non está cumprido. ⁹ E logo de dicirlles isto, ficou en Galilea. ¹⁰ Pero cando os seus irmáns subiron á festa, entón el tamén subiu; non abertamente senón ás agachadas. ¹¹ Os xudeus andaban á procura del na festa e dicían: -Onde se meteu ese? ¹² E había moita murmuración entre a xente acerca del. Uns dicían: El é bo. Outros dicían: non, todo o contrario, engana as persoas. ¹³ Porén, ninguén falaba abertamente del por medo aos xudeus. ¹⁴ Pero xa na metade da festa, Xesús subiu ao templo e comezou a ensinar. ¹⁵ Entón os xudeus admirábanse del dicindo: -Como pode este saber de letras sen ter estudado? ¹⁶ Entón Xesús respondeulles dicindo: -O meu ensino non é meu senón daquel que me mandou. ¹⁷ Se alguén quere facer a súa vontade, saberá se a miña ensinanza é de Deus ou se falo de min mesmo. ¹⁸ O que fala de si mesmo procura a súa propia gloria; mais o que procura a gloria de quen o mandou, este é verdadeiro e non hai inxustiza nel. ¹⁹ Non vos deu Moisés a lei, e porén ninguén de vós a cumpre? Por que estades á procura de me matar? ²⁰ A multitude contestou:-Tes un demo! Quen te procura matar? ²¹ Respondeu Xesús e díxolles: -Só fixen unha obra e todos vos admirades. ²² Moisés deuvos a circuncisión (non porque sexa de Moisés senón dos pais) e no día de repouso circuncidades o home. ²³ E se para non quebrantar a lei de Moisés circuncidades un home no día de repouso, por que vos incomodades comigo porque sanei por completo a un home no día de repouso? ²⁴ Non xulguedes polo que se ve, senón xulgade con xuízo xusto. ²⁵ Entón algúns de Xerusalém dicían: -Non é este o que procuran matar? ²⁶ E aí o tedes, fala en público e non lle din nada. Non será que en verdade os gobernantes recoñecen que este é o Mesías? ²⁷ Porque, nós sabemos de onde é este; pero cando veña o Mesías, ninguén saberá de onde é. ²⁸ Xesús exclamou en alta voz mentres ensinaba no templo: -Vós coñecédesme e sabedes de onde son. Eu non vin pola miña conta, pero o que me mandou é verdadeiro, a quen vós non coñecedes. ²⁹ Eu coñézoo porque del procedo, e El me mandou. ³⁰ Procuraban pois, prendelo; pero ninguén lle botou man, porque aínda non chegara a súa hora. ³¹ Pero moitos da multitude creron nel, e dicían: cando veña o Mesías, fará máis sinais dos que ten feito este? ³² Os fariseos escoitaron a multitude murmurando estas cousas del, e os principais sacerdotes e fariseos mandaron alguacís para prendelo. ³³ Entón dixo Xesús: -Por un pouco máis de tempo estou convosco; despois vou ao que me mandou. ³⁴ Buscarédesme e non me habedes atopar, e onde Eu estou vós non podedes vir. ³⁵ Dicían entón os xudeus entre si: -Onde pensa ir este, que non o atopemos? Será que quere ir aos dispersos entre os gregos e ensinar aos gregos? ³⁶ Que quere dicir isto que dixo: buscarédesme e non me habedes atopar, e onde Eu estou vós non podedes vir? ³⁷ E no último día, o grande da festa, Xesús púxose en pé e dixo en voz alta: -Se algún ten sede, que veña a min e beba. ³⁸ O que cre en min, como di a Escritura: "Do máis profundo do seu ser, abrollarán ríos de auga viva". ³⁹ (Pero El dicía isto do Espírito que habían de recibir os que creran nel; porque o Espírito, aínda non fora dado, pois Xesús non fora glorificado). ⁴⁰ Entón algúns da multitude, cando escoitaron estas palabras, dicían: Verdadeiramente este é o Profeta! ⁴¹ Outros dicían: Este é o Mesías. Pero outros dicían: acaso o Mesías ha vir de Galilea? ⁴² Non di a Escritura que o Mesías vén da descendencia de David, e de Belén, a aldea de onde era David? ⁴³ Así se creou división entre a multitude por causa del. ⁴⁴ E moitos deles querían prendelo, pero ninguén lle botaba a man. ⁴⁵ Entón os alguacís foron cara os principais sacerdotes e fariseos e dixéronlles estes: -Por que non o trouxestes? ⁴⁶ Os alguacís responderon: -Endexamais ningún home ten falado como este home fala. ⁴⁷ Entón contestáronlle os fariseos: -É que vós tamén vos deixastes enganar? ⁴⁸ Ten crido nel algún dos gobernantes ou dos fariseos? ⁴⁹ Pero esta multitude que non coñece a lei, é maldita. ⁵⁰ Nicodemo, o que viñera a Xesús antes, e que era un deles, díxolles: ⁵¹ -Dende cando xulga a nosa lei a un home sen escoitalo primeiro, e saber o que fai? ⁵² Respondendo dixéronlle: -Es ti tamén de Galilea? Investiga e verás que ningún profeta xurde de Galilea. ⁵³ E fóronse cada un para a súa casa.