¹ Xesús falou estas cousas, e levantando os ollos ao ceo, dixo: -Pai, a hora chegou; glorifica o teu Fillo, para que o Fillo te glorifique a ti, ² como lle deches autoridade sobre toda carne para que dea vida eterna a todos os que ti lle deches. ³ E esta é a vida eterna: que te coñezan a ti, o único Deus verdadeiro, e a Xesús Cristo, a quen mandaches. ⁴ Eu glorifiqueite na terra, rematando a obra que me deches para facer. ⁵ E agora glorifícame ti, Pai, xunto a ti, coa gloria que tiña contigo antes que o mundo existira. ⁶ Manifestei o teu nome a aqueles que do mundo me deches; eran teus e déchesmos, e gardaron a túa palabra. ⁷ Agora coñeceron que todo o que me deches vén de ti, ⁸ porque Eu deilles as palabras que me deches; e recibíronas, e entenderon que en verdade saín de ti, e creron que ti me mandaches. ⁹ Eu rogo por eles; non rogo polo mundo, senón polos que me deches; porque son teus; ¹⁰ e todo o meu é teu, e o teu, meu; e fun glorificado neles. ¹¹ Xa non estou no mundo, pero eles si están no mundo, e Eu vou a ti. Pai santo, gárdaos no teu nome, o nome que me deches, para que eles sexan un, así como somos nós. ¹² Cando estaba con eles, gardábaos no teu nome, o nome que me deches; gardeinos e ningún se perdeu, agás o fillo de perdición, para que a Escritura se cumprira. ¹³ Pero agora vou a ti; e digo estas cousas no mundo para que teñan o meu gozo pleno en si mesmos. ¹⁴ Eu deilles a túa palabra e o mundo aborreceunos, porque non son do mundo, como tampouco Eu son do mundo. ¹⁵ Non che rogo que os tires do mundo, senón que os gardes do maligno. ¹⁶ Eles non son do mundo, como tampouco Eu son do mundo. ¹⁷ Santifícaos na verdade; a túa palabra é verdade. ¹⁸ Coma ti me mandaches ao mundo, Eu tamén os mandei ao mundo. ¹⁹ E por eles santifícome, para que eles tamén sexan santificados na verdade. ²⁰ Mais non rogo só por estes, senón tamén polos que han de crer en min pola palabra deles, ²¹ para que todos sexan un coma ti, Pai, estás en min e Eu en ti, que tamén eles estean en nós, para que o mundo crea que ti me mandaches. ²² Deilles a gloria que me deches, para que sexan un, así como nós somos un: ²³ Eu neles e ti en min, para que sexan perfeccionados en unidade, para que o mundo saiba que ti me mandaches, e que os amaches así como me amaches a min. ²⁴ Pai, quero que os que me deches, estean comigo onde Eu estou, para que vexan miña gloria, a gloria que me deches; porque me amaches dende antes da fundación do mundo. ²⁵ Pai xusto, aínda que o mundo non te coñeceu, Eu coñecinte, e estes coñeceron que ti me mandaches. ²⁶ Eu deilles a coñecer o teu nome, e dareino a coñecer, para que o amor con que me amaches estea neles e Eu neles.