¹ Eu son a vide verdadeira e o meu Pai é o labrego. ² Toda rama que non dá froito en min, quítaa; e toda a que dá froito, pódaa para que dea máis froito. ³ Vós xa estades limpos pola palabra que vos din. ⁴ Permanecede en min, e Eu en vós. Como a rama non pode dar froito por si mesma se non permanece na vide, así vós tampouco se non permanecedes en min. ⁵ Eu son a vide, vós as ramas; o que permanece en min e Eu nel, ese dá moito froito, porque separados de min nada podedes facer. ⁶ Se algún non permanece en min, es é botado fóra, como un ramo que seca, e recóllenos, bótanos no lume e quéimanse. ⁷ Se permanecedes en min e as miñas palabras permanecen en vós, pedide o que queirades e farásevos. ⁸ Nisto é glorificado o meu Pai, en que levedes moito froito, e así fagades ver que sodes os meus discípulos. ⁹ Como o Pai me amou, así tamén Eu vos amei; permanecede no meu amor. ¹⁰ Se gardades os meus mandamentos, permanecedes no meu amor, así como Eu gardei os mandamentos do meu Pai e permanezo no seu amor. ¹¹ Estas cousas faleivos para que o meu gozo estea en vós, e o voso gozo sexa completo. ¹² Este é o meu mandamento: que vos amedes uns aos outros, así como Eu vos amei. ¹³ Niguén ten un amor maior que este: que un dea a súa vida polos seus amigos. ¹⁴ Vós sodes os meus amigos se facedes o que Eu vos mando. ¹⁵ Xa non vos chamo servos, porque o servo non sabe o que fai o seu señor; pero chameivos amigos, porque deivos a coñecer todo o que escoitei do meu Pai. ¹⁶ Vós non me escollestes a min, senón que vos escollín Eu a vós e púxenvos para que vaiades e deades froito, e para que o voso froito permaneza; para que todo o que pidades ao Pai no meu nome volo conceda. ¹⁷ Mándovos isto: que vos amedes uns aos outros. ¹⁸ Se o mundo vos aborrece, sabede que me aborreceu a min antes ca vós. ¹⁹ Se fósedes do mundo, o mundo amaría o seu; pero como non sodes do mundo, senón que Eu vos escollín de entre o mundo, por iso o mundo aborrécevos. ²⁰ Lembrade a palabra que vos dixen: un servo non é maior ca o seu señor. Se me perseguiron a min, tamén vos perseguirán a vós; se gardaron a miña palabra, tamén gardarán a vosa. ²¹ Pero faranvos todo isto por mor do meu nome, porque non coñecen a quen me mandou. ²² Se Eu non viñese e non lles falase, non terían pecado, pero agora non teñen escusa polo seu pecado. ²³ Quen me aborrece a min, aborrece tamén o meu Pai. ²⁴ Se Eu non fixese entre eles as obras que ningún outro viu, non terían pecado; pero agora víronas, e aborrecéronme a min e tamén o meu Pai. ²⁵ Pero fixeron isto para que se cumpra a palabra que está escrita na súa lei: "Aborrecéronme sen causa". ²⁶ Cando veña o Axudador, a quen Eu mandarei do Pai, é dicir, o Espírito de verdade que vén do Pai, El dará testemuño de min, ²⁷ e vós tamén daredes testemuño, porque estivestes comigo dende o principio.