¹ Pero debes saber o seguinte: nos derradeiros días virán tempos difíciles; ² porque as persoas serán amantes de si mesmas, avarentas, fachendosas, soberbias, maldicentes, rebeldes contra os pais, desagradecidas, irreverentes, ³ sen afecto natural, inflexibles, calumniadoras, descontroladas, crueis, inimigas do bo, ⁴ traidoras, temerarias, envaidecidas e amantes dos praceres en vez de amar a Deus. ⁵ Terán apariencia de piedade, pero arrenegarán do poder dela. Fuxe de xente así. ⁶ Porque coma estes son os que entran nas casas ás agachadas e toman cativas ás mulleriñas ateigadas de pecados, levadas por diferentes paixóns; ⁷ que están sempre aprendendo, pero nunca poden chegar ao coñecemento da verdade. ⁸ E do mesmo xeito que Ianes e Iambres resistiron a Moisés, así tamén estes se arrepoñen contra a verdade; xente de mente estragada e fracasada na fe. ⁹ Pero non irán lonxe, porque a súa tolería faráselles manifesta a todos, como tamén o foi a daqueles. ¹⁰ En troques ti seguiches de preto o meu ensino, o meu xeito de vivir, o meu propósito, a miña fe, o meu aguante con todos, o meu amor, a miña paciencia, ¹¹ as persecucións e os sufrimentos, coma os que aturei en Antioquía, en Iconio e Listra; como os padecementos que sufrín, e de todos eles me librou o Señor. ¹² Si, todos os que queiran vivir dun xeito piadoso en Xesús Cristo, padecerán persecución. ¹³ Pola súa banda, a xente mala e estafadora irá de mal en peor, enganando e sendo enganados. ¹⁴ Pero ti mantente no que aprendiches e no que fuches persuadido, sabendo de quen aprendiches, ¹⁵ xa que dende neno coñeces as Sagradas Escrituras, que poden facerte sabio na salvación que hai pola fe en Xesús Cristo. ¹⁶ Toda Escritura é inspirada por Deus, e é útil para ensinar, para rebater os enganos, para emendar, e para instruír na xustiza, ¹⁷ de xeito que as persoas de Deus sexan completamente cualificadas e competentes para toda boa obra.