¹ Polo tanto, ti, meu fillo, sé fortalecido coa graza que hai en Cristo Xesús. ² As cousas que escoitaches de min en presenza de moitas testemuñas, encárgallelas a persoas de confianza que sexan capaces de ensinar tamén a outras. ³ Comparte sufrimentos coma un bo soldado de Cristo Xesús. ⁴ Ningún soldado se deixa enguedellar nos negocios da vida, se quere compracer a aquel que o chamou a filas. ⁵ Tamén se algún compite como atleta, non leva o premio se non compite de acordo ás normas. ⁶ O labrego que traballa duro, é o primeiro en participar dos froitos. ⁷ Medita ben no que che digo, porque o Señor hache dar entendemento en todo. ⁸ Lémbrate de Xesús Cristo, da semente de David, resucitado de entre os mortos segundo o meu evanxeo; ⁹ polo que estou a sufrir penalidades na cadea coma se fose un criminal; pero a palabra de Deus non está encadeada. ¹⁰ Por iso soporto tódalas cousas, por amor dos escollidos, para que eles tamén acaden a salvación que hai en Cristo Xesús con gloria eterna. ¹¹ De toda confianza é esta palabra: se morremos con El, tamén viviremos con El; ¹² se perseveramos, tamén reinaremos con El; se arrenegamos del, El tamén nos ha negar; ¹³ se nós somos infieis, El permanece fiel, porque non pode arrenegar de si. ¹⁴ Lémbralles estas cousas, declarándolles solemnemente diante de Deus que non discutan sobre palabras, porque iso non vale para nada, senón para botar a perder os que escoitan. ¹⁵ Procura con presteza presentarte diante de Deus aprobado, obreiro que non ten de que sentir vergoña, que interpreta, expón e aplica correctamente a palabra da verdade. ¹⁶ Pero evita as lerias profanas, porque producirán que a maldade medre máis; ¹⁷ e a palabra deles corroerá coma gangrena; como son Himeneo e Fileto, ¹⁸ que se afastaron da verdade dicindo que a resurrección dos mortos xa aconteceu, co que están botando a perder a fe dalgúns. ¹⁹ Con todo, o fundamento de Deus mantense firme, levando este selo: o Señor coñece os que son del: todo o que pronuncia o nome do Señor que se aparte da inxustiza! ²⁰ Pero nunha casa grande, non hai soamente cuncas de ouro e prata, senón tamén de madeira e barro; unhas para uso nobre, e outras para uso común. ²¹ Polo tanto, se un se limpa desas cousas, será un vaso honorable, santificado, útil para o seu Señor, preparado para toda boa obra. ²² Fuxe das paixóns da mocidade e persegue a xustiza, a fe, o amor e a paz, con todos os que de corazón limpo invocan o Señor. ²³ Pero evita as discusións necias e parvas, sabendo que enxendran liortas. ²⁴ Porque un servo do Señor non debe ser conflitivo senón amable con todos, axeitado para ensinar, tolerante; ²⁵ que saiba corrixir a aqueles que se opoñen; que o faga con mansedume por se acaso Deus lles conceda o arrepentimento que leva ao coñecemento total da verdade, ²⁶ e volvan en si, fuxindo das trapelas do demo nas que están cativos para facer o que el quere.