¹ Mándoche solemnemente na presenza de Deus e de Cristo Xesús, que ha xulgar a vivos e a mortos na súa vinda e no seu reino: ² pregoa a palabra, insiste a tempo e a destempo. Corrixe, aconsella e reprende con toda paciencia e doutrina. ³ Porque chegarán os tempos cando non soportarán a doutrina sa, senón que sentindo coceira de ouvir, amorearán para si mestres conforme aos seus propios antollos; ⁴ afastarán o seu ouvido da verdade, e descamiñaranse polo terreo das fábulas. ⁵ Pero ti sé sobrio en todo, soporta os sufrimentos, fai obra de evanxelista, cumpre o teu ministerio. ⁶ Porque eu estou para ser derramado coma libación, e o tempo do meu pasamento é inminente. ⁷ Combatín unha boa loita, rematei a miña carreira e gardei a fe. ⁸ Polo demais, está reservada para min a coroa da xustiza, aquela que o Señor Xuíz xusto me ha entregar naquel día; e non só a min, senón tamén a todos os que demostraron amar a súa vinda. ⁹ Procura vires axiña, ¹⁰ porque Demas, amando este mundo presente, marchou a Tesalónica e deixoume desamparado, Cresente foi a Galacia, e Tito a Dalmacia. ¹¹ Só Lucas ficou comigo. Recolle a Marcos e tráeo contigo, porque me é moi útil para o ministerio, ¹² pois a Tíquico mandeino a Éfeso. ¹³ Cando veñas, tráeme o capote que deixei onda Carpo en Troas, xunto cos rolos, maiormente os pergamiños. ¹⁴ Alexandre, o latoeiro, fíxome moito mal; o Señor daralle o pago conforme as súas obras. ¹⁵ Gárdate ti tamén del, pois opúxose en gran maneira ás nosas palabras. ¹⁶ Na miña primeira defensa ninguén estivo ao meu carón, senón que todos me abandonaron; que non se lles teña en conta! ¹⁷ Pero o Señor axudoume e fortaleceume, para que a través de min fora cumprida a predicación e a escoitaran todos os xentís, e fun librado da boca do león. ¹⁸ Do mesmo modo o Señor me ha librar de toda obra mala e me ha protexer para o seu reino celestial. A El sexa a gloria polos séculos dos séculos. Amén. ¹⁹ Saúda a Prisca e a Aquila, e á familia de Onesíforo. ²⁰ Erasto ficou en Corinto, e Trófimo quedou enfermo en Mileto. ²¹ Fai o posible para vires antes do inverno. Mándanche saúdos para ti Eubulo, Pudente, Lino e Claudia, ademais de tódolos irmáns. O Señor sexa co teu espírito. ²² A graza sexa convosco.