¹ Benqueridos, non vos fiedes de calquera espírito, mais ben poñede a proba tódolos espíritos para ver se veñen de Deus, porque moitos falsos profetas saíron ao mundo. ² Nisto coñeceredes o Espíritu de Deus: todo espírito que confesa que Xesús Cristo veu en carne, procede de Deus; ³ e todo espírito que non confesa a Xesús, non procede de Deus, senón que é do anticristo, do que sabedes que vén e agora xa está no mundo. ⁴ Meus filliños, vós sodes de Deus, e a estes xa os vencestes, pois maior é o que está en vós que o que está no mundo. ⁵ Eles proceden do mundo, por iso falan de parte do mundo e o mundo está a escoitalos. ⁶ Nós procedemos de Deus, aquel que coñece a Deus escóitanos; o que non procede de Deus, non nos escoita. Por iso coñecemos o espírito da verdade e o espírito do erro. ⁷ Meus queridos, amémonos uns aos outros, porque o amor vén de Deus, e todo aquel que ama naceu de Deus e coñece a Deus. ⁸ Aquel que non ama, non coñece a Deus, pois Deus é amor. ⁹ Manifestouse o amor de Deus en nós deste xeito: Deus mandou ao mundo o seu Fillo Unixénito para que vivamos por medio del. ¹⁰ Nisto consiste o amor: non en que nós teñamos amado a Deus, senón en que El nos amou e enviou o seu Fillo como propiciación polos nosos pecados. ¹¹ Meus amados, se Deus nos amou tanto, tamén temos que nos amar uns aos outros. ¹² A Deus ninguén o viu xamais; se nós, nos amamos uns aos outros, Deus permanece en nós e o seu amor foi perfeccionado en nós. ¹³ Coñecemos que permanecemos nel e El en nós en que nos deu o seu Espírito. ¹⁴ Nós mesmos vimos e testemuñamos que o Pai mandou o Fillo como Salvador do mundo. ¹⁵ Aquel que confese que Xesús é o Fillo de Deus, Deus ten parte con el e el con Deus. ¹⁶ Nós coñecimos e crimos no amor que Deus nos ten. Deus é amor, e quen permanece no amor permanece en Deus e Deus nel. ¹⁷ Nisto chega a ser perfecto o amor de Deus entre nós, para que teñamos confianza no día do xuízo: que como El é, así somos nós no mundo. ¹⁸ No amor non hai temor, mais ben o amor perfecto bota fóra o temor, pois o temor leva o castigo dentro de si; pois o que ten medo non chegou a un amor perfecto. ¹⁹ Nós amamos porque El nos amou primeiro. ²⁰ Se alguén di: "amo a Deus" pero aborrece a seu irmán, é mentireiro, porque quen non ama a seu irmán a quen ve, non pode amar a Deus a quen non ve. ²¹ Este é o mandamento que temos de parte de Deus: quen ama a Deus, ten que amar tamén a seu irmán.