¹ Pali nkalya kasuba imfumu Ashuerushi kapela mukolo Estele icipe cakwa Hamani, umulwani waba Yuda, nakambi Modekai ewatampile ukubombela ku mfumu, pakuti Estele alyebele imfumu ifi Modekai bali nakwe mu lupwa. ² Imfumu kaifula inindamunwe yaiko, iyo apokolweleko kuli Hamani, no kupela kuli Modekai. Estele kabika Modekai ukuba uwa kubwenenena incende yakwa Hamani. ³ Elo Estele abwekeshepo ukulabila kumfumu. Kalala alinamikile icinso panshi no kulila pa kumupapata ukukanya amapinge ayabipile aya kwa Hamani umwina Agagi, amapinge ayo alokutontonkanishisha aba Yuda. ⁴ Elo imfumu yatambikile inkonto ya golide kuli Estele, kaima no kwimakana ku cinso ca mfumu. ⁵ Kalabila ati, "Kani cikosekesha imfumu, nakambi kani ndisangile uluse mu menso yenu, kani nci cintu cikoboneka icololokele ku mfumu, nande namuwamina mu menso yenu, lekeni icipope cilembwe ukwalula amakalata ayalembele Hamani mwana Hammedata umwina Agagi, inkalata ishi alembele ukwipaya aba Yuda abali mu ncingo shonse isha bufumu. ⁶ Ningakumanisha shani ukubona uko icibipile cikoponena pa bantu bandi? Ningashipa shani ukutamba ukonaulwa kwa ba lupwa bandi?" ⁷ Imfumu Ashuerushi kalabila kuli Mukolo Estele na kuli Modekai umu Yuda, "Boneni, ndipele Estele inanda ya kwa Hamani, nakambi balimutanikile pa mukobeko, pantu alokufwaya ukwipaya aba Yuda. ⁸ Lemba nacimbi icipope paba Yuda mwishina lya mfumu no kulambatikila ku nindamunwe ya mfumu. Pantu icipope ica lembelwe akale mwishina lya mfumu no kulambatikilwa ku nindamunwe ya mfumu tekuti fyalulwepo." ⁹ Elo bakalemba baku bumfumu baitilwe pali njilya nshita, mu mwenshi wa butatu, e mwenshi wa Sibani, pa bushiku bwa makumi yabili na shitatu mu mwenshi. Icipope kacilembwa icalimo fyonse likoso ifi Modekai akonkobeshe palwa ba Yuda. Kacilembwa kuli ba filolo ba ncingo naba mushika ba mu ncingo ishali mu India na Kushi, incingo 127, kuncingo yanse kacilembwa mu milembele yabo, na ku bantu bonse mu milaka yabo, naku ba Yuda mu milembele yabo no mulaka. ¹⁰ Modekai kalemba mwishina lya mfumu Ashuerushi no kulambatikila ku nindamunwe ya mfumu. Katuma ifyalembelwe ukubomfya ba kasalanganya abalokwensha bakabalwe ababutukisha abo balokubomfya ku ncito sha bufumu, ishakulile mu fibaya fya mfumu. ¹¹ Imfumu kaipela aba Yuda abalokuli mu misumba yonse insambu sha kubungana no kwimakana ukucingilila imyeo yabo: Ukulofya, ukwipaya, no konaula ifita fya bantu abali bonse nangula incingo mbo abakufwaya ukubasansa, abaice na banakashi pamo, nangula ukubapokolola ifipe fyabo. ¹² Nci kaciba mu maka mu ncingo shonse isha mfumu Ashuerushi, pa bushiku bwe kumi na shitatu mu mwenshi we kumi na ibili, e mwenshi wa Adari. ¹³ Cimbi icikope pa fyalembelwe kacibikwa ukuba ifunde no kutanikwa konse konse ukubonwa ku bantu bonse. Aba Yuda kabali abaipekenye nkalya kasuba ukucita icilandushi pa balwani babo. ¹⁴ Efi bakasalanganya babutwishe bakabalwe ba ku bufumu abo balokubomfya ku ncito ya sha mfumu. Kabendesha tabakokwelepo. Icipope ca mfumu kabacisalanganya namu Shushani namo. ¹⁵ Efi Modekai afumine pa cinso ca mfumu alifwite ifya bufumu fya kafifi ne fitubile, ne cisote icikulu ica golide no mwingila wa kafifi na kolokondwe, no musumba wa Shushani kaulo kubilikisha no kusangalala. ¹⁶ Aba Yuda kabangukilwa nakambi kabatemwa, ne nsansa no bucindami. ¹⁷ Mu ncingo shonse ne misumba yonse, konse ukwafikile icipope ca mfumu, kwali ukutemwa ne nsansa kuba Yuda, umutebeto no bushiku bwa kutusha. Abengi mu bantu abapusene-pusene abekashi bamu calo kababa aba Yuda, pakuti umwenso wakutina aba Yuda kaubekata.